Die afgelope tyd het ons vir mekaar uit die Woord gewys hoe Jesus baie strategies maar ook baie prakties die realiteit van die Koninkryk van die hemel wat ook nou hier op aarde is, in die markplek en in die ekonomie begin bedien het in die tyd wat Hy mens was hier op aarde.

Nou is die vraag natuurlik: Hoe kan ons hierdie model van God vir die ekonomie vandag rondom ons gebruik in die markplek en wat ons daar moet doen as ambassadeurs van hierdie nuwe Koninkryk?

Hoe kan ons midde al die gierigheid, selfsug, korrupsie, misdaad, bedrog, uitbuiting en menslike lyding prakties die goeie nuus van die Koninkryk en die lewe en oorvloed wat dit tot gevolg kan hê, bedien?

Hoe skep ʼn mens ʼn alternatiewe kultuur in die markplek wat nie gedryf en gemotiveer word deur gierigheid en selfgesentreerdheid nie, maar wat eerder omgee, ware liefde en mededeelsaamheid kommunikeer?

As ons werklik die beloftes en woord van Koning Jesus glo, oor lewe en dit in oorvloed wat volg as ons Hom en Sy metodes volg, gaan ʼn ekonomie waar die kultuur en dryfkrag van werklike omgee en bereidheid om met ander te deel, ʼn plek word waar almal wat besigheid doen, voordeel trek en seën en groei beleef, in plaas daarvan dat net sommige voordeel trek en die res die een of ander tyd bankrot word en in armoede verval.

Midde ʼn baie siek ekonomiese en sosiale sisteem wat gedryf is deur gierigheid en selfgesentreerdheid, het Jesus vir ons in Matteus 24 en 25 ekonomiese beginsels kom neerlê van hoe lyk ʼn nuwe nasie en generasie wat voor die Regterstoel van God eendag onder “die skape” geklas gaan word en God se ewige beloning gaan ontvang.

Dit gaan sakemanne en -vroue wees wat daar in die markplek, as ek honger is, bereid is om my te voed; as ek dors is, vir my iets gaan gee om te drink; as ek naak en sonder klere is, vir my iets gaan gee om aan te trek; as ek dakloos is, vir my ʼn dak oor die kop gaan gee; as ek in die tronk is, my kom besoek.

So, sê die nuwe Koning wat besig is om die Koninkryk van die hemel hier op aarde ʼn werklikheid te maak, so lyk dit in die markplek waar die koninkryk begin deurbreek!

Maar, sê dieselfde Jesus, aan diegene wat daar in die markplek maar net soos die res van die wêreld om hulle gierig en selfgesentreerd besigheid doen, julle wat niks aan die nood om julle doen nie, julle is gedoem en julle uiteinde is die hel!

Het jy gesien wat die verskil volgens Matteus 24 en 25 was tussen diegene wat eendag voor die Troon van God as skape geklassifiseer gaan word en diegene wat eendag as bokke geklassifiseer gaan word?

Die enigste verskil tussen hulle gaan wees dat diegene onder die bok-nasies, nie daar is omdat hulle groter sondaars was as die res nie! Nee, hulle is deel van die bok-nasies net omdat hulle niks gedoen het om ʼn verskil te maak aan die nood en lyding wat hulle elke dag rondom hulle in die markplek gesien het nie!

Vriende, daar is dus nie vir my en jou, as volgelinge van Jesus, enige ander opsie in die markplek as om Jesus en Sy model vir die ekonomie te volg nie! Daar is eenvoudig nie vir ons ʼn opsie om niks te doen of net aan te gaan soos voorheen nie!

Ons kan nie net staan en toekyk, terwyl al hierdie seer en lyding en onreg rondom ons in die markplek gebeur nie.

Daarom sal ons moet leer hoe om as ambassadeurs van die Koninkryk Koning Jesus en Sy model te volg in besigheid.

Ons is besig om die afgelope tyd te kyk hoe Jesus as die nuwe Koning, in die drie jaar tot Sy beskikking hier op aarde, die koninkryk en beheer van die magte van die hel baie strategies en bepland kom af te breek het.

So het Hy Sy woorde daar reg aan die begin hiervan, bevestig, naamlik: Bekeer julle, draai om, begin anders dink, kyk anders na dinge, doen dinge anders, want ʼn nuwe seisoen het hier aangebreek! Hierdie wêreld het ʼn nuwe Koning gekry.

Ons het reeds gesien hoe Hy stelselmagtig die hele korrupte Joodse tempel- en bankstelsel een stroompie na die ander, gaan toesteek het.

Natuurlik het Jesus ook direk gegaan vir die slagaar van ʼn demoniese korrupte ondier wat elke mens in die omstreke van Judea, Palestina en Galilea se lewe hel gemaak het. Omdat Hy die nuwe Koning was, sou daar vir elkeen van Sy volgelinge ʼn radikale lewenskeuse voorlê, naamlik wie het uiteindelik die finale sê in jou lewe! Ja, God stel elke owerheid aan en gee aan hulle outoriteit om in daardie gebiede waar hulle beheer het, te sorg dat alles ordelik, reg en regverdig sal gebeur vir elke mens onder hulle beheer. Dit het dus natuurlik ook vir die Romeine en Rome se bewind in daardie gebied gegeld. Maar daar waar hierdie regerings en hulle beleid in stryd kom met die beleid van die nuwe Koning, moet ons kies!

Met Sy dood aan die kruis, het Jesus gesê: Ek het nou met My bloed en lewe, die mag van sonde, die hel en al sy magte en gesante wat hy gebruik, se slagaar finaal kom afsny en die houvas en mag van hierdie sondige korrupte stelsel in hierdie wêreld op julle lewe te kom breek.

Dé, hier is ʼn sleutel, met die meegaande outoriteit, waarmee julle nou na elke mens op aarde kan gaan met die Goeie Nuus dat verlossing en bevryding moontlik is.

Ja, het Jesus gesê: Ek het gekom sodat daar vir elkeen lewe en dit in oorvloed in elke opsig en vir elke deel van jou lewe moontlik is. Ek het immers nou ʼn nuwe koninkryk hier op aarde kom vestig wat hierdie lewe en hierdie oorvloed belowe aan elkeen wat werklik kies om te glo dat Ek dit ook vir hulle gedoen het en wat gewillig is om My en My beleid, as die nuwe Koning, onvoorwaardelik gehoorsaam te volg!

So, op hierdie manier, met hierdie baie strategies gefokusde bediening, het Jesus ons begin leer hoe om korrupsie, bedrog, misdaad, alle gierigheid en selfgerigtheid, wat immers die wortels is van al die menslike ellende en lyding wat ons rondom ons vandag sien, aan te spreek.

Hier dink ons aan dinge soos mense in haglike armoede, dakloos, slagoffers van mensehandel, hongersnood, rassisme, en elke ander -isme uit die hel waaraan jy kan dink.

Dit is wat Jesus fisies hier op aarde kom aanspreek het en wat Hy ons nou stuur om as ambassadeurs van hierdie nuwe Koninkryk fisies te gaan aanspreek, daar waar die tekkie die teer tref, in die moderne markplek vandag.

Ons is besig om te kyk hoe Jesus se strategie en plan gelyk het om oral rondom Hom sigbare resultate agter te laat wat getuienis kan wees dat die Koninkryk van die hemel werklik hier op aarde deurgebreek het!

Almal wat wil, moet dit kan sien dat hier nou iemand anders in beheer is.

Daarom lyk dit nou hier anders as elders en daarom word dinge hier anders gedoen as elders.

Omdat die verrotting en korrupsie in Jesus se tyd veral bo, in die topstrukture van die geestelike Joodse leiers gelê het, was Jesus se strategie om die inkomste-strome na hulle toe en na die tempel toe af te sny.

Daarom het Hy begin om die belastinggaarders te bedien en te red, want hulle was kop en een mus met die korrupte godsdienstige leiers en was van die belangrikste toevoer-kanale wat geld laat stroom het na die tempel se bankrekening toe. Dit is waarom Jesus Levi, een van die topleiers onder die belastinggaarders, geroep het om Hom te begin volg, maar onmiddellik daarna sy Latynse Romeinse naam verander het na Matteus.

Dieselfde Levi het saam met hom byna ʼn honderd ander belastinggaarders na sy huis genooi die dag toe Jesus kom kuier het. En hulle het weer later ander gebring. En almal van hulle is gered en het ambassadeurs en tuinslange geword van ʼn ander koninkryk as die een wat hulle voorheen gedien het.

Toe red Jesus Saggeus, en dieselfde gebeur ook rondom hom.

Onthou die groter prentjie en die strategie van Jesus!

Die volgende deel van Jesus se strategiese plan was om die mense gesond te begin maak, maar sonder om vir hulle geld daarvoor te vra.

Ek weet nie of jy onthou nie, maar destyds, in Jesus se tyd, was dit godsdienstige leiers ook die dokters van hulle tyd. Mense het na hulle toe gekom in die hoop dat hulle gesond sal word. Soos daardie vrou wat aan bloedvloeiing vir jare en jare gely het. En oor die jare sakke en sakke vol geld betaal het vir die “dokters” maar nooit gesond geword het nie!

En hier kom Jesus, die nuwe Koning van ʼn nuwe koninkryk, en maak almal wat siek is, gesond, verniet!

En nadat Hy hulle gesond gemaak het, stuur Hy hulle na die tempel toe en na die priesters toe om vir hulle te gaan “be-wys” dat hulle nou gesond is sonder dat hulle eers daarvoor betaal het.

So word nog ʼn inkomste-stroom na die tempel toe, toegestop!

Kom ons kyk ʼn bietjie krities na die ekonomie in Israel in die jare 28/29 tot 32 n.C., toe Koning Jesus hier in die openbaar begin leer en optree het.

Wat ʼn mens ontdek as jy die Evangelies en navorsingsmateriaal oor daardie tyd deeglik bestudeer, skud jou tot in jou fondamente.

Dan sien ons hoe die leiers in die gemeenskap, of hulle nou godsdienstige leiers was of leiers in die regering, janalleman in Israel geplunder en besteel het totdat sowat 80 tot 90 persent van hulle brandarm en uitgehongerde slawe was.

Selfs mense wat geroem het daarop dat hulle deel was van God se godsdienstige volk, Israel, moes uiteindelik alles wat hulle gehad het verkoop en dit sluit eiendom, plase en selfs hulle kinders in, om hulle skuld aan, kan jy glo, die godsdienstige leiers van daardie tyd, te probeer terugbetaal.

Die tempelpriesters, die fariseërs, die Sadduseërs, met ander woorde, die godsdienstige leiers en leraars van die volk, was tot in hulle siel toe verrot en korrup en het hulle eie mense uiteindelik brandarm geplunder en besteel.

In hierdie gemeenskap en tyd is Jesus, die nuwe Koning op aarde, gebore, as lid van ʼn gesin wat, soos die res van die gemeenskap, brandarm was as gevolg van die plundering en misdaad van hierdie selfde mense.

Dit is waarom Jesus gedoen het wat Hy gedoen het, en gesê het wat Hy gesê het. Daarom was Sy eerste woorde aan hulle: Bekeer julle, want die koninkryk van die hemel het naby gekom, is hier!

Maar Jesus was ook nie naïef nie. Hy het onmiddellik gesien en geweet dat hulle nie gaan verander nie. Hulle het te veel gehad om te verloor. Hulle was beslis nie bereid en gereed om die gans wat die goeie eiers lê, sommer net weg te gee nie.

Daarom het Koning Jesus begin om baie strategies en met ʼn baie besliste plan op te tree.

Ek glo dit is die eerste ding wat enige sakeman of vrou, wat volgelinge is van die Koning van alle konings, moet weet: Ons het nodig om so gou moontlik ʼn baie besliste strategie vir die markplein te ontwikkel as ons enigsins iets van die Koninkryk van die hemel hier wil sien deurbreek. Dit is van lewensbelang vir die Koninkryk dat ons sigbare bewyse sal oplewer wat ons kan gebruik as getuienis dat die Koninkryk van die hemel besig is om hier op aarde deur te breek.

Dit is van kardinale belang as deel van ons getuienis na binne en veral na buite dat hierdie strategie sal insluit dat dit sigbare bewyse en resultate sal oplewer sodat die res van die ekonomiese gemeenskap rondom ons deeglik daarvan kennis sal neem terwille van die toekoms van hulle eie besighede.

Vriende, as ons werklik glo wat die Koning sê, moet ons ook kennis daarvan neem dat Hy ook vir die markplek gesê het: Ek het gekom dat julle die Lewe kan ken en dit in oorvloed! En dat hierdie Lewe en oorvloed beslis nie net vir Sy volgelinge betekenis en waarde het nie, maar ook vir elke besigheidsman of vrou, of ekonomiese instelling, of selfs vir elke regering van die dag, betekenis en waarde het. Dit is vir elke mens op aarde van lewensbelang!

Daarom, en daarmee wil ek hierdie gedeelte afsluit, kan ons nie langer bekostig om oor die koms van die Koninkryk van die hemel hier op aarde te gesels en te preek asof dit ʼn fantasieverhaal is en asof dit eers eendag, wanneer Jesus kom, werklik gaan gebeur en waarde gaan hê nie!

Kom ons wees net logies! Watter betekenis het die koms van die Koninkryk eers eendag, nadat Jesus Christus weer gekom het?

Dit is mos malligheid om so daaroor te praat en so daaroor te dink!

Die koms en werklikheid van die koninkryk van die hemel, as ʼn sigbare, ervaarbare realiteit, al is dit voorlopig, gebrekkig, onvolledig, onvolmaak selfs, het net betekenis en kan net mense se lewens, die ekonomie, besighede, ens., verander, as dit nou, hier midde al die stukkendheid van ons wêreld en hier in die nou op die markplein, begin deurbreek en sigbaar ʼn werklikheid word!

Almal praat so van “mindfulness” deesdae.

Bedoelende om te kies om doelbewus in die oomblik, in die nou te bly en nie toe te laat dat ʼn besig-wees met gister en die verlede se dinge, of jou bekommernis en vrese oor môre, die lekker en die voorreg van wat jy nou beleef en waar jy nou op hierdie oomblik is, in die proses verdring en leeg verbygaan nie.

So glo ek, om werklik ʼn daadwerklike impak as ambassadeur van die hemel hier op die aarde en spesifiek in die markplein te maak, moet ek en jy doelbewus kies om aan die voete van ons Koning te bly sit, met ore wat sensitief is vir die stem en leiding van Sy Gees wat in ons woon. Sodat ons presies elke oomblik kan weet wat die hart en wil van ons Vader en ons Koning in elke situasie is.

My verhouding met die Vader, Koning Jesus en die Heilige Gees is immers hierdie intieme, oomblik-vir-oomblik, liefdesverhouding en bewus-wees van Sy heerlike teenwoordigheid en besig-wees in my en almal om my se lewens.

Daarom begin my dag, elke dag, eerstens, met ʼn stil gaan sit in Sy teenwoordigheid, waar ek Hom in die oë kyk en ek my dankbaar kan verlustig in Sy liefdevolle, versorgende, beskermende arms om my.

Ja, soos ek baie keer vir angstige en gespanne mense leer, gaan lê ek baie keer op die mat, haal ʼn paar keer doelbewus met my diafragma vir vier tellings diep asem, hou dit vier tellings in en blaas dit vir ses tellings stadig uit.

So trek ek God se lewegewende suurstof en lewe in, hou dit vir ʼn oomblik in en begin dan al die spanning, angstigheid, bekommernis en dood in my uitblaas.

So begin ontspan ek net daar op die mat, asof ek as’t ware op die Here se handpalm veilig lê, versorg en beskerm. En so vergeet ek dan van my asemhaling, terwyl ek elke stukkie van my liggaam, van my tone af stukkie vir stukkie oorgee en laat rus in Sy handpalm. Tot by my kop en gesig.

So rus ek dan daar in Sy teenwoordigheid doelbewus vir so 20 minute.

Om dan op te staan en met Sy Woord, die Bybel, in my hande, te gaan sit en luister na wat Hy vandag vir my wil sê uit die gedeeltes wat ek lees uit Sy Woord. Gewoonlik lees ek so drie gedeeltes: ʼn hoofstuk of twee uit die Ou Testament, ʼn gedeelte uit die Psalms en digterlike gedeeltes uit die Ou Testament, en dan ook ʼn hoofstuk of twee uit die Nuwe Testament. Meestal volgens ʼn bepaalde leesprogram, sodat ek die hele Bybel in ʼn jaar se tyd kan deurlees.

Terwyl ek lees wat daar presies staan, luister ek doelbewus om te hoor wat God self vir my vandag wil sê.

As ek klaar gehoor het wat Hy wil sê, mediteer ek daaroor en kies ek een of twee maniere hoe ek vandag daarop moet reageer of tot aksie moet oorgaan.

Heeltyd gesels ek met Hom en gesels Hy met my terug. Hierdie gesprek gaan dwarsdeur die dag aan. Natuurlik ook met lang tye van skynbare stilte, soos hoort in ʼn ware liefdesverhouding, waar ons nie nodig het om heeltyd te praat om mekaar se harte te hoor nie.

So bly ek sensitief vir Vader, Koning Jesus en die Gees se stem. Om my gedurige bewus te hou dat ek ʼn Pappa in die hemel het, wat die Koning is. En dat ek Sy kind is. Maar ook dat ek ʼn toegeruste, aangestelde ambassadeur van die hemel is wat vandag hier op aarde is, op bepaalde verhoë en in uit-die-hemel-gereelde ontmoetings met mense, om daar my God en Koning te verteenwoordig en Sy hart daar te laat gebeur of te laat hoor.

Ook daar in die markplein, doelbewus, vandag!

Markus 8:15

Ek wil met jou verder gesels oor wat Jesus daar in Markus 8:15 gesê het: “Pas op, wees op julle hoede vir die suurdeeg van die Fariseërs en die suurdeeg van Herodes.”

Hierdie keer wil ek met jou gesels oor die invloed van die suurdeeg van Herodes op ons manier van dink en doen.

Hier gaan dit oor niks anders nie as die ateïstiese invloed en lering wat ons elke dag mee gevoer word in die wêreld daarbuite, sy dit deur die media, die politiek van die dag, die tipiese ekonomiese magsisteme, of dit wat ons as studente in besigheidskole en op universiteitsbanke geleer word.

Dit gaan dus hier daaroor dat ons geleer word om op ʼn bepaalde manier te dink of besigheid te doen, of te beplan asof God, of die bonatuurlike, of wonderwerke, nie werklik gebeur of bestaan nie.

Weet jy hoe sê hulle dit vir jou?

Praktiese ateïsme

Hulle sê vir jou dinge soos: “God help net diegene wat hulleself help!” Of: “Jy is die antwoord op jou eie vrae!” Of: “Gebed gaan nie hier werk nie. Staan op en doen wat jy moet doen!” Of: “Goeie besigheidsmanne en -vroue is self-gemaakte mense!”

Moenie dink dat hierdie suurdeeg net in die wêreld daarbuite ʼn gevaar is nie! Dit is ook een van die groot uitdagings in die kerk vandag dat ons sit met ʼn manier van dink en optree wat ek niks anders kan noem as praktiese ateïsme nie.

Soveel mense wat hulleself as Christen-gelowiges beskou is prakties ateïste. Hulle tree op, praat en dink soos mense wat nie glo of weet dat daar ʼn aktiewe, lewende God in hulle eie lewe en rondom hulle besig is nie.

Natuurlik sal hulle dit nooit so sê nie. Nie een van hulle, of een van hierdie gemeentes of kerke sal openlik en eerlik bely dat daar nie werklik ʼn God is nie.

Tog tree, praat en dink hulle op so ʼn wyse wat glad nie met die bestaan of werklikheid van ʼn lewende God rekening hou nie. Hulle tree daarom presies soos die ongelowige wêreld rondom hulle op as hulle voor uitdagings te staan kom of as hulle gevra word om standpunt in te neem oor ʼn bepaalde saak.

Dit kom nie eers by hulle op om te probeer seker maak oor wat God oor hierdie saak te sê het in Sy Woord, die Bybel, nie. Die Bybel het immers lankal by hulle maar net een van baie gewone boeke geword, en is boonop ʼn baie ou boek vol ou, uitgediende sieninge en menings!

Soveel mense dink dat Suid-Afrika ʼn Christelike godsdienstige land is. Oor die sewentig persent van sy inwoners sê immers dat hulle lede van die een of ander Christelike kerk sou wees. Maar kyk maar net rondom jou na wat in hierdie land onder hierdie sogenaamde godsdienstige mense aangaan! Dan besef jy mos sommer gou dat ons dalk hier ʼn godsdienstige dop het, maar in die hart of kern, sit ons met ʼn siek, totaal ateïstiese gees of suurdeeg wat alles om ons siek, korrup en totaal liefdeloos maak.

Rom. 12:1,2

Daarom is die oproep van Romeine 12, vers 1 en 2, in my eie woorde, so relevant:

Die feit dat julle lyk, en optree, en dink soos die res van die wêreld rondom julle, wys tog dat iets geweldig fout en vrot is! Laat toe dat God in Sy genade kom en dat Hy julle gedagtes sal vernuwe! Mag Hy julle verras en onverwags, wonderlik, skielik, self voor en by en in julle lewens verskyn, dat julle sal neerval voor Sy voete en Hom sal smeek om tog julle hart en gees en gedagtes te kom nuut maak en totaal sal verander en sal deursuur met die Goeie Nuus van die Koninkryk van die hemel wat hier op aarde wil deurbreek en gesien wil word.

In Mat. 13:33 lees ons:

“Hy het hulle nog ʼn gelykenis vertel: "Die koninkryk van die hemel is soos suurdeeg wat ʼn vrou gevat en in ʼn groot skottel meel ingewerk het totdat dit heeltemal deursuur was.”

In Markus 8:13-21 praat Jesus weer oor suurdeeg, maar hierdie keer oor twee ander soorte suurdeeg, en die keer in ʼn negatiewe sin daarvan. Ons lees:

“Die dissipels het vergeet om brood saam te vat; hulle het net een by hulle in die skuit gehad.

Jesus het hulle toe gewaarsku: Pas op, wees op julle hoede vir die suurdeeg van die Fariseërs en die suurdeeg van Herodes.”

Gaan lees verder die stukkie in jou eie Bybel en dan sal jy sien dat Jesus hulle herinner aan die gebeure waarvan ons laas gepraat het in Markus 6 waar Hy die brood en die vissies vermeerder het en hulle gebruik het om bykans 15 000 mense kos te gee.

Wat bedoel Jesus as Hy hulle waarsku teen “die suurdeeg van die Fariseërs” en “die suurdeeg van Herodes”?

Soos wat die realiteit van die Koninkryk van die hemel ons verstand en gedagtes, en ons manier van lewe ook op die markplein moet deursuur en ingrypend verander, so is daar ook twee ander soorte suurdeeg wat ons manier van dink en ons lewe ingrypend negatief kan beïnvloed.

Kom ons gesels hierdie keer net oor “die suurdeeg van die Fariseërs”.

(Volgende keer gesels ons oor die suurdeeg van Herodes.)

Jesus verduidelik wat Hy hiermee bedoel daar in Markus 12:24 as Hy vir die Fariseërs sê:

“Is die rede waarom julle dwaal, nie juis dat julle nie die Skrif ken nie en ook nie die krag van God nie?”

Dit gaan dus hier oor tipiese godsdiens of godsdienstige mense wat skynbaar ʼn verhouding met God het, en selfs groot gedeeltes kan aanhaal uit die Bybel vir ander, maar omdat hulle geen persoonlike liefdesverhouding met die God van die Bybel en met Jesus as Koning en Verlosser het nie, ken hulle nie werklik die Bybel nie en ken hulle beslis nie die werklikheid van ʼn lewende God wat besig is om iets van die hemel hier rondom ons op aarde in Sy krag en genade te laat deurbreek nie!

Ons kan in dieselfde asem ook hier praat oor Evangeliese Christene wat passievol is oor die Woord en oor die Here, maar tog steeds glo dat die buitengewone gawes van die Gees en die wonderwerkende God nie meer vandag werk nie maar opgehou het met die totstandkoming van die Kanon, of Bybel in die vorm wat ons dit vandag het.

(En asseblief, moet nie dink dat daar nie meer mense is wat so dink nie! Vir die van julle wat in Suid-Afrika woon en uit ʼn tipies Afrikaanse gereformeerde agtergrond uitkom: Dit is die amptelike standpunt van tipiese gereformeerde kerke in Suid-Afrika!)

Dit is ook die manier van dink wat veroorsaak dat baie ernstige en opregte volgelinge van Jesus magteloos staan by die siekbed van mense! Veral as ons soos die dissipels daar in Joh. 9:2, vir Jesus wil vra: “Is hierdie persoon siek as gevolg van sy eie sondes of is hy siek as gevolg van dit wat sy ouers of voorouers gesondig het?”

O, mag God deur Sy Gees verlos van hierdie manier van dink en ons bekragtig met die waarheid van die Evangelie van die Koninkryk!

Ek weet nie of jy ook soms so sukkel om te glo as die “popo die fan” tref daar op die markplein nie!

Ja, daardie dae as die syfers net nie wil klop nie, of as ʼn lewensbelangrike transaksie net nie wil deurbreek nie, of as daardie onontbeerlike stuk masjinerie op die mees ongerieflike tyd skielik breek!

Blaai saam met my na Markus 6 toe om te sien hoe die dissipels van Jesus ʼn paar lesse in die verband, in die skool van die bonatuurlike op die markplein moes leer.

Lees jy self die verhaal in jou Bybel daar van Markus 6:31 af.

In vers 44 lees ons dat die dissipels in die Naam en diens van Jesus, daardie dag met vyf broodjies en twee vissies, 5000 mans (met ander woorde, heelwaarskynlik tussen tien en vyftien-duisend mans, vrouens en kinders) genoeg kos gegee het, sodat daar agterna, nog 12 mandjies brokstukke oorgebly het.

Dan lees ons hoe Jesus daardie selfde dissipels aansê om solank in die boot te klim en oor te vaar na Betsaida toe.

Jy ken die verhaal. Op die see breek ʼn storm uit en daardie dissipels moet roei en veg vir hulle lewe teen die stormwind tot vroeg dagbreek die volgende dag.

Dan lees ons in Markus 6:48 die volgende aangrypende vertelling hieroor:

“Hy het gesien hulle roei swaar, want die wind was teen hulle. Teen dagbreek die volgende môre het Hy op die see na hulle toe aangeloop gekom, en Hy wou langs hulle verbygaan.

Toe hulle Hom op die see sien loop, het hulle gedink dit is ʼn spook. Hulle het hard geskreeu, want hulle het Hom almal gesien en groot geskrik. Maar Hy het dadelik met hulle gepraat en vir hulle gesê: Wees gerus, dit is Ek. Moenie bang wees nie.

Hy het toe by hulle in die skuit geklim, en die wind het gaan lê. Hulle was heeltemal uit die veld geslaan, want hulle het nie werklik verstaan wat die vermeerdering van die brood beteken nie; hulle kon dit nog nie begryp nie.”

Wat ʼn vreemde vers waarmee hierdie gedeelte eindig!

Wat op dees aarde beteken dit?

Die Ou Afrikaanse Vertaling help ons hiermee, want daar word wat in die Grieks staan, so vertaal: “Want hulle het by die wonder van die brode nie verstandig geword nie, omdat hulle hart verhard was.”

Sien, ʼn mens kan alles in die Woord lees wat Koning Jesus vir ons leer oor hoe ons moet ruimte maak vir die bonatuurlike en vir die feit dat Hy vir ons as Sy volgelinge bonatuurlik toerus en bonatuurlike outoriteit en krag gee om in diens van die Hemel hier op aarde op te tree!

Ja, selfs al het jy gister bonatuurlike wonderwerke met jou eie oë gesien en self beleef het!

Maar as die “popo die fan tref”, wanneer jy in sekondes moet optree of ʼn beslissing moet vel, is dit asof jy terug is in Graad 1 van die Skool van die Bonatuurlike!

Soos die dissipels daar in Markus 6 op die see, na ʼn nag van veg teen die golwe, met die gewone toerusting soos seile en roeispanne soos vanouds, vergeet jy daardie tye die lesse wat jy gister geleer het oor die bonatuurlike wat moontlik is “in die Naam en diens van die Koning”!

Daarom kom jy met ʼn harde slag grond toe, want jou gedagtes is nog nie werklik vernuwe en getransformeer met die boodskap en les van die wonderwerke nie!

Daarom moet ons maar weer later verder leer dat… in diens van die Koning ... kan ons op water stap ... kan ons storms aanspreek en winde en golwe gaan bedaar en luister!

Met ander woorde, wat die dissipels nog nie verstaan het nie, was hulle eie rol in die kom en gebeur van die realiteite van die Koninkryk van die hemel hier rondom ons op aarde!

Volgende keer gesels ek met jou verder hieroor.