Nuusbrief (240)
Daar aan die voet van die kruis (deel 2)
|
Wil jy nie asseblief weer my artikel op die Net getiteld, gaan lees nie? Hier is die skakel daarheen: My artikel op die Net oor die Kruisgebeure Nou kan jy verder lees. Ek wil jou weer herinner aan wat in Gal. 2:19,20 staan: “… ek is saam met Christus gekruisig, en nou is dit nie meer ek wat lewe nie, maar Christus wat in my lewe. Die lewe wat ek nou nog hier lewe, leef ek in die geloof in die Seun van God wat sy liefde vir my bewys het deur sy lewe vir my af te lê.” Daar aan die voet van die kruis hoor ek hoe God self vir my sê dat in Sy oë is elkeen wat gekies het om in Jesus as Gekruisigde te glo, as’t ware saam met Christus gekruisig. Ek weet nie of jy dit weet of besef nie, maar daar is net een rede waarom ʼn mens gekruisig word en dit is om jou dood te maak. Met ander woorde, as die Lewende God vir jou in Sy Woord sê dat jy saam met Christus gekruisig is, sê Hy vir jou dat jy na jou bekering dood is. Die ou jy, wat nog ʼn slaaf van sonde was en totaal onder die beheer van Satan was, is nou dood! Hoor jy wat God sê? Terwille van wat God verder in jou lewe wil doen, en terwille van die heil en geluk van almal rondom jou, moet jy, die ou vlees-jy, as saam met Christus gekruisig, gereken word in geloof! Jy moet as’t ware sien hoe Jesus daar aan die kruis hang en agteraan die kruis hang jy! Jy hang net vir een rede daar: Om daar dood te gaan, want die ou jy moet doodgaan! Dit is waarom, daardie dag toe jy tot bekering gekom het, volgens die Bybel, as deel van ʼn normale geestelike geboorte wat daardie dag gebeur het, ander gelowiges wat rondom jou gestaan het en gehoor het hoe jy met jou mond bely het dat jy glo dat Jesus ook vir jou gesterf het, jou daar gevat het en na water toe geneem het waar hulle jou in daardie water onderdompel en gedoop het! Rom. 6 sê immers, dit is wat die doop in water simboliseer. Dit is waar die ou mens van elke nuwe bekeerling begrawe word! Want God sê: In Sy oë is elke persoon wat Jesus as Verlosser en Here aangeneem het in geloof, saam met Christus gekruisig en het hulle saam met Hom gesterf! Daarom vertaal die MESSAGE-vertaling Ef. 4:22-24 so: “Since, then, we do not have the excuse of ignorance, everything—and I do mean everything—connected with that old way of life has to go. It’s rotten through and through. Get rid of it! And then take on an entirely new way of life—a God-fashioned life, a life renewed from the inside, and working itself into your conduct as God accurately reproduces his character in you.” Lê daarom, daar aan die voet van die kruis, omdat jy hoor wat God oor jou as gelowige sê, al daardie ou stukke vlees en sondes en sondige optrede en woorde, voor God neer! Bely dit as sonde, waarvoor Jesus ook Sy lewe gegee het en vra God om jou te vergewe. Daar aan die voet van die kruis, moet jy net weer sensitief wees vir die stem van die Heilige Gees in jou. Vra dat Hy jou bewus maak van enigiets wat jy nog nie bely het nie. En soos jy dan daarvan bewus word, doen daarmee wat die Here daar in 1 Joh. 1:9 sê: “Maar as ons ons sondes bely-Hy is getrou en regverdig, Hy vergewe ons ons sondes en reinig ons van alle ongeregtigheid. As ons beweer dat ons nie gesondig het nie, maak ons Hom tot leuenaar en is sy woord nie in ons nie.” Volgende keer gesels ek met jou verder hieroor. |
Die week wat die geskiedenis verander het (Die nuutste weergawe)
Hierdie is die nuutste weergawe van hierdie belangrike artikel wat ek oor daardie lewensbelangrike gebeure van daardie week, van die Sondag voor die Opstanding van Jesus, tot en met Sy Opstanding op daardie Eerste Dag van die week, wat dus die volgende Sondag in daardie week sou wees, gebeur het.
Wat die datering van die gebeure volgens die Joodse Kalender betref, is my datering van hierdie gebeure presies dieselfde as in my vorige artikels. Maar let daarop dat my nuutste datering volgens die Gregoriese kalender wat ons vandag volg, ietwat verskil van my vorige berekeninge in die verband.
Kom ons sit net eers ʼn paar vaste punte vanuit die Skrif en spesifiek uit die Evangelies en ander Nuwe Testamentiese boeke oor hierdie gebeure hier neer.
- Op 14 Nissan moes die lam vir die PASGA (“pesach” in Hebreeus) geslag word (Eks. 12:6). Dit moet dan voorberei word om daardie selfde aand, dus op 15 Nissan, wat van 18h00 tot 18h00, ons tyd, gereken word, saam met die res van die PASGA-ete geëet word. (Kyk Eks. 12:8).
- Hierdie gebeure is, volgens die Ou Testamentiese Tora-wetgewing, voorafgegaan deur ʼn reeks gebeure in die verband. Soos die gebeure op die 10de Nissan, (vier dae voor die tyd dus), wat ʼn lam sonder gebrek, gekies en eenkant gesit moes word om as Paaslam geslag te word.
- Die dag van die PASGA-ete self word, volgens die TORA-wetgewing, as ʼn SABBAT gereken, ongeag op watter dag dit sou plaasvind. (Kyk Eks. 12 en Eks. 23:4-8)
- Vanuit die Evangelies en ander Nuwe Testamentiese gedeeltes weet ons die volgende gegewens: Jesus word in verskeie gedeeltes die Lam genoem. (Kyk bv., Joh. 1:29,36; 1 Pet. 1:19; Op. 5:6,8,12,13;6:1,9,12,16; 7:9,10,14,17; 8:1; 12:11; 13:8; 14:1,4; 15:3; 17:14; 19:7,9; 21:9,14,22,23,27; 22:1,3)
- Uit die Evangelie-vertellinge weet ons dat Jesus op die dag van Sy kruisiging, 15h00, gesterf het. Omdat die volgende dag as ʼn Sabbat gereken is (want die eerste dag van die Pesach-fees, met sy ete daardie aand, is ook as ʼn heilige dag gereken), moes Sy Liggaam daardie middag nog van die kruis verwyder word en moes Hy begrawe word in die graf wat Josef van Armitea beskikbaar gestel het.
- Dan weet ons ook dat Jesus self geprofeteer het, op grond van Ou Testamentiese profesieë oor die Messias, dat Hy drie dae en drie nagte in die graf (of letterlik “ín die binneste/hart van die aarde”) sal wees. (Kyk Mat.12:40; 27:63; Mark. 8:31; 9:31; 10:34; Joh.2:19)
- Ons weet ook dat die vroue op die eerste dag van die week, met ander woorde die Sondagoggend, nadat die kruisigingsgebeure verby was en die Liggaam van Jesus reeds vir drie dae in die graf was, en nadat die gewone Sabbat verby was na die graf toe gegaan het. (Kyk bv., Luk. 24:1)
Inleidend
Die meeste Christengelowiges herdenk die kruisigingsgebeure gewoonlik op die Vrydag, wat hulle dan vir die rede “Goeie Vrydag” noem, wat dan gevolg sou word deur die viering van die opstanding van Jesus op die Sondag as eerste dag van die week.
Die rede vir die viering van die Kruisiging van Jesus op ʼn Vrydag, is omdat daar in Lukas 23:24 die volgende staan: “En dit was die dag van voorbereiding, en die Sabbat wou aanbreek.” (Party vertalings, soos die 1983-Afrikaanse Vertaling het daarom ook hierdie vers so geïnterpreteer en gevolglik so vertaal: “Dit was Vrydag, en die Sabbat het al begin aanbreek.”)
Alhoewel ʼn mens dus verstaan waarom baie Christene oor die wêreld die kruisiging-gebeure as ʼn “Goeie Vrydag” -gebeure vier, is dit baie duidelik uit die feite van die gebeure dat die kruisiging in werklikheid reeds die Woensdag gebeur het.
ʼn Mens kan wel sê dat dit tog gaan oor ʼn viering van hierdie gebeure en dat dit vir volgelinge van Jesus oor die wêreld maar net weer die geleentheid en voorreg bied om saam met ander familielede en ander Christengelowiges stil te word rondom ʼn week se gebeure in Jesus se lewe wat elkeen van ons se lewens verander het.
Maar ek verskil tog hiervan en het met die skrywe van hierdie artikel juis probeer aantoon waarom die presiesheid rondom wat presies en wanneer presies hierdie gebeure afgespeel het, belangrik is omdat dit handel oor historiese gebeure wat die totale geskiedenis van die hele wêreld verander het. As ons nie eers oor sulke gebeure vir onsself behoorlik rekenskap kan gee oor die werklike feite van die gebeure nie, hoe kan ons met geloofwaardigheid daaroor getuig teenoor ʼn verlore, maar baie kritiese en siniese wêreld, wat al klaar wonder oor en of daar geloofwaardige gronde is vir die Bybelse boodskap en spesifiek dit wat oor Jesus gesê en getuig word.
Daarom wil ek dan in hierdie artikel elke leser geleentheid bied om te mediteer oor die detail van die historiese gebeure van elke dag van hierdie lewensbelangrike week.
Mag die lewende God self, deur die werking van Sy Gees, hierdie waarhede gebruik om elkeen opnuut aan te raak en vry te maak.
Die waarheid alleen maak immers ons vry!
DAARDIE WEEK SE GEBEURE DAARDIE JAAR WAARIN DIE EERSTE DAG VAN PESACH OP 15 NISSAN NIE OP ʼn GEWONE SABBAT GEVAL HET NIE
DIE SONDAG
Voor ek met jou gesels oor daardie Woensdag se gebeure, kom ons begin in ons nadenke reeds by die Sondag se gebeure. Palmsondag, noem die kerklike wêreld wêreldwyd dit.
Dit was die dag waarvan Lukas 19 en Johannes 12:12 en verder, ons vertel. Dit was die dag toe Jesus Jerusalem, die stad van koning Dawid, binnegery het op ʼn donkie.
Soos voor ʼn koning van destyds, het die skare klere en palmtakke voor Hom neergegooi om aan Hom eer te betoon as die Koning uit die geslag van Dawid. Alles presies soos die profesieë in Sag. 9:9 en Dan. 9:25 – 27 eeue tevore voorspel het sou gebeur.
Volgens Eksodus 12 moes die lam vir die Pasga wat later die week gevier sou word, gekies word op die tiende van die eerste maand van die Joodse Jaar, die maand, Nissan.
Volgens die gebruik in Jesus se tyd, was alleenlik lammetjies wat van die Bethlehem-area kom, geskik geag om as ’n lam vir die Pasga-viering te dien. Daarom gedurende daardie week waarin die Pesach gevier is, op daardie spesifieke Sondag, is ’n lam wat gebore is in die Bethlehem-distrik, gekies en in Jerusalem ingebring van die Olyfberg se kant af, deur die Skaappoort.
Dit sou presies dieselfde pad wees wat Jesus in daardie week op die betrokke Sondag Jerusalem binnegekom het op Sy triomftog. (Kyk Mat. 21:1 e.v.; Mark. 11:1-11; Luk. 19:28-38; Joh. 12:12-19)
Soos wat Hy ingekom het, het die mense geskreeu: Geseënd is Hy wat kom in die Naam van die Here! Red ons, Seun van Dawid!
So is Jesus uit Nasaret met groot akklamasie aangewys as die langverwagte Messias van Israel en het die skare hulle Lam vir die Pasga gekies!
Hierdie lam moes egter eers deur die geestelike leiers ondersoek word, want – leer die Torah – dit moes ʼn lam sonder gebrek en vlekloos wees om geskik te wees om as lam vir die Pasga geslag te word.
Daarom lees ons hoe Jesus, na Sy intog in Jerusalem in, eers na die tempel toe gegaan het om daar te leer. (Kyk na gedeeltes hieroor, soos Mat. 21:23 e.v.; Mark. 11:27-33; Luk. 20:1-8)
Terwyl Hy daar was, het die Fariseërs, Sadduseërs en ander wetsgeleerdes gekom en met allerhande moeilike vrae Hom probeer uitvang om Hom as ’n leuenaar te probeer uitwys. Maar hulle kon geen fout by Hom vind nie.
Die datering van hierdie gebeure
Laat ek dadelik hier eerlik bely dat dit baie moeilik is om hierdie gebeure, wat aanvanklik volgens die Joodse Maan-kalender gedateer is, nou volgens ons kalender, wat as die Gregoriese kalender bekend staan, presies en korrek te dateer.
Die rede hiervoor is dat omdat die Gregoriese kalender (wat sedert 1582 gevolg word en wat gebaseer is op die beweging van die son), baie streng reëls het en dus maklik aangepas en bereken kan word Daarteenoor het die Joodse Rabbi’s, wat die Joodse Feeste se datering elke jaar volgens die 28 dae-siklus van die Maan bepaal het, soms hulle eie reëls en voorkeure gebruik om te bereken wanneer ʼn bepaalde fees, soos die Pesach, wat as ʼn Sabbat gevier moes word, kon gebeur in ʼn betrokke jaar. Verder, om dinge nog meer ingewikkeld te maak, kon van hierdie feeste volgens sommige kringe onder die Joodse Rabbi’s, nie op ʼn Maandag, of ʼn Woensdag, of ʼn Vrydag gevier word nie, maar wel net op ʼn Sondag, ʼn Dinsdag, ʼn Donderdag, of ʼn Saterdag.
Kom ons probeer tog om volgens die beste navorsing en berekeninge, ʼn datum aan hierdie gebeure op daardie sogenaamde Palm-Sondag te gee.
As ons begin by ʼn datering waarin die Pesach-ete op die Eerste Dag van die Pesach-vieringe op ʼn Donderdag plaasgevind het, dan was dit in die jaar 30 n.C.
15 Nissan van daardie jaar, 30 n.C., het dan op 3-4 April 30 n.C. geval. (Onthou die Joodse Donderdag het reeds op die Woensdagaand, 18h00 begin!)
Dan het hierdie besondere Palm-Sondag op 31 Maart-1 April 30 n.C. geval.
DIE MAANDAG
Die betrokke Maandag van die week waarin die Pasga gevier moes word, moes elke vorm van gis, as simbool van kwaad en sonde, uit elke huis verwyder word volgens die instruksies van die Torah. Daarom het elke Joodse moeder met ’n kers in haar huis rondgesoek vir enige vorm daarvan op hierdie dag.
Daarom het Jesus juis daardie Maandag na die tempel as huis van God gegaan en toe al die geldwisselaars daar uitgejaag (Luk. 19:45 e.v.).
DIE DINSDAGAAND
Omdat Jesus en sy dissipels nie daardie betrokke jaar in Jerusalem self was nie maar in Betanië, ’n klein dorpie net buite Jerusalem, was dit toelaatbaar dat hulle daar ’n dag vooraf, die voorbereiding kon doen en die Pasga-maal kon vier. (Lukas 22:14 e.v.; Matteus 26:17-35; en Johannes 13:36-38 vertel ons daarvan).
Later daardie aand word Jesus gevange geneem in die tuin van Getsemane, wat lê op die pad van Betanië na Jerusalem toe (Mat. 26:36-46; Luk. 22:39-53).
DAARDIE WEEK HET TWEE SABBATTE GEHAD
Omdat dit baie belangrik is vir ʼn korrekte datering en verstaan van die gebeure van hierdie belangrike week, wil ek net weer hier herhaal dat die week waarin die Pasga gevier is, soms twee Sabbatte kon hê as die Pasga êrens in die middel van die week val.
Die jaar 30 n.C., volgens die Joodse kalender, was juis so ʼn jaar. Daarom vind ons dan dat hulle in so ʼn week die Eerste dag van die Fees van Ongesuurde brood, waarop die Pasga-ete die aand gevier is, volgens die Joodse feeskalender, as ʼn Sabbat gereken sou word. Later die week word die gewone Sabbat dan op die sewende dag van die week soos gewoonlik gevier.
Soos ek gesê het, die week toe Jesus gekruisig is, was dit juis so.
Kom ek begin om in die lig hiervan vir jou die res van die gebeure daardie week kronologies te plaas.
DIE WOENSDAGOGGEND OM 06H00
Volgens die Joodse kalender daardie betrokke jaar (30 n.C.), moes die “dag van voorbereiding”, met die oog op die Pasga-maal wat later daardie aand sou volg, op daardie Woensdag plaasvind.
Jesus, ons volmaakte Pasga-lam sonder gebrek, moes voorberei word om geslag te word en te sterf in ons plek.
Alles gebeur daardie Woensdagoggend reeds om 06h00 toe Jesus deur Pilatus verhoor en gevonnis is. (Joh. 19:13-16)
DIE WOENSDAGOGGEND OM 09H00
Gelyktydig met die gebeure in die tempel daar in Jerusalem, toe die Hoëpriester die gekose lam vir die betrokke Pasga vasgemaak het aan die horings van die altaar, op die veertiende dag van die Joodse maand, Nissan, word Jesus op Golgota om 09h00 daardie oggend, vasgespyker aan ʼn kruis.
Volgens ons Gregoriese datering word Jesus dus gekruisig op Woensdag, 3 April 30 n.C., of 14 Nissan daardie jaar volgens die Maan-kalender van die Jode.
15H00, DAARDIE WOENSDAGMIDDAG
Na ʼn skielike sonsverduistering van drie ure van 12h00 daardie middag af, gelyktydig met die tyd wat die lam in die tempel keelaf gesny en geslag moes word (volgens Eksodus 12:6), sterf Jesus 15h00 daardie Woensdagmiddag (Mat. 27:45 e.v.) Na drie ure van “hel” kon Hy sê: “Dit is volbring”, en kon Hy Sy asem finaal uitblaas.
Alles wat nodig was om te gebeur om sondevergiffenis moontlik te maak, was gedaan. Die oorwinning is behaal en daarom kon Jesus met vrede Sy lewe oorgee aan die Vader.
Nou kan ek en jy in geloof met vrymoedigheid en sekerheid sê: Ek is deur die Bloed van die Lam uit die hande van die vyand verlos!
Maar selfs baie meer as dit het daardie oomblik gebeur.
Matteus vertel ons daarvan in hoofstuk 27 vers 51 en verder.
Dit was asof God die Vader uit die hemel die mense van destyds wou help om te verstaan dat wat hier gebeur het, van kardinale belang was. Ja, dat die geskiedenis van die wêreld werklik met hierdie gebeure verander het!
Om die kollig voluit te laat val op presies wat op daardie oomblik gebeur het, neem God met Sy eie hande die Heiligste van heilige voorwerpe vir die Jood van destyds, naamlik die dik gordyn wat die Heilige gedeelte van die tempel, van die Allerheiligste in die tempel geskei.
Ja, God het dit letterlik van bo na onder geskeur! Daardie selfde gordyn waardeur die hoëpriester net eenmaal per jaar kon stap na die Allerheiligste-gedeelte toe, was skielik net weg en skielik was daar geen skeiding meer oor tussen die Heilige en die Allerheiligste nie, waar God in Sy heilige teenwoordigheid self gesit en wag het om met Sy mense te praat.
Daarom kan die Hebreërbrief praat oor hierdie vrymoedigheid waarmee elke gelowige nou na hierdie gebeure, self kon verskyn in die Heilige God se teenwoordigheid. (Kyk Heb. 10:19)
Om verder te beklemtoon wat hier gebeur het, gebruik God as’t ware alles wat Hy het om die gemeenskap vir weke en jare aan die praat te hou oor hierdie gebeure.
Skielik was daar ʼn aardbewing en grafte het oopgegaan. Mense wat die afgelope tyd gesterf en begrawe is, het skielik lewend uit die grafte gekom en het in die strate van Jerusalem begin rondstap vir almal om te sien en om mee te gesels!
Dit was asof God net hiermee wou sê: Hierdie is ʼn totaal nuwe begin! Die ou verbond met al sy dinge was verby. ʼn Nuwe verhouding met My is nou moontlik. Alles waaraan die Ou Verbond, met al sy feeste en wette, julle wou herinner en soos padwysers julle na My toe wou lei, is nou alles hier!
Al hierdie dinge uit die Ou Verbond, het sy doel gedien. Voortaan sou die wette net dien om ongelowiges te oortuig dat hulle sondaars en totaal verlore is!
Ja, dit sou hulle finaal herinner daaraan dat Jesus Christus gekom het as die Messias en Lam van God, wat juis hierdie week moes sterf soos die Paaslam al die vorige jare.
VROEGAAND, VOOR 18H00 DAARDIE WOENSDAG
Met die Pasga-viering wat na 18h00 moes plaasvind en die Sabbatsrus wat voorlê, moes die gelowige volgelinge van Jesus Sy liggaam van die kruis afhaal en gaan neerlê in die graf wat Josef van Arimatea daarvoor geskenk het.
Markus 15:42 en verder vertel ons daarvan.
(Moenie verlei word deur die Nuwe Afrikaanse vertaling van: “Dit was Vrydag”, nie. Dit staan nie in die Grieks nie. Gaan lees maar in die 1953-Afrikaanse vertaling of in die NIV wat presies in die oorspronklike Grieks staan).
DRIE DAE IN DIE GRAF
Volgens die Skrif en die profesieë, sou Jesus drie dae en drie nagte in die graf wees.
Hy was dus daardie spesiale Sabbat (of eerste dag van die “fees van die ongesuurde brood”) daar, wat gestrek het van die Woensdagaand 18:00 tot Donderdagaand 18:00; gevolg deur die Vrydag (wat gestrek het van die Donderdagaand 18h00 tot die Vrydagaand 18h00); en dan ook vir die normale Joodse Sabbat (van die Vrydagaand 18:00 tot die Saterdagaand 18:00).
HY HET OPGESTAAN
Vroeg daardie Saterdagaand, na 18:00, met die aanbreek van die Joodse Eerste dag van die week, staan Jesus uit die dood op na drie dae in die graf.
Presies hoe laat dit was, weet ons nie, want dit word nie vir ons gesê nie.
Jesus het immers self profeties verklaar dat Hy gekruisig gaan word, gaan sterf, en vir drie dae in die graf gaan wees en dan weer gaan opstaan.
So kom talle ander profetiese gedeeltes ook hiermee in vervulling, naamlik Hos. 6:1,2; en die teken van Jona (Mat. 12:40).
Daardie Saterdagaand het die priester, volgens die Joodse feeskalender, ook die “Eersteling-gerf” van die oes voor God gewuif om so die nuwe oes aan God te wy (Lev. 23:10-11).
Daarom word die Opgestane Jesus ook die “Eersteling’ daar in 1 Kor. 15:20-23 genoem.
VROEG DIE SONDAGMÔRE
Vroeg daardie Sondagmôre, 7 April 30 n.C., ontdek Maria Magdalena en die ander Maria, en later ook van die ander dissipels, dat Jesus Christus opgestaan het soos Hyself gesê het gaan gebeur (Mat. 28:1 e.v.).
Daarom kan ons saam met die gelowiges oor die eeue sê: Halleluja, ons dien waarlik ’n lewende Here! (1 Kor. 15). Jesus Christus het werklik opgestaan en Hy lewe.
Anders as alle figure wat in ander godsdienste aanbid word, dien ons ʼn Lewende, Opgestane Here.
As Hy nie werklik opgestaan het nie, was ons geloof as Christengelowiges tevergeefs. (Lees 1 Kor. 15 hieroor)
SKIELIK WORD DIT DIE WEEK WAT DIE GESKIEDENIS VAN DIE WÊRELD VERANDER HET
Wie stil staan by die realiteite van hierdie week se gebeure, kan nie anders as om vir die eerste keer, of by hernuwing, oor Jesus en wie Hy werklik was, na te dink nie.
Wie was Jesus van Nasaret werklik? Was Hy net ʼn doodgewone mens wat van 11 September 3 v.C. tot 4 April 30 n.C. gelewe het?
Wat dan van al die merkwaardige dinge wat Hy gesê het en wat Hy gedoen het?
Wat van die feit dat alles wat Hy selfs oor Sy dood gesê het, presies so gebeur het?
Hy het selfs gesê dat Hy na drie dae sou opstaan uit die dood!
Kon Hy dan net ʼn buitengewone goeie mens òf net ʼn profeet wees, soos sommige Hom wil beskryf? Dit kan mos nie wees as die gebeure werklik so gebeur het soos ek jou vertel het nie.
En as Hy nie werklik uit die dood opgestaan het nie, was Hy ʼn leuenaar en kon Hy nie werklik ʼn ware profeet wees nie.
Wat boonop nog van die feit dat Hy aanspraak daarop gemaak het dat Hy God is wat mens geword het!
Wie werklik hiermee erns maak en eerlik wil wees in die lig van die feite, kan nie net sê dat Hy net nog ʼn buitengewone goeie man of profeet was nie.
Óf Hy was die grootste leuenaar en psigopaat wat nog ooit geleef het, óf Hy was wie Hy gesê het Hy is! Naamlik God wat mens kom word het, om ons finaal te verlos.
Ja, dan was Jesus van Nasaret werklik die Verlosser wat gekom het sodat elkeen wat in Hom glo, lewe kan hê en dit in oorvloed!
My en Hetta se gebed vir jou en jou geliefdes – Brief aan FAMILIE VAN FAMILIES MAART 2023
|
Die Here se belofte aan julle is dit wat daar in Fil. 4:19 staan: "En my God sal in elke behoefte van julle ryklik voorsien volgens sy wonderbaarlike rykdom in Christus Jesus." Ek weet dat jy en jou geliefdes heelwaarskynlik in hierdie tyd voor die Here sit met ernstige behoeftes en uitdagings. Soos ek en Hetta ook. Maar in die lig van God se beloftes, verwag ek saam met jou vir die oorvloedige voorsiening en seën wat die Here aan ons belowe het, totdat ons die deurbrake beleef wat nodig is. Ja, dit is ’n tyd hierdie waarin ons moet hande vat en saam bid en God bly herinner aan Sy beloftes aan ons totdat daardie deurbrake kom. Daar aan Sy voete moet ons aanhou om die Here te loof en te prys, en dankie te sê vir die ander 90 en meer glase in ons lewe wat alreeds tot oorlopens toe vol is deur God se genade. Bid ook saam dat ons nie ons vreugde en vrede sal verloor oor die een of twee glase in ons lewe wat dalk nog halfleeg of bykans leeg is nie. Want ons weet in geloof dat die deurbrake voor die deur is. Ja, want ons is immers in een van daardie GRAND FINALE-seisoene waarin ons God kan vertrou vir dit wat ons nodig het om te saai sodat Sy Koninkryk kan kom en kan deurbreek ook daar waar elkeen van ons ons bevind en daar waar God ons voor geroep het. Daarom gaan ons nie opgee of hoop verloor nie. Ons kies om te glo dat ons tot alles in staat is deur Christus wat vir ons die krag gee. Daarom bring ons al ons behoeftes met gebed en smeking en met danksegging voor die Here, en verwag ons om oorval te word met daardie vrede wat alle verstand te bowe sal gaan, want dit gaan nie logies sin maak nie. (Soos Fil. 4:6 e.v. immers belowe). Soos Ef. 2:7 sê, vertrou ons die Here hiervoor: “... sodat God ook in die tye wat kom, sou laat sien hoe geweldig groot sy genade is deur die goedheid wat Hy in Christus Jesus aan ons bewys het.” Ons vertrou die Here om Sy onmeetbare genade, liefde en guns in ons lewe en deur ons in Christus Jesus uit te giet. Hy is immers lief vir ons en sal ons nooit in die steek laat nie! Hy veg vir ons! Dit is mos wat Hy self daar in Jes. 49:25,26 aan ons belowe as daar staan: “Ek is ‘n vyand van jou vyand en Ek sal jou kinders red. Ek sal jou verdrukkers hulle eie vleis laat eet, hulle sal van hulle eie bloed so dronk word soos van wyn. Dan sal al wat leef, besef dat Ek die Here is, jou Redder en jou Verlosser, die magtige God van Jakob.” Daarom stuur die Here engele selfs om vir en namens ons te veg vir daardie deurbrake waarvoor ons Hom vertrou. (Onthou jy die visioen-droom wat Jakob daar in die woestyn, in Gen. 28 gehad het oor die engele wat op en af teen die leer klim? Dit is onder andere wat hulle hier op aarde moet kom doen! Sien dit gebeur in jou lewe, daar waar jy die Here vir deurbrake voor vertrou!) Ons verantwoordelikheid hierin is om in gebed daar waar ons alleen is, en daar waar ons saam met ander gelowiges is, hieroor saam te stem in Jesus se Naam. (Joh. 14:12-14). Vra ook sommer die Here om, soos Hy aan ons belowe daar in Rom.8:28, daardie dinge wat die vyand wou gebruik om ons mee te vernietig, of by ons te steel, of selfs ons dood te maak, om te draai en te verander in seën in ons lewens. Dit staan ook in Gen. 50:20. “Julle wou my kwaad aandoen, maar God wou daarmee goed doen: Hy het gesorg dat ‘n groot volk nou in die lewe gebly het.” Ja, daarom wil ek jou en jou geliefdes vandag, op 23 Maart 2023, bemoedig en op grond van God se Woord belowe: God gaan ons red en ons gaan inderdaad reuse deurbrake en verandering sien en beleef! Deut. 7:12-15 Hy sal jou liefhê, Hy sal jou voorspoedig maak en jou ‘n groot volk maak. Hy sal jou nageslag voorspoedig maak en Hy sal jou grond ‘n ryk oes laat lewer: volop koring, wyn en olie. Hy sal jou grootvee en jou kleinvee vinnig laat aanteel. Dit alles sal Hy doen in die land wat Hy met ‘n eed aan jou voorvaders beloof het om vir jou te gee. Dit sal met jou beter gaan as met al die volke. Nie een van jou mense of jou vee sal onvrugbaar wees nie. Die Here sal elke soort siekte van jou af weghou.” Vra die Here dus met vrymoedigheid om jou met oorvloed te seën, sodat jy ook weer ander oorvloediglik kan seën. Daarom kan jy sit en wag vir daardie reuse veranderinge om van vandag af plaas te vind. Maar nie net op geestelike gebied nie, maar veral ook finansieel en in die ander areas van jou lewe waar jy die Here voor vertrou. Onthou, ons Here belowe dat Hy klaar maak wat Hy begin het. (Lees maar Fil. 1:6). Staan op hierdie vers, want die God wat dit aan ons belowe het, kan nie lieg nie, en sal doen wat Hy belowe het. En omdat jy Hom daarvoor vertrou in jou lewe, staan op en gaan doen in liefde en gehoorsaamheid wat Hy jou beveel het om ook in ander se lewens te gaan doen! En daar waar jy nie presies weet wat God wil hê jy moet doen nie, gaan vra vir Hom daarna uit. Jer. 29:11-14 Dan sal julle My aanroep, tot My kom bid, en Ek sal julle gebede verhoor. Julle sal My ontmoet, sê die Here”. Sien daarom alreeds van vandag af hoe God die hemele bo jou en jou geliefdes ooptrek en hoe Sy liefde en seën op julle begin reën! Kom ons stem hieroor met mekaar saam in Jesus se Naam. Mag Hy jou seën. Lief vir julle. Christo en Hetta Ons BankbesonderhedeHier is ons bankbesonderhede vir wanneer julle besluit om ook in ons lewens en bediening te gee: C A Nel C A Nel (Vir die wat dit nodig het, ek het ook ʼn PAYPAL-rekening, This email address is being protected from spambots. You need JavaScript enabled to view it. , wat julle kan gebruik.) |
Kom op daardie plek deur die boodskap van die kruis (deel 1)
|
My vrae aan jou is: Hoe ontwikkel ek as volgeling van Jesus daardie “dik bene” wat my kan orent hou? Wat help my om balans te handhaaf wanneer die popo die fan tref en alles wil uitmekaar val? Of, aan die ander kant, wanneer die Here die sluise van die hemel op my, my huwelik, my gesin, my besigheid en my boerdery ooptrek? Die Gees van God teken hierdie proses van verandering op baie maniere. Gaan lees maar gedeeltes soos Rom. 12:1,2; of die tyd van beproewing waarvan 1 Pet. 1:6-9 praat; of dat ons moet deel kry aan die lyding van Christus; of as ons deur daardie Getsemane-tye gaan waar ons alleen voor God worstel, en uiteindelik ons kruis toe neem om daar te gaan sterf, voordat daar ook ʼn dag van opstanding in ons lewe kan volg. Die gedeelte wat ek gekies het om met jou hieroor te praat is dit wat daar in Gal. 2:19 en 20 staan. Gal. 2:19,20“… ek is saam met Christus gekruisig, en nou is dit nie meer ek wat lewe nie, maar Christus wat in my lewe. Die lewe wat ek nou nog hier lewe, leef ek in die geloof in die Seun van God wat sy liefde vir my bewys het deur sy lewe vir my af te lê.” Ek hoor in hierdie verse God sê dat enige verandering en transformasie wat in my lewe as gelowige volgeling van Jesus moet plaasvind altyd aan die voet van die Kruis begin gebeur. Stap 1 – Daar ontdek ek weer hoe Jesus daardie dag, die 9de April 32 na Christus, ook vir my en my sondes gekruisig is. Die 9de April 32 na Christus, was daardie jaar ʼn Woensdag, en dit was die Woensdag voor die Joodse Pasga wat daardie Woensdagaand 18h00 tot die Donderdagaand 18H00 gevier sou word. Daar aan die voet van die kruis moet ek myself herinner dat Jesus daar gehang, gely en gesterf het vir my, vir my lewe en vir my sondes, om so die straf wat ek eintlik moes dra, vir en namens my te dra. Sodat die Heilige God en Vader, wat ook ’n regverdige God en Regter is, my genadig kan wees en my sonde kan vergewe en my vry kan speek. Dit is wat gebeur het daardie eerste dag wat ek tot bekering gekom en Jesus aangeneem het in geloof as Verlosser en Here. Daar is ek vrygespreek en vergewe. Daar is ek verlos uit die mag van die vyand wat my al die jare gevange gehou het. Daardie dag het God my aangeneem as Sy kind en het Hy my Vader geword. Jesus self het deur die Heilige Gees in my kom woon, sodat ek nooit weer alleen sou wees nie, maar ook om die werk wat Hy in my lewe begin doen het, klaar te maak tot die einde van my lewe hier op aarde. |
Om werklik “wealth” te kan hanteer en dra, vra dik bene!
|
God het niks daarteen dat mense “ryk” is, of baie geld het, of dat hulle “wealthy” is (soos die Engels sê vir mense wat welgesteld is en baie eiendom en ander waardevolle besittings besit nie). Omdat om baie geld en goed te besit, vir so baie mense ʼn ding word in hulle lewe, en te belangrik word en selfs dit word waarop hulle hul sekuriteit en geloof plaas, lees ons bv., die volgende: Matthew 6:24 (ESV) - “No one can serve two masters, for either he will hate the one and love the other, or he will be devoted to the one and despise the other. You cannot serve God and money.” Hebrews 13:5 – “Keep your life free from love of money, and be content with what you have, for he has said, “I will never leave you nor forsake you.” Dit is nie sommer enige mens wat hierdie tipe “wealth” waarvan ons hier praat, waarmee God Sy mense baie keer seën wanneer hulle gehoorsaam in die markplein alles doen wat Hy hulle geleer het nie! Om daardie hoeveelheid “wealth” te bestuur en elke dag met groot verantwoordelikheid te kan hanteer, vra dik bene! Vra ʼn bepaalde karakter en ingesteldheid. Jy hoef maar net ʼn slag rond te kyk om oral in die besigheidswêreld ook die mense te sien wat net nie die stres en daaglikse verantwoordelikheid van rykdom en ‘’wealth” kon hanteer nie. Hulle gesondheid gee net in, of hulle verval in die een of ander uiterste, van of totaal uitspattig en spandabelrig alles begin spandeer asof dit nie ʼn einde kan hê nie, of weer aan die anderkant, verander hulle in hierdie absurd suinige, amper kluisenaars, wat nie eers een sent onnodig wil uitgee nie. O, hoeveel tragiese stories het nie al op die agterblad van koerante verskyn van Christen-gelowiges wat suksesvol in besigheid was, wat net nie die druk en verantwoordelikheid daarvan kon hanteer nie. Of wat maar net weer, gierig en selfgerig, begin soek het na maniere om net nog meer en meer in te palm. Natuurlik is daar niks uiteraard verkeerd om ʼn mooi huis of ʼn mooi motor te wil hê nie. Maar die oomblik wat dit alles begin oorheers en jou fokus word, is jy gedoem en het jy maar net nog ʼn slagoffer geword van die liefde vir geld. En dit terwyl God jou juis daarmee geseën het om ander daarmee tot seën te wees. Ja, Hy wou so graag jou gebruik om daarmee ook die koms van Sy Koninkryk te dien. Sien voor jou oë die Dooie See, waar daar net hierdie inlope in is en geen uitlope na buite is nie. So lyk die mens en die besigheid waar alles maar net oor jouself en jou familie begin gaan. Daar is net een van twee maniere om “wealth” te genereer en dit is deur goed of kwaad! Dit is waarom God Adam beveel het om nie van die boom van goed en kwaad te eet nie. Want Hy wou nie hê dat hulle eers weet van kwaad doen en hoe om besigheid deur kwaad te doen, te doen nie. Dit is waarom Hy, die oomblik wat hulle ook daardie manier van doen geken het, Hy hulle onmiddellik uit die tuin gejaag het en ook so die deure toegemaak het vir hulle om werklike “wealth” te genereer. Daarom hoor ons ook hoe Hy die grond toesluit deur te sê: Ek vervloek die grond en jy sal voortaan in die sweet van jou aangesig sukkel en stry net om daaruit te oorleef! Sien en hoor jy? Dit is waar die goeie nuus van die Koninkryk ook hier inpas! Alleen wanneer ek en jy die Koning se manier van goeddoen kies, ook in die besigheidswêreld, dan word Jesus ook die Een wat die vloek op die grond kom verwyder het, en kan jy begin om die lewe en dit in oorvloed, ook daar te belewe! |
God se manier skep altyd lewe en dit in oorvloed
|
Ek wil ʼn bietjie verder praat oor hoe die Here mense begin seën waar hulle die Koninkryk soek deur dinge te doen soos God ons beveel. Lyk vir my daar is net een manier in die ekonomie om “wealth” te ontsluit en dit is om besig te raak en besigheid te doen. Ek glo dit was ook ingesluit in die oorspronklike opdrag van God aan Sy mense daar in die begin in Gen. 1:26-28: “Toe het God gesê: ‘Kom Ons maak die mens as ons verteenwoordiger, ons beeld, sodat hy kan heers oor die vis in die see, die voëls in die lug, die mak diere, die wilde diere en al die diere wat op die aarde kruip.’ God het die mens geskep as sy verteenwoordiger, as beeld van God het Hy die mens geskep, man en vrou het Hy hulle geskep. Toe het God hulle geseën en vir hulle gesê: ‘Wees vrugbaar, word baie, bewoon die aarde en bewerk dit. Heers oor die vis in die see, oor die voëls in die lug, oor al die diere van die aarde, ook oor die diere wat op die aarde kruip.’” Geen hoeveelheid goud of olie kan volhoubaar “wealth” skep of ontsluit nie. Dit is alleen daar waar ons as mens hierdie goud of olie begin gebruik, dit benut en besigheid daarmee doen, wat dit kan begin gebeur. Natuurlik gaan dit dan oor die manier hoe ons die goud, of olie, of wat ook al betrokke, begin gebruik, benut en daarmee besigheid doen. As ons so besigheid doen waar ons al die wins vir ons alleen vat en ons niks vir die partye met wie ons besigheid doen op die tafel laat nie, is die uiteinde altyd armoede. Dit is dan wanneer iemand in die proses benadeel word en waar dit voel asof daar net nie genoeg vir almal betrokke is nie. As ons dit egter regkry om in elke transaksie alles tot voordeel van almal betrokke te doen, deur om te gee vir mekaar en deur bereid te wees om die wins te deel, en ook nog om te sien na die planeet en sy behoeftes om ons, soos wat dit goeie bestuurders van planeet aarde hoort, dan gebeur daar iets merkwaardig. Die mense betrokke beleef dan lewe en seën. Deel van die lewe en seën wat God dan in die proses gee waar dit volgens Sy Woord gebeur, is dat daar ook iets met die mense betrokke begin gebeur: Hulle word in die proses opgebou en bemagtig, in plaas dat hulle verarm soos in die meeste transaksies in die verlede met hulle gebeur het. Die seën en oorvloed wat God gee in antwoord op gehoorsaamheid, is natuurlik ʼn merkwaardige goeie advertensie vir jou besigheid! Daar waar ek en jy besigheid op die Koninkryk se manier doen, soos ons by Jesus geleer het, en daarmee aanhou, begin trek ons nuwe kliënte soos nooit vantevore nie en beleef ons hoe ander besighede in rye begin staan om met ons besigheid te doen. Almal sien immers die vrug en seën wat volg waar volgelinge van Jesus gehoorsaam hulle Koning en Sy styl volg, ook daar in die markplek. Dit volg daarom natuurlik dat hierdie stories oor wat die gevolg was in ons besigheid toe ons dinge begin doen het soos die Here ons aangesê het, deel moet wees van ons verhale na buite toe. Hoe kan dit dan anders? Dit was immers juis die vrug en seën wat gevolg het omdat ons God se manier en die styl van Koning Jesus gevolg het, waarom mense graag met ons wil besigheid doen, en waarom daar sigbare sukses gevolg het. |
Hoe lyk hierdie sukses waarvan ons praat?
|
Verlede keer het ons gesels hoe die Here vir jou ʼn storie van sukses en seën in jou besigheid gaan gee wanneer jy Hom gehoorsaam en Hom dien in jou besigheid. Maar hoe lyk hierdie sukses waarvan ons hier praat? Is dit die tipiese sukses waarvan die sogenaamde “prosperity teaching” praat of is dit iets anders? Vandag gaan ek vir jou ʼn ware verhaal vertel oor hierdie soort sukses waarvan ek praat wat ek hierdie afgelope week uit een van die sakemanne wat ek begelei en voor bid, se eie mond gehoor het. En ja, ek het hom gevra of ek dit maar kan vertel. Dat soms, as deel van die Here se seën in jou lewe, Hy ook daardie moeilike tye, noem hulle maar tye van beproewing, kan gebruik tot ons bes wil, soos Rom. 8:28 so raak dit beskryf. So vertel hierdie sakeman hoe die Here midde so ʼn tyd van uiterse finansiële beproewing, op ʼn dag vir hom hierdie prentjie van ʼn honderd glase op sy tafel wys om iets van Sy seën in sy lewe vir hom te illustreer. Een van die glase, en net een, het die Here gesê, is die finansies en finansiële sukses en groei wat hy in sy lewe en besigheid gaan beleef. Ja, sommige dae gaan daardie glas half wees en sekere tye selfs leeg, maar gedurende daardie tye moet hy hierdie perspektief wat die Here hom gegee het oor die honderd glase, onthou. Dit is in daardie tye, wat die glas half is of dalk leeg is, wat hy as gelowige sakeman moet onthou van die nege-en-negentig ander glase wat heelwaarskynlik vol is, wat ook in sy lewe staan as deel van God se seën en goedheid in sy lewe. Dit is dinge soos sy huwelik met sy vrou, en God se besig-wees met haar. Dan is daar nog God se besig-wees moet hom as man en as besigheidsman. Dit is gedurende daardie tye wat dit dalk swaar gaan finansieel in die besigheid, soos toe hy sy bakkie as bou-kontrakteur moes verkoop om agterstallige skuld te betaal, wat hy moet onthou van die ander nege-en-negentig ander glase wat nog heeltyd vol staan. Soos toe die Here, in ʼn ander glas, vir hom ʼn klein betroubare motor gegee het waarmee hy nou na van sy kliënte toe kan ry. Ja, dit is in daardie tye wat hy moet kyk na die vol glase van elkeen van sy pragtige kinders en die pad wat elkeen van hulle met die Here stap, met hulle lewens waarop hy so trots is. Dan is daar nog die glase vol van die gesondheid wat almal van sy geliefdes beleef, en die heerlike tye saam met hulle. En wat nog te praat van daardie klompie uitgesoekte vriende wat hulle het as gesin, wat so ʼn bron van vreugde en ondersteuning vir hulle as gesin was hierdie afgelope twee jaar tydens CoVid toe dit maar taai gegaan het in die besigheid. Hy vertel o.a. hoe die Here vir hom Fil. 4:6-7 geleer het. “Moet oor niks besorg wees nie, maar maak in alles julle begeertes deur gebed en smeking en met danksegging aan God bekend. En die vrede van God wat alle verstand te bowe gaan, sal oor julle harte en gedagtes die wag hou in Christus Jesus.” Dit is toe dat die Here weer met hom praat oor die glas van finansies en finansiële seën. En Hy herinner hom daaraan dat as deel van Sy seën in daardie tye wat dit swaar gegaan het in hulle finansies, hoe Hy hulle sulke wonderlike dinge geleer het. Soos oor hoe hulle Hom kan vertrou met daardie behoeftes in hulle lewe, ja, die klein en groot dinge. Hy herinner hom hoe Hy hom en sy vrou geleer het van ʼn “G-D boks” wat hulle fisies moes maak vir hulle huis en wat hulle in hulle huis, waar almal dit kan sien, moes sit. In hierdie “G-D boks” kon enigeen in die gesin, wat ʼn behoefte of tekort of bekommernis of versoek gehad het waarmee hulle nie meer raad geweet het nie, dit kon skryf op ʼn papiertjie en in daardie boks kon gooi. Maar as dit eers in die boks gegooi is, moes hulle mekaar herinner daaraan dat jy nie nou hieroor meer mag bekommerd wees nie, en selfs nie meer oor hoef te bid nie, want dit is nou by God, en in Sy hande! Nou vra God net geloof van ons om Hom te vertrou om op Sy tyd daardie bekommernis aan te spreek en in daardie nood te voorsien soos Hy goeddink. En natuurlik, dat Hy soos Fil. 4 sê, daardie vrede sal gee wat ver bo ons verstand of denke is. Toe gaan die Here voort en gesels verder met hom oor daardie glas met die finansies in: Jy kan My ook vertrou om hierdie glas propvol te maak! Ja, tot oorlopens toe vol, sodat dit sal oorloop en sodat jy ander kan seën met die oorloop, alles tot My eer, sê die Here! Dit is wat ons nou doen, vertel die sakeman verder. |
Ons sukses in besigheid kan ons getuienis oor die Koninkryk sigbaar illustreer
|
Elke volgeling van Koning Jesus is ook deur dieselfde Koning Jesus aangestel om ʼn ambassadeur van die Koninkryk van die hemel hier op aarde te wees daar waar die Here jou geposisioneer en geroep het. Dit kan wees dat Hy jou geroep het om Sy ambassadeur te wees as tiener op skool, of as student aan die een of ander Tegnikon, of as onderwyser, of dokter, of sportman of -vrou, ens. In ʼn besondere sin geld dit natuurlik ook vir elke besigheidsman en vrou, en vir elke boer. In Mat.6:33 sê die Koning dit so: “Beywer julle allereers vir die koninkryk van God en vir die wil van God, dan sal Hy julle ook al hierdie dinge gee.” Die Woord van God is propvol beloftes dat waar God se mense dinge doen soos wat God hulle beveel het, gaan ons gehoorsaamheid deur God beantwoord word met Sy seën en Sy “favor”. Daar waar ek en jy prakties dit in besigheid doen en gehoorsaam besigheid doen soos wat ons Koning vir ons gesê het, sal daar duidelike bewyse wees van sukses en seën. Dit is immers wat God beloof in Sy Woord. Natuurlik beteken dit nie dat daar nie ook soms groot moeilikheid en teenstand gaan wees, asook aanslae van die vyand, as jy begin om Jesus as Koning onvoorwaardelik te gehoorsaam nie. Maar daaroor kan ons ʼn ander keer gesels. In hierdie gedeelte wil ek beklemtoon dat hierdie sukses en bewyse van seën in ons besigheid ook vir ons erkenning en respek gaan meebring daar in die markplein. Dit gaan die deure en platforms vir ons gaan oopmaak van waar ons dan kan getuig oor wat die werklike redes vir ons sukses, groei en goeie resultate in ons besigheid was. Dit is wat ons geleenthede gaan gee om ons storie te vertel hoe die goeie nuus van die Koninkryk ons eie lewe en ons besigheid, en die manier hoe ons besigheid doen, radikaal verander het. Dit bied ons die geleenthede om daar in die markplek, in die taal van die markplek, te vertel hoe ons oë oopgegaan het vir wat en hoe Jesus dinge gedoen het in Sy dag hier op aarde. Ja, hoe Hy letterlik lewe en dit in oorvloed midde ʼn wêreld vol nood, lyding en armoede bedien het. Soos Hy self daar in Nasaret net na Sy salwing met die Gees getuig het, gaan dit wat in Jesaja 61 geprofeteer het, letterlik begin gebeur waar Hy is en beweeg. In Jesus se tyd was dit midde ʼn baie destruktiewe Babiloniese kultuur van gierigheid, selfgerigheid, vrees en korrupsie. Ja, selfs midde ʼn gemeenskap waar die tempel en tempelamptenare deel was van hierdie kultuur wat elke lid van die Joodse volk stelselmatig, dag vir dag, geplunder het totdat die grootste meerderheid van hulle in ekstreme armoede gedompel was. Dit is immers wat gebeur waar besigheid, in welke vorm ook al, gedryf word deur gierigheid en selfgerigtheid. Menslike lyding en ekstreme armoede is altyd die gevolg daarvan en lei uiteindelik selfs tot die dood. Vriende, kyk net rondom jou rond! Kyk verby die oppervlakkige tekens van sukses en groei, en begin om raak te sien wat hierdie sogenaamde sukses en groei in werklikheid kos! Begin om die armoede en miljoene werklose en arm mense raak te sien wat dakloos en sonder heenkome agtergelaat is. Begin om al die slagoffers raak te sien wat oral langs die pad uitgeval en omgeval het omdat hulle net doodgewoon deur ʼn wrede ekonomiese sisteem uitgespoeg word omdat daar vir hulle gesê is dat hulle nie meer iets werd is nie. Sien die demoniese ekonomiese dier raak, met die god, Mammon, op sy rug, wat deur die wêreld stap en verwoesting saai oral waar hy gaan, net soos Openbaring vir ons geteken het. Hoe sê die Woord? Satan en sy magte is dag vir dag besig om mense te belieg, te bedrieg, by hulle te steel en hulle dood te maak. Dit is wat gebeur waar Mammon in beheer is. Dit is die wrange vrugte. Dit is waarom die goeie nuus oor ʼn alternatiewe kultuur en ander manier van doen, God se Koninkryks-kultuur en manier van doen, gedryf deur genade en liefde, vrygewendheid en mededeelsaamheid, so noodsaaklik is en ʼn vars bries sal wees in die ekonomie en die markplek. Dit is waarom die goeie nuus oor die Koninkryk die antwoord is waarna die hele wêreld al vir soveel eeue soek. Daar waar besigheid oor mense en hulle behoeftes loop en alles net gaan oor geld en net nog meer geld, sien ons oral rondom ons net stukkende en arm mense. Maar daar waar ons bereid is om vrygewig van die koek op die tafel met almal betrokke te deel, in elke transaksie wat ons doen, begin sien ons hoe almal baat en hoe almal begin vooruit gaan. Dit is wanneer ons mense werklik begin bemagtig en help om te ontwikkel in besigheidsvennote met wie ons ook in die toekoms weer en weer kan besigheid doen. So word sistemiese armoede transaksie na transaksie oorwin en mettertyd gebreek. So ontdek ons tot ons verbasing dat as ons dinge op die manier doen, daar uiteindelik vir almal genoeg is. Hoe het Jesus gesê: Ek het gekom dat julle lewe en dit in oorvloed kan hê! |
Ons getuienis in besigheid
|
Ons het die afgelope tyd aan mekaar iets gewys oor hoe Jesus, baie strategies, midde ʼn gierige, selfgesentreerde ekonomie die goeie nuus oor die Koninkryk van die hemel wat nou hier op aarde deurgebreek het, geïllustreer en verkondig het. Ons het ook begin verstaan waarom die goeie nuus hieroor altyd moet begin met: Bekeer julle! Om midde ʼn markplein wat gedryf word deur gierigheid en selfgerigtheid, Jesus en Sy manier van doen te begin volg, vra ʼn totale hartsverandering, paradigma verskuiwing en radikale ander wyse van besigheid doen. Jesus het ons immers kom leer hoe om op so ʼn manier besigheid te doen waar alles nie net oor geld en meer vir my en my besigheid moet gaan nie. Natuurlik moet besigheid wins maak anders speel ons bankrot. Dit kan egter nie net oor geld en meer geld gaan as ons die Koninkryk van God in die markplek begin soek nie. Nee, dan moet die belange van almal betrokke ook in berekening gebring word. Sodat almal betrokke moet voel dat hulle baat en wen in die transaksie. Dat ons almal deel in die koek op die tafel. Onthou, die Koning van die Koninkryk het immers gesê: “Jy moet die Here jou God liefhê met jou hele hart en met jou hele siel’ en met jou hele verstand. En die tweede, wat hiermee gelyk staan, is: ‘Jy moet jou naaste liefhê soos jouself.’” Met ander woorde, in elke transaksie moet daardie naasteliefde teenoor die ander party in besigheidstransaksie duidelik geïllustreer word. Of dit nou is waar jy die kans het om ʼn bankrot besigheid of boerdery vir ʼn appel en ʼn uit op te tel, en of jy iemand se patent koop wat nog nie ʼn sent tot hier gemaak het nie. Betaal mense sodat hulle met waardigheid kan wegstap en nuut kan oor begin of met iets nuut kan begin. Behandel elke persoon met dieselfde soort genade waarmee jy graag behandel sou word as jy in hulle skoene sou wees. Ja, natuurlik is daar in die gee van Bybelse genade ook ʼn stuk waarheid wat daarmee saam bedien moet word. Maar soos ons reeds in die lewe van Jesus beleef het, genade sal en moet altyd die voorrang en oorheersende element wees. Luister maar net weer na Johannes 1:14 en 16. “Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid.” En, “Uit sy oorvloed het ons almal genade op genade ontvang.” Gaan wees jy daar in die markplek ʼn kanaal in diens van die Koninkryk wat oorvloedige genade, gemeng met waarheid, oral rondom jou bedien! |
Ons moet leer om besigheid te doen op God se manier
|
Ek glo dat God se Gees vir ons strategieë gee oor hoe om besigheid op God se manier daar in ons unieke plaaslike gemeenskap met sy unieke behoeftes en nood te doen. Maar dan as God se “skaap-nasie”, in Mat. 24 en 25 se taal, in diens van die Koninkryk van die hemel hier op aarde! Nie net plaaslik nie, maar ook wyer, ja, selfs wêreldwyd. Wat selfs meer belangrik is as dit, is dat as ons waag om in besigheid of in die boerdery dinge te doen soos wat Koning Jesus ons gewys en geleer het, gaan ons prakties beleef wat God in Sy Woord belowe het. Naamlik, dat wie Hom hierin gehoorsaam volg en dinge doen soos wat Hy hulle beveel het, gaan beleef hoe dit God se seën, voorspoed en groei voor hulle oë alles laat blom soos nog nooit voorheen nie! God belowe dit immers en Hy kan nie lieg nie! Dit gaan juis hierdie sigbare voorspoed, seën en groei in jou besigheid wees wat vir almal in markplek rondom jou ook sigbaar gaan wees en wat juis vir jou en jou besigheid meer invloed en meer impak gaan gee. Dit gaan juis dit wees wat vir jou toegang gaan gee tot deure en vergaderings waar jy ʼn groter verskil kan maak midde al die sosiale, fisiese en ekonomiese nood wat ons elke dag rondom ons sien. Dit gaan immers hierdie seën van God wees (die Engels praat van “favor”), wat groei en meer voorspoed bring in ons besighede en boerderye, wat ander met ander oë na ons gaan laat kyk. Dit is daardie sigbare seën en voorspoed, wat ons as ambassadeurs in die besigheidswêreld, kredietwaardigheid gaan gee en wat vir mense om ons wys dat om Jesus as Koning te volg, en om gelowig te wees ook in die besigheidswêreld, werk! Dit maak dat ons ʼn praktiese, geloofwaardige getuienis kan hê as besigheidsmanne en -vroue teenoor ʼn ongelowige wêreld om ons. Ja, dat ons vir hulle kan sê: So lyk dit as die Koninkryk van God hier op aarde, prakties in die besigheidswêreld, van hierdie wêreld ʼn beter, gesonder, gelukkiger en meer geseënde plek maak vir almal. Want dan kan ons prakties teenoor mense getuig dat om Jesus, Sy opdragte en Sy manier te volg en te gehoorsaam, maak werklik ʼn verskil en is werklik ʼn antwoord op vrae en dilemmas waarvoor die wêreld rondom ons, na al die jare se gesukkel, nog geen oplossing en antwoorde voor gevind het nie. Verstaan mooi, dit is nie ʼn voorspoeds-teologie of boodskap wat ons vir die besigheidswêreld om ons wil bring nie! Nee, dit gaan oor hoe besigheid en die markplek ʼn instrument kan word in diens van die Koninkryk van die hemel om ook hier prakties sigbaar te word. Sodat dit ons geleenthede kan bied om meer invloed en toegang tot platforms te kry, wat ons geleentheid bied om getuies te wees van hoe die boodskap van die Koninkryk van Jesus die sosiale nood en lyding rondom ons meer effektief kan aanspreek en kan bedien. Dit gaan daaroor dat dit ons geleenthede gee om mense te help ontdek dat al die gierigheid en selfgesentreerdheid om ons, ook in die besigheidswêreld, juis die wortel en hoofrede is vir al die lyding, pyn en onreg wat ons daar elke dag sien. So kan ons dan ook teenoor hulle getuig dat ʼn alternatiewe kultuur en ʼn ander manier van besigheid doen, wat gedryf en gemotiveer is deur ware liefdevolle omgee en mededeelsaamheid, selfs in die markplek en ekonomie, alles kan verander, want dit is God se manier van doen, en daarom uiteindelik, die enigste ware oplossing wat gaan werk in die markplek. Net dit kan daar ʼn wêreld te skep wat vir almal van ons en almal rondom ons, ʼn beter, gelukkiger en gesonder plek kan maak om binne-in te kan leef. Dit is dus ʼn holistiese model van kapitalisme wat nie tipies winsgedrewe is nie, maar eerder gedryf en gemotiveer word deur ʼn omgee en mededeelsaamheid, waar drie dinge van gelyke waarde geag word, naamlik dat dit tot voordeel sal wees vir almal betrokke, maar tog ook wins kan genereer, sonder om die planeet rondom ons in die proses skade te berokken of te vernietig. |
More...
Profetiese woord vir 2023 en verder - Deel 4 - 'n Profetiese woord aan die Ekklesia vir nou uit Haggai
Deel 4 - 'n Profetiese woord aan die Ekklesia vir nou uit HaggaiEk wil jou in hierdie laaste van die profetiese woorde net weer herinner aan die tema van hierdie reeks profetiese woorde. Vir daardie rede herhaal ek ook die banier van hierdie reeks hier. In hierdie banier sien jy die twee Hebreeuse letters, Pei, aan die regterkant, en Gimel, aan die linkerkant, wat die jaartal van die Joodse jaar, 5783, in Hebreeus simboliseer. Soos daar op hierdie banier staan, vind in hierdie jaar en volgende jare, ʼn oorlog plaas waarin God besig is in Sy kinders se lewens, en as deel van die Koninkryk wat kom, met ʼn “divine recovery”-proses besig is. Die bedoeling daarvan is om in elkeen van ons se lewens (bedoelende, jou hele lewe, elke aspek en sentimeter van jou lewe, van wie jy is, van jou verhoudinge, jou gesondheid, jou finansies, ens.) nuwe kanale en roetes oop te maak waarin Hy alles wat nodig gaan wees, kan laat instroom in jou lewe in. Sien in jou geestesoë hoe die sluise van die hemel oopgaan waardeur God Sy seën en genade en liefde wil laat instroom in jou lewe in, sodat jy, in Sy diens, weer tot seën vir ander kan wees! Dit is in hierdie konteks en verband wat jy hierdie laaste profetiese woord moet lees en verstaan. Daarom beleef ek dat hierdie deel van die profetiese woord kardinaal belangrik is vir elke ander deel van die profetiese woord oor 2023 en volgende jare. Gaan raak stil aan Sy voete, met net die Bybel as Sy woord op jou skoot, en lees asseblief Haggai 1 en 2. Kyk en toets of jy ook hoor wat ek gehoor het wat God aan my profeties gesê het. Dit is wat ek gehoor het wat God nou wil sê vir elkeen van ons. So sê die Here God! Sien julle nie? Hoor julle nie? Julle is besig met soveel dinge! Of dit nou op die markplein is en of dit in wat julle kerk noem, is! Midde al julle besig-wees, ja, selfs ten spyte van al julle besig-wees, lê My ware Ekklesia, My Liggaam, verflenter en is dit in die sigbare, niks anders as ruïnes nie! Dink maar net daaraan dat in SA alleen, noem mense meer as 30 000 verskillende “kerk”-ruïnes "hulle kerk" en glo hierdie mense dat die deel waar hulle die Here dien en aanbid, “die ware kerk is waar die volle waarheid reg geleer word en waar My Koninkryk besig is om te kom”! Verstaan julle werklik wat julle daarmee sê en bely? Besef julle dat julle bely dat al die ander, die ander 29 999, buiten die “kerk” waarin jy nou is, is dus...??? Vul jy maar self verder die volgende woorde in. Is jy dan nog verbaas daaroor as jy dag en nag swoeg en sweet maar uiteindelik onbevredig en onvergenoegd voel? Ja, dat jy steeds beleef dat daar net nooit genoeg is nie! Ja, dat jy die hele tyd hier diep binne voel dat daar tog meer moet wees as net dit! Kom tot julle sinne en kom sit weer aan My voete om die goeie nuus van My te hoor. My hart is immers om aan julle lewe en dit in oorvloed te gee! Kom laat Ek vir jou wys hoe om die sluise van die hemel oop te trek bokant jou en jou hele lewe! Kom Ek wys vir julle wat moet gebeur as My Koninkryk weer prioriteit bo alles in julle lewens word. Julle in die markplein, kom leer by My hoe om daar in julle besigheid en deur julle boerdery, werklik My Koninkryk te begin soek! Ja, dat dit begin daar in julle begroting en in jou jaarbeplanning en bestuursvergaderinge. Waar julle begin beplan en begin begroot vir wat gedoen en gegee moet word sodat My Koninkryk kan kom. En julle wat voltyds so swoeg en sweet om die derduisende ruïnes wat julle kerk noem, in stand te hou, dominees en pastore, senior leraars van gemeentes, leiers van bedieninge, kom, dat Ek julle 'n nuwe prentjie kan wys van hoe My Ekklesia werklik lyk en moet funksioneer. Kom sit by My voete, met net My Woord op julle skoot, en leer by My hoe om werklik in diens van My koninkryk hier op aarde, daar waar Ek jou geroep het, te doen wat Ek jou vra om te doen. Ek is immers jou Here en Koning! Ek is jou God. Nie die een of ander kerkorde of leer van die een of ander kerklike ruïne of kerk waarvan jy deel is nie. Onthou, Ek seën net gehoorsaamheid aan wat Ek sê, met My oorvloed! Waar julle doen soos Ek sê en wat Ek sê, trek julle dus letterlik die sluise van die hemel bokant julle oop! Dan sal julle, soos Ek belowe het, My oorvloedige seën en guns belewe! Dan sal julle beleef hoe My beloftes ook daar rondom jou en in jou lewe waar word! |
Profetiese woord vir 2023 en verder - Deel 3 - Sien jy dit raak? Sien jy die magtige beweging van God raak
Deel 3 - Sien jy dit raak? Sien jy die magtige beweging van God raakSien jy dit raak? Sien jy die magtige beweging van God raak wat aan die gang is? Luister, Ekklesia van Jesus! God is besig om hier onder ons in Suid-Afrika ʼn magtige ding te doen! Hierdie profetiese woord wat ek gehoor het, is spesifiek oor Suid-Afrika en wat God besig is om nou hier tussen ons te doen. Ja, natuurlik gaan dit ook ʼn impak wêreldwyd hê, want God het dit belowe. Onthou julle die visie wat God my in 1997 op die trein daar êrens tussen Laingsburg en Touwsrivier gegee het? Voor ek weer daardie profetiese woord hier profeties proklameer, wil ek net sê: Ek hoor God sê: Kyk mooi na wat rondom jou, en spesifiek wat hier in Suid-Afrika nou aan die gebeur is! Dit wat Ek destyds aan julle gesê en belowe het, is besig om nou rondom julle hier in Suid-Afrika te gebeur! Ja, Ek weet julle staar julle moedeloos blind teen wat die vyand besig is om rondom julle te doen: die uiters frustrerende beurtkrag, al die geweld, al die misdaad, bedrog, ekonomiese en finansiële uitdagings rondom julle as gevolg van staatstrukture wat gerysmier is van die kern af, ens., ens. Waarom dink julle is hierdie negatiewe, demoniese beweging soos ʼn trein op spoed, juis in hierdie tyd so blatant sigbaar en besig! Want Satan en sy magte sien waarmee God besig is, en wil met alle mag dit strategies kelder of ten minste die voorblaaie so domineer, dat dit al sal wees waaroor die TV en ander media elke dag sensasioneel oor sal berig. Om so julle te belieg, te bedrieg en blind te maak vir waarmee Ek besig is. Bid en vra My vir oë om raak te sien waarmee Ek tussen julle besig is. My visie in 1997Drie jaar na die planting van ’n Afrikaanse vernuwingsgemeente in Potchefstroom, teen die einde van 1995, het ek beleef die Here gee my opdrag om ons storie en die nuwe pad wat God besig was om met ons te stap na Oktober 1993, na ’n veertien jaarlange bediening in die NG Kerk, neer te skryf en te publiseer. So verskyn my eerste boek, WAARHEEN MET DIE NUWE WYN, in 1996. Van die oomblik wat daardie boek verskyn het, is ons uitgenooi oor die land om te kom praat oor dinge wat in die boek staan, want gelowiges wat soos ons uit ’n tradisionele gereformeerde agtergrond uitkom, wou meer weet oor wat die Here besig was om ons te leer wat juis die redes was vir die nuwe gemeente daar in Potchefstroom se fenomenale groei. So is ons in April 1997 uitgenooi om in Ceres te kom bedien daaroor. Die mense wat ons uitgenooi het, het ’n vakansiehuis in Vermont, by Hermanus, gehad en het ons uitgenooi om ’n week daar te kom spandeer voordat ons in Ceres en op hulle plaas moes kom bedien. Hulle het selfs vir ons ’n motor daar in Vermont gelos om mee te ry. Ons besluit toe om ’n familie-vakansie daarvan te maak en om met die trein Kaap toe te kom. Ons het die middag uit Potch vertrek en lekker op die trein geslaap. Vroeg die volgende oggend het ons as gesin gestap na die eetsaal op die trein. My vrou en twee kinders het vooruit gestap en ek agterna. Net voor Touwsrivier – ek sou jare daarna ontdek dat dit was net toe ons die klein treinhalte, Konstabel, verbygery het met die trein – het ek buitentoe gekyk en skielik op die ruit van die treinwa ’n rolprent sien afspeel van ’n herlewing wat plaasvind. Laat ek dadelik sê: Ek sien nie normaalweg allerlei visioene nie. Ek droom nie eers drome wat ek kan onthou nie. Dit was dus totaal teen my normale, baie rasionele aard dié! Ek hoor nou nog die Here sê: Sien jy, dit is herlewing! Ek antwoord toe: Ja, Here! Hy sê toe: Dit is soos die herlewing van 1860-61, in Andrew Murray se tyd! Toe sê die Here: Daar kom weer so ’n herlewing en dit gaan weer in die Kaap begin en rol oor Suid-Afrika, dan Afrika en na die res van die wêreld. Ek sê toe: Here, ek sal U ’n miljoen rand betaal om daar te wees! Waarop Hy dan vir my sê: Jy gaan daar wees, maar dan moet jy, as jy teruggaan Potch toe, alles gaan verkoop en Kaap toe trek, want Ek wil jou nou hier gebruik. Skielik was die visioen weg. In die volgende week het ek en my vrou verskeie kere hieroor gesels, want sedert ons aankoms in Hermanus, is ek bykans 11 keer uitgenooi om verskeie groepe daar te bedien. Toe ek die Here “vriendelik” daarop wys dat ons eintlik daar is met vakansie, het Hy vir my gesê dat dit nie hierdie keer vir my “vakansie” gaan wees nie, want Hy wou my die nood in die omgewing wys om ons te wys hoekom Hy ons hiernatoe roep. Die laaste dag wat ons in Vermont was, voor ons daardie middag om 13h00 sou vertrek Ceres toe, sit ek en my vrou, Hetta, langs die see en gesels oor alles wat ons belewe het die afgelope week. Ek vra haar toe wat vir haar ’n seker teken sou wees dat die Here ons roep Hermanus toe en om alles te gaan verkoop in Potch en dadelik te kom. Sy antwoord my toe: As iemand vanoggend vir ons sou sê, sonder dat ons vir enigiemand vertel wat ons tans beleef, dat as die Here ons hierheen roep, hier is vir ons ’n huis om in te woon, sou dit vir haar ’n seker teken wees! Wel, ons het nog een afspraak in Hermanus gehad voor ons vertrek, waar ’n man ons aan sy vrou wou voorstel. Terwyl ons by hulle sit en tee drink, hou die man skielik op met praat, kyk na ons en sê: Julle ken my nou nie werklik nie, maar hierdie huis behoort aan my, asook die volgende twee huise aan die linkerkant. As die Here julle ooit Hermanus toe roep, kan julle in een van daardie huise kom woon. Wel, na ons terugkoms in Potchefstroom, het ons alles gaan verkoop en na drie weke as gesin Hermanus toe getrek. Ons woon tans dus sedert Mei 1997 in die Wes-Kaap met die verwagting dat ons hier is om die eerste druppels van die grootste herlewing wat die wêreld nog ooit gesien het, te beleef. Ja, want hierdie herlewing wat hier aan die Suidpunt van Afrika gaan begin, gaan oor Afrika versprei, tot in Europa, die Amerikas, Asië en die res van die wêreld. Want God het ʼn wêreld so liefgehad dat Hy Sy eie Seun gegee het, sodat elkeen wat in Hom glo, nie verlore sal gaan nie maar die ewige lewe sal hê. Ek weet nie van jou nie, maar ek is besig om dit die afgelope jare reeds, oral om my te sien gebeur! |
Profetiese woord vir 2023 en verder - Deel 2 - Jesaja 61 – Dit is jou seisoen van restourasie en oestyd!
Deel 2 - Jesaja 61 – Dit is jou seisoen van restourasie en oestyd!Gaan lees net weer ʼn keer Jesaja 61. Lees dit egter hierdie keer as ʼn profetiese woord van die lewende God oor jou en dit wat in en om jou aan die gebeur is in hierdie nuwe seisoen. Hoor hoe die Here vir jou sê en belowe: Dit wat hier staan, doen Ek nou in jou lewe sodat Ek dit wat verder hier staan, in en deur jou kan doen! Ja, dit is ʼn nuwe seisoen hierdie, maar dit is nie sommer net nog ʼn nuwe seisoen soos soveel ander voor hom nie. Nee, hierdie seisoen is ʼn baie beslissende, belangrike seisoen. Waarin dinge beslissend, radikaal gaan verander. Dit is daardie soort oomblik wat hulle in die wetenskap as ʼn “tipping point” beskryf! Waar daardie een ding gaan gebeur, daardie een strooitjie wat die kameel se rug gaan breek, soos die Afrikaanse idioom sou sê. Polities, ekonomies, sosiaal, is dit dwarsoor die wêreld aan die gebeur. Dit is ook, verrassend vir sommige, binne die Liggaam van Jesus, binne-in die Ekklesia, aan die gebeur. Dinge is besig om beslissend, radikaal te verander om nooit weer dieselfde te wees nie. My opdrag is om jou, juis in hierdie tyd, te herinner daaraan dat dit die Seisoen van die Mond hierdie is. Dit is ʼn seisoen waarin ons as Ekklesia, as die Liggaam van die Here Jesus, weer die krag moet ontdek van wanneer ons met ons mond begin proklameer, agterna begin sê en bid, wat die lewende God self in Sy Woord vir ons sê. Dit is ʼn tyd wat ons elke dag self by God se voete moet gaan sit om self uit Sy mond te hoor wat Hy vir ons, nou, op hierdie oomblik in ons lewe, in ʼn bepaalde situasie, oor ʼn bepaalde saak of uitdaging in ons lewe, wil sê. As ons self by Hom gehoor het wat Sy hart is, dan moet ons dit begin na-sê en begin bely met ons mond. Ons moet dit begin bid en dit aanhoudend bid. Totdat dit begin gebeur. Gebed het immers groot krag, soos die Here self daar in Jakobus 5:16 vir ons sê. Hierdie seisoen is ook die Seisoen wat deur die Hebreeuse letter, Gimel, gesimboliseer word. Die prentjie van Gimel is die simbool van die Kameel, wat weer op sy beurt in die Oosterse wêreld seën en oorvloed simboliseer. Sien voor jou oë ʼn ryk man wat agter ʼn arm man aanhardloop om vir hom te oorlaai met genade en seën. So, glo ek, sê die Here vir elkeen van ons, is Hy besig om as’t ware deur Sy engele en die ander instrumente wat Hy in ons lewens wil gebruik, agter ons aan te hardloop, om Sy kinders uit hulle skoene te seën. Hierdie prentjie van die seisoen van Gimel het egter ook ʼn ander kant, waarvan ons ook lees in Jesaja 61. Ja, dit is ook die seisoen van God se oordeel. Ons gaan voor ons oë sien hoe die bitter gevolge van sonde en ongehoorsaamheid, ja, God se oordeel, reeds hier op aarde in mense se lewens, in besighede, in organisasies en strukture, waar die hel los was en die hel en sy magte tot nou toe hoogty gevier het, skielik, soos vuur, sien deurbreek en sien hoe dinge waaraan daar vir jare gebou is, alles in puin gelê en vernietig word. Daarom is ons werklik in hierdie seisoen in ʼn seisoen waarin ons kan verwag dat God self dit wat verkeerd is, gaan reg maak. Waarin ons gaan beleef hoe God net sê: Genoeg is genoeg! Daarom is dit werklik ʼn seisoen waarin ons kan verwag dat God se woord daar in Jer. 29:11 tot 14 voor ons oë gaan gebeur en gaan waar word. Jer. 29:11-14“Ek weet wat Ek vir julle beplan, sê die Here: voorspoed en nie teenspoed nie; Ek wil vir julle ʼn toekoms gee, ʼn verwagting! Dan sal julle My aanroep, tot My kom bid, en Ek sal julle gebede verhoor. Julle sal vra na my wil en julle sal dan my wil ken as julle met julle hele hart daarna vra. Julle sal My ontmoet, sê die Here, en Ek sal julle terugbring…” Dit is ʼn seisoen waarin Koning Jesus self voor ons kom staan en aan ons sê wat Hy daar in Joh. 14:13-14 gesê het: Joh. 14:13-14“Wat julle ook al in my Naam vra, sal Ek doen, sodat die Vader deur die Seun verheerlik kan word. As julle My iets in my Naam vra, sal Ek dit doen.” Moet dus nie moedeloos word of ophou glo nie. Ja, ek weet jy het al baie hieroor gebid en baie keer al hiervoor gevra. Moenie nou ophou nie. Hou aan! Die Here belowe dat dit juis nou die seisoen is wat ons van Hom deurbrake kan verwag en kan verwag dat Hy ons gebede sal verhoor. Sien reeds in jou gees die kamele, swaar gelaai met alles waarvoor jy die Vader al vir solank al vertrou, daar in die verte aankom, op pad na jou toe! |
Profetiese woord vir 2023 en verder - Deel 1 - Here, maak my oë oop dat ek werklik kan sien wat aangaan!
Deel 1 – Here, maak my oë oop dat ek werklik kan sien wat aangaanEk het vir die Here uitgevra oor waarmee Hy in hierdie seisoen besig is in die lewe van Sy kinders. Dit is wat ek gehoor het. Natuurlik, soos altyd, wil God self met jou praat en Sy hart en planne aan jou openbaar. Daarom, toets wat ek gehoor het, soos God self deur Sy Gees ons leer daar in 1 Tess. 5:19-24. Die Here herinner my daaraan dat die nuwe Joodse jaar aangebreek het met Rosh Hashanna wat hierdie keer die 25,26 September 2022 aangebreek het. Dit is die Joodse jaar, 5837, die keer. Die seisoen van Pei, van oop deure, waarin God inkom om alles te verander, want niks is vir Hom onmoontlik nie. Die Here neem my toe na Genesis 28 waar ons Jakob kry, besig om te vlug vir sy lewe, want hy het sy broer ingedoen en hy soek sy bloed. En soos wat Jakob hardloop, begin hy alles wat hy het en met hom saamgeneem het, stukkie vir stukkie langs die pad los. Tot dit uiteindelik net hy is, net met die klere aan sy lyf, wat oor is. Teen laataand maak hy vir homself ʼn gaatjie in die sand, soos wat ʼn mens in die woestyn doen as jy wil gaan slaap. Dan vat hy ʼn klip wat darem lyk of dit ʼn kussing kan wees, draai dit heelwaarskynlik toe met ʼn jas of iets soortgelyks, sodat dit darem sag genoeg kan wees om op te slaap. Dan gaan slaap hy. Skielik, êrens daardie nag, sien hy hierdie bonatuurlike visioen of droom. Die Here het aan my gesê terwyl Hy my dit wys, dat dit is wat in elkeen van ons se lewens elke dag, elke oomblik van die dag, in hierdie nuwe seisoen aan die gebeur is. God self, in Sy almag, soewereiniteit en genade, is met elkeen van ons besig. Hy gee letterlik Sy engele opdrag om die verhoog in elkeen van ons se lewens gereed te maak vir dit wat Hy, as God, daar wil doen. Vriende, kan jy dink wat kan in jou gebeur as die Here jou oë oopmaak om dit te sien gebeur in jou lewe, elke oomblik, 24/7! Kan jy dink hoe dit jou kan bemoedig en troos en versterk! Dit help ʼn mens glo wat daar in Rom.8:28 staan. Dat hierdie God, ongeag wat ook al in jou lewe gebeur of gebeur het of nog gaan gebeur, dat Hy dit êrens gaan maak inpas sodat dit tot jou voordeel, jou groei, jou welwese en jou geluk uiteindelik gaan bydra! Wanneer ons dit sien en dit werklik begin glo, gebeur daar iets met ons. Dit is dan wat ons besef soos Jakob besef het: God is werklik self hier by my, op hierdie plek, in hierdie situasie! En dit is altyd waar! Dit geld nie net vir sekere, spesiale oomblikke in my lewe nie. Die lewende God, vir wie niks onmoontlik is nie, wat my Vader in Christus Jesus geword het, wat vir my so liefhet dat Hy Sy Seun se lewe gegee het sodat ek kon lewe, hierdie God, is hier by my en met my besig! Ek weet nie wat dit aan jou doen as jy dit werklik besef en begin glo nie! Gen. 28:20-22“Jakob het toe ʼn gelofte afgelê en gesê: ‘As U, o God, by my is en my beskerm op my reis en vir my kos en klere gee, sodat ek behoue terugkom by my ouerhuis, sal U, Here, my God wees. Hierdie klippilaar wat ek regop gesit het, sal ʼn tempel wees, en van alles wat U my gee, sal ek vir U ʼn tiende gee.’” Ek vra weer vir jou: Hoe gaan jy reageer? Hoe gaan jy reageer as jy weet dat God besig is om iets van die Koninkryk van die hemel daar rondom jou, in jou lewe, in jou huwelik, in jou gesin, in jou besigheid of op jou plaas, te laat deurbreek? Ja, dat jyself êrens in Sy groter plan inpas en dat die Here jou wil gebruik om dit te laat gebeur. Wat gaan jy beskikbaar stel en begin gee sodat dit kan gebeur? |