Die vraag wat seker die meeste op almal van ons se lippe as volgelinge van Jesus is, is die vraag: Wat is God se wil in hierdie situasie? Natuurlik geld dit ook op die markplein.

Jesus is God die Vader se “ja” op hierdie vraag. Kyk en luister na Jesus en dan het jy ʼn magdom antwoorde op hierdie vraag in ontelbare situasies.

Jesus is die perfekte en volmaakte prentjie van ons Hemelse Vader en ons Vader se “ja” dwarsdeur die geskiedenis, vir vandag en môre.

Enigiets wat jy dink oor God wat jy nie kan vind of kan harmonieer met die Persoon van Jesus nie, moet jy ernstig bevraagteken.

God die Gees inspireer Paulus daar in 2 Kor. 1:19 en 20 om hieroor te skryf.
“… want Jesus Christus, die Seun van God, wat ons, dit is ek en Silvanus en Timoteus, aan julle verkondig het, is nie "ja" en "nee" tegelyk nie. Hy is die "ja" van God, die "ja" op al die beloftes van God. Daarom is dit ook deur Christus dat ons tot eer van God daarop "Amen" sê.”

As die Messias wat belowe is, is Jesus die Goue draad dwarsdeur die Ou Testament.

Net so is Jesus ook die Een waaroor die hele Nuwe Testament gaan en waarom alles draai.

Jesus is God die Vader se “ja” aan ʼn mensdom wat wonder of daar hoop is en of alles hier uiteindelik die moeite werd is.

Ja, Hy is Een wat daardie honger en dors wat niks anders kan stil en les nie, uiteindelik volkome kan bevredig.

Dink ʼn bietjie na oor hierdie stellings wat Paulus hier maak.

Oorgesê in my eie woorde, hoor ek onder andere hoe God se Gees hier vir my en jou sê: Wonder jy of al die beloftes wat God in Sy Woord, die Bybel, maak ook vir jou geld? Natuurlik, ja! Jesus is God se “ja” in hoofletters op jou vraag!

As jy dus gewonder het of God altyd ʼn goeie God is en altyd net die beste vir jou in gedagte het, hoef jy nie verder te wonder nie: Jesus is jou beste Antwoord en God se “ja” op jou vraag!

As jy wonder of jy iets kan doen wat werklik ʼn verskil kan maak… in jou eie lewe of... in alles wat rondom jou gebeur... Dan is Jesus en dit wat Hy vir en namens ons gedoen het en wat Hy aan ons belowe het, God se “ja” op ons vrae.

Maar hierdie “ja” vra altyd ook ʼn “Amen” van ons kant af as ons eerste tree in geloof daarop! Vir die regte dinge om hier op aarde te begin gebeur, kan dit net gebeur omdat iemand op aarde “Amen” gesê het op iets wat God in die hemel gesê het.

Daarom word ons “Sy getuies”, “Sy ambassadeurs” en “Sy medewerkers” genoem!

God het presies vir ons gewys hoe lyk Sy perfekte wil in die lewe van Jesus daardie bietjie-meer as 33 jaar hier op aarde! Ons sien God se perfekte wil in die Persoon, Karakter, liefde en krag van Jesus.

Maar sonder die karakter, liefde en krag wat werk in elkeen van ons wat Jesus as Koning, Here en Verlosser bely, is die prentjie van die wil van God onvolledig!

Natuurlik sê ek nie hiermee dat God nie alles wat Hy in die Woord sê op Sy eie kan doen nie. Hy kan die Evangelie baie beter as enigeen van ons aan ʼn verlore wêreld verkondig. Hy kan mense genees en bevry, baie beter as enigeen van ons en sonder ons. God het nie ons nodig nie. Maar Hy het reeds voor die skepping besluit om dit alles nie sonder ons te doen nie.

Daarom is ek en jy, vandag, die generasie wat hierdie God gekies het vir ʼn tyd soos hierdie. Ons is die nuwe generasie volgelinge van Koning Jesus wat iets van die koninkryk van die hemel vandag rondom ons hier op aarde moet laat deurbreek. Ons is die mense wat hier en nou vir mense moet wys wat is die wil en die hart van die God wat ons liefhet en dien.

Daarom is ek en jy die generasie wie se “mind” of “verstand” of “gedagtes”, soos Rom. 12:2 se vertaling die Grieks vertaal het, God wil verander en aan wie Hy Sy wil wil openbaar oor hoe dit lyk as iets van die Koninkryk, en Sy “ja”, vandag hier rondom ons moet realiseer en begin deurbreek.

Of dit nou in jou eie lewe is, en of dit daar in die markplein is.