Nuusbrief

Nuusbrief (237)

Thursday, 15 June 2023 11:50

Weet jy watter verskil kan jy maak?

 

 

Die meeste van julle weet dat ek en my vrou ons aangemeld het om te gaan help in die meer as 100 gemeentes van die NG Kerk oor Suid-Afrika, Namibië en Botswana, met derduisende gewone, goeie en godvresende Afrikaanssprekendes in, wat besig is om hulleself los te maak van die NG Kerk en al die dwaalleringe wat daar tans verkondig word!

Vandag wil ek jou vertel hoe jy 'n verskil kan maak daar waar jy woon en tussen die vriende in die NG Kerk wat jy ken.

Weet jy dat ek 'n stel boeke en DVD's gepubliseer het wat elkeen van hierdie mense geleentheid kan gee om ten minste eenkeer in hulle lewe presies te hoor wat waarheid en wat leuen is?

Al die boeke en DVD's wat ek sedert 1996 gepubliseer het is juis in Afrikaans vir presies hierdie groep mense geskryf.

DIE STORIE AGTER DIE STORIE - is 'n kort en bondige kommentaar op elke boek in die Nuwe Testament wat die storie van die bonatuurlike verhaal van God se werking onder mense vertel in Afrikaans wat hierdie groep mense verstaan!

WAARHEEN MET DIE NUWE WYN - is ons verhaal oor hoe die Here ons gebruik het in vier jaar in Potchefstroom om 'n beweging van God se Gees onder Afrikaanssprekendes te veroorsaak wat daardie baie konserwatiewe Afrikaanse stad verander het!

REFORMEER WEER 'N KEER - is die profetiese woord van God reeds in 2014, aan meer as 3000 dominees, lektore en teologiese professore in die NG Kerk en die vier ander gereformeerde kerke, oor hoe die dwaling oor die doop hulle hele prentjie van die Ekklesia verwring het, en hoe woedend God daaroor is!

DIE DVD, HOOR JY DIE HERE SE STEM - is praktiese lering van meer as vier ure, oor hoe om as 'n gewoon Afrikaanssprekende gelowige die lewende God se stem self te hoor!

DIE DVD, JESUS, DIE DOPER MET DIE GEES - is 8 sessies se verstaanbare lering oor die Persoon, werk en gawes van die Heilige Gees, in 'n taal wat gereformeerde Afrikaanssprekendes dit verstaan.

En dit alles vir R500 (plus posgeld ekstra, afhangende waarheen ek dit moet stuur.)

Kom, wees een van 200 mense wat een of twee gesinne "bless" met hierdie ALLES-IN-EEN -PAKKET! Epos my en bestel dit by my en help my so om tientalle mense se lewens te verander soos God jou lewe verander het!

 

Dit wat ons glo moontlik is om gedurende ons lewe te gebeur, het ’n enorme effek op hoe ons oor die lewe in die algemeen dink.

Glo jy as ’n gelowige volgeling van Jesus werklik dat jy tot alles in staat is deur Christus wat jou die krag gee? Verwag jy werklik dat wat ook al in jou lewe gebeur, uiteindelik werklik tot jou beswil en goed sal wees? Het jy werklik daardie verwagting en hoop deurentyd dat dit wat God belowe het in Sy Woord aan jou, sal gebeur?

Luister net wat sê ’n sakeman nou die dag vir my terwyl ek met hom gesels oor wat werklik soms gebeur in my lewe en hoe ek soms wonder oor wat ek moet doen wanneer daar werklik te min geld is vir wat moet gebeur.

Hy herinner my toe aan iets wat die Here juis daardie oggend vir my in my stiltyd voor Hom gesê het, naamlik dat ek “man van God” is en wat Hy al vir 30 jaar (van 1993 af) vir my en my gesin, dag na dag, oor en oor, gewys en bewys het, naamlik dat Hy daar is en dat Hy in die detail van my lewe betrokke en besig is.

En ja, dat ek steeds kan bly vashou aan Sy beloftes aan my.

Daarom kan ek, soos wat Sy dissipels en Sy mense keer op keer beleef het, verwag dat juis op daardie dae wat dit lyk asof niks kan verander of gebeur nie, my God en Vader skielik en onverwags, in sekondes of minute alles kan verander, of kan Hy meer as wat ek nodig het, gee!

Terwyl hy dit vir my gesê het, het ek net beleef hoe hierdie vlam van hoop sommer net in my opvlam en het ek vir myself gesê: Ja, dit is wat dit beteken om God se kind te wees en om in ’n God te glo vir wie niks onmoontlik is nie!
Dan behoort jy mos elke dag die onmoontlike te verwag om te gebeur!

’n Mens besef egter nie altyd hoe dit wat jy hier diep binne om die een of ander rede begin glo het, werklik ‘n bril word waarmee jy na alles kyk en selfs hoe jy daaroor dink.

In die rekenaarwêreld word hiervan gepraat as daardie “default programme” of verstek-verstellings op jou rekenaar, waarheen hy altyd terugkeer.

Op my Apple Imac-rekenaar, het my WORD-program waarin ek woordprosessering doen en byvoorbeeld hierdie artikels skryf, reeds vooraf ’n lettertipe gekies, die grootte van die letter gekies, asook hoe die betrokke bladsy se uitleg moet lyk, ens.

In elkeen van ons se lewe het elkeen van ons ook so ’n stel voorafbepaalde waardes en dinge wat ons begin glo het om die een of ander rede en wat ’n enorme invloed het op ons onmiddellike reaksie op probleme of uitdagings.

So is daar onder ons diegene wat werklik glo en verwag dat dinge hier op aarde net nog donkerder en donkerder, en nog slegter en sondiger sal gaan, sonder dat hulle werklik ’n verwagting het dat God kan ingryp en dinge dramaties kan verander of oplossings onverwags op die tafel kan sit.

Dit veroorsaak natuurlik dat hierdie groep mense onder ons werklik nie hoop het dat enigiets dramaties rondom ons kan verander nie.

Besef jy dat ons in hierdie “Nog ’n Slukkie Nuwe wyn”-briefies van my aan jou, reeds drie jaar, week na week, gesels oor die boodskap van Jesus en van die Nuwe Testament, dat die Koninkryk van die hemel met die koms, lewe, dood en opstanding van Jesus, en met die koms en inwoning van God die Heilige Gees in God se mense, hier tussen ons op aarde begin deurbreek het?

Maar hierdie groep onder ons, lees dit alles, en sê selfs nou en dan amen daarop, maar hier diep binne sukkel hulle om dit werklik te glo. Want as hulle rondom hulle realisties rondkyk (want dit is wat hulle hulself noem: realiste!), dan sien hulle eerder hoe die kwaad en die sleg net meer en meer word, en dan word hulle selfs opgewonde daaroor, want dan weet en glo hulle: Die einde is naby! Die koms van Jesus is naby, soos die Woord sê!

Maar hulle besef nie dat juis hierdie manier om na die wêreld rondom hulle te kyk en hierdie bril wat hulle op het, maak dat hulle net raaksien wat hulle wil raaksien en glo wat hulle wil glo nie!

Vir hulle wil ek sê: Maar wat daarvan dat ons eerder op grond van wat in die Bybel en Nuwe Testament staan oor “Soek My Koninkryk en My wil!”, ons juis moet kies om te glo en te verwag dat die koms van die Koninkryk van die Hemel hier op aarde, ’n impak en ’n blywende verskil gaan maak in al die realiteite wat ons tans rondom ons sien!

Hoeveel mense hoop en verwag eerder ’n wegraping van God se mense uit al hierdie stukkendheid uit, eerder as om te glo in die krag van die Evangelie om in die hier en nou werklik ’n verskil te maak!

My vraag aan diegene is dan: Verstaan ons werklik die Goeie Nuus wat Jesus aangekondig het, en wat die dissipels oor en oor aan mense rondom hulle verkondig het, en wat God self deur wonders en tekens bevestig het?

Ek is van oortuiging dat ons geloof ’n effek moet hê op al die dood, verlies en vernietiging wat ons daagliks rondom ons sien en beleef!

Ja, hierdie tragiese, verskriklike realiteite van sonde en die dood, is die vyand uit die hel se handewerk en se vingerafdrukke!

Maar ons geloof as volgelinge van Jesus moet nou, midde hierdie realiteite en hierdie verskriklik tragiese vingerafdrukke van die duisternis, begin om God se hande, voete en mond te word sodat mense prakties ’n liefdevolle Vader in die Hemel sien werk, wat Sy Seun gestuur het om mense te verlos van sonde, duisternis, siekte en selfs die dood, en wat herstel, verlossing, heling, restourasie en vernuwing gebring het wat hier rondom ons moet deurbreek!

Hebreërs sê dat ons God soek en beantwoord hierdie soort geloof in mense se lewens! Dit is hierdie soort geloof wat dinge laat gebeur wat vir ander onmoontlik gelyk het!

 

Die meeste van julle weet dat die Here my reeds in 1993 beveel het om te bedank as NG-dominee om te kon doen en sê wat ek in Sy diens moes doen. Daarom het Hy my beveel om nooit weer deel te word van enige tipiese mensgemaakte kerkdenominasie of kerkstruktuur van enige aard nie.

So moes ek ook aan die NG Kerk in 1993 sê dat die Here sê dat as hulle nie in lyn kom met wat Hy in Sy Woord sê nie, hulle in die volgende 20 jaar gaan beleef hoe meer as twee-derdes van hulle belydende lidmate ook gaan bedank en uitstap!

Dié van julle wat hierdie soort getalle dophou, sal weet dat in 1993 het die NG Kerk een-en- halfmiljoen belydende lidmate gehad. So ʼn paar jaar gelede het die nuutste syfers geopenbaar dat daar nou maar sowat ʼn halfmiljoen belydende lidmate oor is!

As deel van my opdrag en roeping bedien ek dus sedert 1993 meestal Afrikaanssprekende mense wat soos ek, uitgestap het en of besig is om uit te stap uit die tipiese gereformeerde gemeentes. Daarom weet ek ook hoeveel van hulle het soos ek en my gesin, nooit weer deel geword van enige tipiese kerkstruktuur of denominasie nie, en is of deel van wat ons as ʼn huisgemeente sal beskryf, en of hulle is doodgewoon deel van ʼn groot groep Afrikaanssprekende mense wat nooit weer êrens ʼn werklike geestelike tuiste gevind het in ʼn groter geloofsfamilie waarvan hulle deel wou raak nie.

Vandag wil ek een of twee dinge vir hierdie groep gelowiges sê:

Eerstens wil ek sê dat ek regtig verstaan wat in jou hart hieroor aangaan. Ek weet byvoorbeeld werklik dat jy gedoen het wat jy gedoen het, en ook tans doen wat jy doen, nie omdat jy nie meer glo nie, maar juis omdat jy in volle oortuiging Jesus alleen as Here en Koning wil dien en gehoorsaam!

Daarom wil ek vir jou sê: Dit wat God in Sy Woord oor die Ekklesia sê, geld egter steeds vir jou en jou gesin ook! En ja, jy behoort steeds aan die Bybelse Ekklesia en daarom sê God die Heilige Gees deur die volgende Bybelgedeeltes die volgende vir jou:

Heb. 10:24,25

Hebreërs 10: 24 en 25 sê: “Laat ons ook na mekaar omsien deur mekaar aan te spoor tot liefde en goeie dade.

Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom.”

Dus, of jou naby-familie of gemeente gelowiges nou net vier of vyf ander gesinne is waarmee jy weekliks byeen kom, mag jy en kan jy (en jou gesin), nie sonder hierdie samekoms van gelowiges klaar kom nie! Jou Here en Koning sê vir jou so!

Jy is ook deel van die groter Ekklesia

Maar dit is ook nie jou volledige Ekklesia waarvan jy deel is nie. Jy is ook deel van die groter Ekklesia daar in jou omgewing, daar in julle dorp, of stad, of omliggende gebied.

Ook daar het jy nodig om êrens die groter samekoms van gelowiges gereeld by te woon, want daar gebeur dinge in en deur die werking van die Gees, wat nie in kleiner byeenkomste van gelowiges kan gebeur nie!

Verstaan my egter mooi: Dit beteken egter beslis nie dat jy nou aan die een of ander “kerk” of gemeente moet “gaan behoort of lidmaat van moet word nie”!
Nee, want die deel-wees van die Ekklesia, lê nie in die “lid-word” van ʼn mensgemaakte kerkstruktuur of -organisasie nie, maar in die saam-wees in die teenwoordigheid van Jesus, en in die aanbidding saam met ander gelowiges wat deel is van die Ekklesia.

Daar gaan jy ook herinner word dat jy ook deel is van die groter, selfs wêreldwye, Ekklesia!

Natuurlik gaan dit nie net oor bywoning nie. Die Ekklesia-wees-ervaring lê immers ten diepste in ʼn bewustelike ervaring van deel-wees van ʼn gelowige familie, sy dit jou naby-familie gelowiges is en of dit daardie deel wees van ʼn groter, wyer familie van families is! Waar ons mekaar moet liefhê, soos wat Jesus ons liefgehad het. En waar ons al die ander dinge kan doen wat God in al die ander “mekaar”-tekse vir ons leer in Sy Woord. Soos om mekaar te bedien, mekaar te vermaan, mekaar te bemoedig, vir mekaar te sorg, ens.
Dit is ook in hierdie kring gelowige familie-verhoudinge waar ons leer om ook te gee en te belê in diens van die Koninkryk soos wat God ons in Sy Woord leer.

Soos daar in Mat. 6:24-25 en Hand. 4, waar ons leer om te gee soos wat ons Here ons geleer het om te gee: Eerstens in die lewens van die lede van die vyfvoudige bediening wat die Here gebruik om my en my gesin te bedien; maar dan ook in die lewens van ander gelowiges wat nood en behoeftes het.

Ja, in die proses gaan ek ook leer, soos Hand. 4 ons leer, dat God vir ons meer gaan gee as wat ons nodig het, sodat ons juis van daardie meer, weer kan investeer of “belê” in die Koninkryk daar waar die Here vir ons wys waar dit nodig is.

Soos wat ons gee en so “belê in die Koninkryk”, so word ons Sy hande wat mense iets laat beleef van ʼn God wat werklik hulle liefhet en wat ook vir hulle gee wat hulle nodig het!

Om werklik “die Koninkryk van God en Sy wil te soek”, beteken dus ten minste, dat jy ook soos wat hier bo staan, jou Koning en Here se bevele hierin sal gehoorsaam!

 

Ons het so gewoond geraak aan die prentjie van “die kerk” wat ons rondom ons sien dat ons die fout kan maak om te dink dit is hoe dit moet lyk.

As ons wil weet wat sê Koning Jesus hieroor, hoef ons maar net weer onbevange te gaan luister na wat Hy hieroor in Sy Woord deur die werking van die Gees geopenbaar het.

Ek het bykans 3 jaar lank hieroor in vorige nuusbriefies jare gelede geskryf wat uiteindelik gepubliseer is in my kommentaar oor die hele Nuwe Testament met die titel, DIE STORIE AGTER DIE STORIE. (Jy kan die boek by my of op my webblad bestel.) Hier is die skakel daarheen:

https://nuwewyn.co.za/index.php/component/j2store/products/storie-agter-die-storie

Kom ek wys jou sommer net een of twee belangrike dinge hieroor in die Woord.

Blaai saam met my na die boek, Handelinge, waar ons binne die eerste paar hoofstukke lees oor hoe God die Heilige Gees die jong Ekklesia vinnig ʼn paar dinge geleer het oor wat die hart en wil van Koning Jesus, die Hoof van die Ekklesia, hieroor is.

Kom ons begin by wat ʼn mens seker die geboortedag van die Nuwe Testamentiese Ekklesia kan noem. Handelinge 2 vertel vir ons van daardie Pinksterfees-gebeure daar in Jerusalem, toe dit wat Jesus belowe het, gebeur het.

God, die Heilige Gees, is vir die eerste keer, soos Ou Testamentiese profete reeds oor geprofeteer het, op gelowiges uitgestort. Vir die eerste keer het die Heilige Gees in God se mense kom woon, en het Hy hulle elkeen bonatuurlik toegerus met gawes van die Gees sodat God hulle bonatuurlik kon gebruik om ander te bedien deur hierdie gawes. Die Bybel noem dit “die Heilige Gees het hulle gesalf” of “op hulle” gekom.

Die gevolg hiervan was dat meer as 3000 mense tot bekering gekom het, gedoop is in water en gedoop is met die Gees, alles op daardie eerste dag.
Met ander woorde, sommer van die eerste dag af was die Ekklesia daar in Jerusalem baie meer as 3000 gelowiges wat van daardie dag af bymekaar gekom het, mekaar bedien en versorg het, en teenoor die ongelowige gemeenskap rondom hulle getuig het oor wat Jesus in hulle lewens gedoen het.

Kom ek haal vir jou Hand. 2:45 tot 47 hieroor aan:

“Al die gelowiges was eensgesind en het alles met mekaar gedeel.

Hulle het hulle grond en besittings verkoop en die geld aan almal uitgedeel volgens elkeen se behoefte.

Hulle het almal elke dag getrou by die tempel bymekaargekom, van huis tot huis die gemeenskaplike maaltyd gehou, hulle kos met blydskap en in alle eenvoud geëet, en God geprys. Die hele volk was hulle goedgesind. En die Here het elke dag mense wat gered word, by die gemeente gevoeg.”

Die Ekklesia daar in Jerusalem het binne die volgende vier jaar reeds na meer as 10 000 gelowiges daar in Jerusalem gegroei, sonder enige formele “kerkgeboue” en sonder enige formele eredienste soos ons dit vandag ken.
Wat vir ons verder van belang is, is dat daar geen “nuwe kerkgroepe of kerkverbande”, met ander name, met ʼn eie leer of belydenis, eie geboue, ens., ontstaan het nie!

Ja, selfs toe die grootste deel van die Ekklesia so 5 jaar na daardie eerste Pinksterdag, uit Jerusalem moes wegvlug (lees daaroor in Handelinge 8) na Judea, Galilea en Samaria, en ander streke en lande selfs, was die Kerk van Jesus so bewus daarvan dat die Koning gesê het hulle is EEN!

Enige poging of groep wat anders wou neig, is onmiddellik vermaan en berispe. Ja, selfs nie eers ernstige dwalinge, soos toe ʼn groep gelowiges weer wou begin om al die Joodse feeste te vier en selfs weer nuwe gelowiges wou besny, het God die Gees Paulus gebruik om in die eerste briewe van die Nuwe Testament, wat ons vandag ken as Galasiërs, vir hulle te bedien met wat Koning Jesus hieroor sê.

Het jy geweet dat ons tot en met ongeveer in die begin van die vierde een, glad nie enige ander groep, wat ons vandag as ʼn nuwe “kerk” sou kon beskryf, geken het nie?

Ek dink dit is nodig dat jy weer jou gaan vergewis oor hierdie storie agter die “Storie” wat vir ons in die Nuwe Testament vasgepen is!

Om te weet wat is waarheid en wat is leuen hieroor, en om werklik weer jou prentjie oor hoe lyk die Bybelse Ekklesia te gaan toets, vat weer ʼn slag die Bybel en begin lees weer die Nuwe Testament, en veral al die Nuwe Testamentiese boeke van Handelinge af.

En asseblief, waar nodig, bekeer jou, want die Koninkryk van die hemel moet hier op aarde, ook daar rondom jou kom!

 

Ek wil jou herinner aan wat die Lewende God in ʼn profetiese woord vir ons aan die begin van 2023 oor Sy Ekklesia gesê het daar uit Haggai. Onthou jy nog?

Kom ek haal so ʼn paar sinne uit daardie deel van die Profetiese woord hier aan.

“God is besig met ʼn “divine recovery”-proses in Sy kinders se lewens, en ja, dit is soos ʼn oorlog wat aan die gang is. Die bedoeling daarvan is om in elkeen van ons se lewe (bedoelende, jou hele lewe, elke aspek en sentimeter van jou lewe, van wie jy is, van jou verhoudinge, jou gesondheid, jou finansies, ens.) nuwe kanale en roetes oop te maak waarin Hy alles wat nodig gaan wees, kan laat instroom in jou lewe in.

Sien in jou geestesoë hoe die sluise van die hemel oopgaan waardeur God Sy seën en genade en liefde wil laat instroom in jou lewe in, sodat jy in Sy diens, weer tot seën vir ander kan wees!

Dit is in hierdie konteks en verband wat jy hierdie laaste profetiese woord moet lees en verstaan.

Hoor wat die lewende God hierdeur vir jou wil sê. Gaan raak stil aan Sy voete, met net die Bybel as Sy woord op jou skoot, en lees asseblief Haggai 1 en 2. Kyk en toets of jy ook hoor wat ek gehoor het.

Dit is wat ek gehoor het wat God nou vir elkeen van ons wil sê.

So sê die Here God: Sien julle nie en hoor julle nie? Julle is besig met soveel dinge! Of dit nou op die markplein is en of dit in wat julle kerk noem, is!

Midde al julle besig-wees, ja, selfs ten spyte van al julle besig-wees, lê My ware Ekklesia, My Liggaam, verflenter en is dit in die sigbare, niks anders as ruïnes nie!

Dink maar net daaraan dat in SA alleen noem mense meer as 30 000 verskillende “kerk”-ruïnes "hulle kerk" en glo hierdie mense dat die deel waar hulle die Here dien en aanbid, “die ware kerk is waar die volle waarheid reg geleer word en waar My Koninkryk besig is om te kom”!

Verstaan julle werklik wat julle daarmee sê en bely?

Besef julle dat julle bely dat al die ander, die ander 29 999, buiten die “kerk” waarin jy nou is, is dus...??? Vul jy maar self verder die volgende woorde in.

Is jy dan nog verbaas daaroor as jy dag en nag swoeg en sweet, maar uiteindelik onbevredig en onvergenoegd voel? Ja, dat jy steeds beleef dat daar net nooit genoeg is nie en dat jy die hele tyd hier diep binne voel dat daar tog meer moet wees as net dit!

Kom tot julle sinne en kom sit weer aan My voete om die goeie nuus van My te hoor. My hart is immers om aan julle lewe en dit in oorvloed te gee! Kom laat Ek vir jou wys hoe om die sluise van die hemel oop te trek bokant jou en jou hele lewe! Kom Ek wys vir julle wat moet gebeur as My Koninkryk weer prioriteit bo alles in julle lewens word.

Julle in die markplein, kom leer by My hoe om daar in julle besigheid en deur julle boerdery werklik My Koninkryk te soek!

Ja, dat dit begin daar waar julle begroot en beplan in julle bestuursvergaderinge. Waar julle begin beplan en begin begroot vir wat gedoen en gegee moet word sodat My Koninkryk kan kom.

En julle wat voltyds so swoeg en sweet om die derduisende ruïnes wat julle kerk noem, in stand te hou, dominees, pastore, senior leraars van gemeentes, leiers van bedieninge, kom, sodat Ek julle 'n nuwe prentjie kan wys van hoe My Ekklesia werklik lyk en moet funksioneer.

Kom sit by My voete, met net My Woord op julle skoot, en leer by My hoe om werklik in diens van My koninkryk hier op aarde, daar waar Ek jou geroep het, te doen wat Ek jou vra om te doen.

Ek is immers jou Here en Koning! Ek is jou God. En dit is beslis nie die een of ander kerkorde of leer van die kerklike ruïne of kerk waarvan jy deel is nie.
Onthou, Ek seën net gehoorsaamheid aan wat Ek sê!

Waar julle doen soos Ek sê en wat Ek sê, trek julle letterlik die sluise van die hemel bokant julle oop!

Dan sal julle My oorvloedige seën en guns belewe soos Ek belowe het! Dan sal julle beleef hoe My beloftes ook daar rondom jou en in jou lewe waar word!”

Tot sover dan hierdie profetiese woord.

Aan die begin van hierdie jaar het die Here hier in Suid-Afrika 300 leiers uit alle sektore van hierdie land byeen geroep om aan hulle ʼn strategie te gee om as ambassadeurs van die Koninkryk iets van die werklikheid van “hemel op aarde”, in diens van Koning Jesus, ʼn werklikheid te maak rondom ons in Suid-Afrika.

Die hel en die werklikheid van die hel is hier rondom ons los en dit is tyd dat ons wat volgelinge van Jesus is, moet sê: Genoeg is genoeg! Dinge moet nou begin verander!

Die vraag aan elkeen van ons is: Gaan jy deel wees van die oplossing of deel wees van die probleem? Gaan jy deel wees van die “Gideonsbende van 300” wat God wil gebruik om in Jesus se Naam, in diens van die deurbreek van Sy Koninkryk daar rondom jou, ʼn verskil te maak, of nie?

Weet jy wat was die oorhoofse tema-woord wat Koning Jesus ons gegee het, wat ons aanmekaar moes vasbind en ons leuse moes wees? “Stand as One!”

Die agtergrond hiervan was dit wat Jesus oor Sy Kerk, Sy Ekklesia, in die Woord sê: Julle is deel van My Een Liggaam, waarvan Ek die Hoof is!

Hoef ek vir jou te sê waar dit oral in God se Woord, die Bybel, staan?

Gaan lees maar dit wat Jesus self daar in Johannes 17 in Sy gebed aan die Vader gesê het toe Hy oor en oor gesê het: “sodat hulle een kan wees net soos Ons een is: Ek in hulle en U in My, sodat hulle volkome een kan wees, sodat die wêreld kan weet dat U My gestuur het en hulle liefhet net soos U My liefhet.”

Of daar in 1 Korintiërs, soos in hoofstuk 12, waar die Gees van God oor en oor vir ons die Bybelse Kerk of Ekklesia teken as EEN LIGGAAM, met baie ledemate!

Het jy gehoor? EEN LIGGAAM! Nie soos in Suid-Afrika 30 000 liggame nie!

As jy dus in ʼn deel van die ware Kerk van Jesus lokaal, daar in jou dorp of stad of omgewing, deel van ʼn gemeente is wat nog glo dat net julle “brand” van die Kerk van Jesus die ware kerk van Jesus is, dan moet jy begin luister na wat God vir jou hieroor wil sê!

As julle dink dat net julle die volle waarheid beet het, en dat al die ander daarbuite eers deel van julle “brand “ moet word, eers lidmaat by julle moet word voordat hulle die volle waarheid sal hê, moet jy weet dat julle “brand” van “kerk-wees”, of dit nou Hill Song is, of die AGS is, of dalk een van die “Gereformeerde” kerke is, is jy saam met daardie “brand” van kerk-wees besig om ʼn ander koninkryk te bou as die ware Koninkryk waarvan Jesus en die res van die Nuwe Testament oor praat!

Friday, 12 May 2023 10:05

In watter kerk is jy?

 

Ek hoop hierdie vraag het jou ongemaklik gemaak! Want iemand wat die Evangelie van Jesus en die Bybelboodskap, veral vanuit die Nuwe Testament, verstaan, behoort net een antwoord te gee op hierdie vraag, naamlik: Ek is ’n gelowige volgeling van Jesus Christus, en is dus deel van Sy een Ekklesia, Sy een Liggaam, waarvan Hy alleen die Here en die Hoof is.

Hoe belangrik is hierdie antwoord nie juis in hierdie dae nie! Rondom ons lê dit wat die wêreld ken as “die kerk”, versnipper! Bid jou aan, net in Suid-Afrika alleen, is daar meer as 30 000 verskillende “kerke” of kerklike organisasies, elkeen met ‘n eie naam, selfs eie belydenisse en leringe, eie geboue, ens.

Die tragedie word soveel erger as jy begin luister na wat elkeen te sê het oor hulleself en oor die ander 29 999!

Elkeen glo net hulle het die volle waarheid beet en daarom moet almal wat in hierdie waarheid wil glo, “by hulle aansluit of lid word”! En veral as jy ’n leraar en bedienaar van die Woord is soos ek, moet jy eers “by hulle aansluit en ’n lid of lidmaat word” voordat jy toegelaat word by die meeste van hierdie gemeentes om die Woord te bedien!

Hoekom skryf ek hieroor na verlede keer se gesprek oor hoe iemand lyk wat deel is van ‘n “skaap nasie”?

Omdat dieselfde beginsels in albei gevalle geld. Kom ek wees baie persoonlik en praat oor Afrikaanssprekendes en Afrikaners soos wat Paulus oor die Joodse volk praat waaruit hy afgestam het.

Onthou jy nog sy woorde daar in 1 Kor. 9:19 en 20?

“Hoewel ek vry is en van niemand afhanklik nie, het ek my aan almal diensbaar gestel om soveel mense as moontlik vir Christus te wen.

Vir die Jode het ek soos ‘n Jood geword om Jode te wen. Hoewel ek self nie meer onder die wet is nie, het ek my vir dié wat onder die wet staan, onder die wet gestel om hulle te wen.”

Maar tog moes hy op ’n stadium, nadat hy malesondertal die Evangelie aan hierdie Joodsevolk en taalgenote van hom verkondig het, moes hy op ’n stadium, uit gehoorsaamheid aan die roeping en opdrag van Jesus as die Hoof en Here van die Liggaam, die stof afskud van sy voete en begin fokus en homself toespits om teenoor nie-Jode (“heidene”) die Evangelie te verkondig.

Wat dit vir Paulus soveel moeiliker gemaak het, was dat hierdie Joodse volk nog boonop die volk en nasie was wat God soewerein gekies het om die “baarmoeder” te wees uit wie die Messias, die Verlosser van die wêreld gebore sou word.

Maar terwille van die waarheid moes Paulus, onder die inspirasie van die Gees, as deel van die Waarheid, daar in Kol. 3:11 sê: “Hier is dit nie van belang of iemand Griek of Jood is nie, besny of nie besny nie, andertalig, onbeskaaf, slaaf of vry nie. Hier is Christus alles en in almal.”

Ja, al is ons hart dat nasies en volke “skaap nasies” word wat die Evangelie van Jesus glo en bely, en wat Jesus as Here en Koning in elke area van hulle lewe gehoorsaam en dien, behoort ons almal, na ons weergeboorte, uiteindelik net aan die een volk en nasie, naamlik die volk en nasie waarvan Petrus onder die inspirasie van die Gees getuig daar in 1 Petrus 2:9 tot 11, as hy sê:

“Julle, daarenteen, is ‘n uitverkore volk, ‘n koninklike priesterdom, ‘n nasie wat vir God afgesonder is, die eiendomsvolk van God, die volk wat die verlossingsdade moet verkondig van Hom wat julle uit die duisternis geroep het na sy wonderbare lig.

Julle was vroeër geen volk nie, maar nou is julle die volk van God. Julle het tóé geen barmhartigheid ontvang nie, maar nou het God aan julle barmhartigheid bewys.

Geliefdes, in die wêreld is julle vreemdelinge en bywoners.”

Friday, 05 May 2023 12:15

Nou wie is werklik ʼn skaap-nasie?

 

Miskien het ek te vinnig oorbeweeg van ons oordenking van Gal. 2:19 en 20 na hierdie tema.

Sien, ek moes eers iets meer in detail verduidelik het.

Ek moes eers vir jou gewys het wat ek ontdek het oor wat dit beteken om gekruisig en begrawe te wees saam met Christus, maar NOU OOK OPGESTAAN HET IN EN SAAM MET CHRISTUS!

Want as ek dit nie verduidelik nie, gaan ons “skaap nasies” verkeerd interpreteer! Ons gaan aan “nasies” dink soos wat ons al die jare aan “Afrikaners” gedink het voor ons bekering.

Want al is en bly ek en jy Afrikaners, omdat ons eerstetaal Afrikaans is, is ons nou bekeerde, geredde, weergebore Afrikaners wat deel is van ʼn nuwe soort “skaap nasie” van Afrikaners! Sien , nou het ons deel geword van Afrikaners wat deel geword het van die Ekklesia van Jesus Christus!

Hoe sê die Heilige Gees deur Paulus vir ons in die volgende verse in die Bybel:

Rom. 10:12 – “... Dit maak dus geen verskil of ʼn mens ʼn Jood of ʼn Griek is nie, want dieselfde Here is Here van almal, en Hy seën almal wat Hom aanroep, ryklik...”

1Kor 12:13 – “Omdat ons almal een liggaam geword het, is ons almal met die een Gees gedoop, of ons nou Jood of Griek is, slaaf of vry. Ons is almal van die een Gees deurdrenk.”

Ga 3:28 – “Dit maak nie saak of iemand Jood of Griek, slaaf of vry, man of vrou is nie: in Christus Jesus is julle almal één.”

Kol 3:11 – “Hier is dit nie van belang of iemand Griek of Jood is nie, besny of nie besny nie, andertalig, onbeskaaf, slaaf of vry nie. Hier is Christus alles en in almal.”

Verstaan jy wat God se Gees besig om hierdeur vir ons te sê?

Daar het iets merkwaardig met ons gebeur toe God deur die Heilige Gees ons wederbaar het toe ons Jesus aangeneem het as Verlosser en Here.

Ons het werklik nuut geword. Ons is werklik weer ’n slag gebore, maar hierdie keer gebore as ’n nuwe mens.

Ja, ek bly steeds Afrikaner. Maar nou verstaan ek dit totaal anders. Want ek het deel geword, as deel van ’n nuwe skaap nasie, van die ware Bybelse Ekklesia, die volk van God.

Want Christo, die Afrikaner, is saam met Christus gekruisig en begrawe. En ’n nuwe Christo het saam met Christus Jesus opgestaan, wat nou ook ’n nuwe soort Afrikaner is, waar dit nie meer van belang is of hy ’n Afrikaner of ’n Griek of van watter ander nasie en volk hy voor sy dood was nie. Want hier is Christus in ons, alles en in almal van ons wat nou deel is van die Ekklesia!

 

Miskien moet jy net weer Mat. 24 en 25 gaan lees om presies te verstaan wat ek bedoel as ek praat van “skaap nasies” en “bok nasies”.

Ja, ek praat van nasies en nie net individue nie, want Jesus se opdrag aan ons is om na die “nasies” toe te gaan en om hulle, die nasies, uiteindelik Sy dissipels te maak, hulle te doop en hulle dan te leer om alles te onderhoud (te gehoorsaam) wat Jesus ons geleer het.

As ons dan praat oor hoe die Koninkryk van die hemel ook moet kom in die markplek, dan moet ons oogmerk en teiken nie net individuele sakemanne en -vroue wees nie, maar dat ons baie verder en wyer moet mik! Ons moet mik om die manier hoe besigheid gedoen word en wat ons daar doen, in ʼn hele land en nasie moet verander!

God se hart was nog altyd dat Sy mense ʼn volk en ʼn nasie moes wees wat ʼn voorbeeld vir die hele wêreld kan wees om vir hulle te wys hoe moet dinge gedoen word sodat dit tot seën kan wees vir almal en alles betrokke.

Gaan lees maar net weer ʼn slag die Ou Testament mooi en fokus op God se plan en roeping vir die Joodse volk, Israel, van die begin af.

In die Nuwe Testamentiese taal van Mat. 24 en 25, God se hart was dat Israel ʼn “skaap nasie” moes wees in alles wat hulle gedoen het en in die manier hoe hulle geleef het.

Onder Dawid was daar wonderlike dinge wat begin gebeur het in die rigting. Ja, en veral sy seun, Salomo, in die jaar 1000 v.C., het dit byna reggekry.

Onthou jy, hoe die hele wêreld na Israel begin stroom het om te kom kyk en om hulle te verwonder aan die seën van God wat oral sigbaar was in daardie land onder sy bewind!

Toe word Salomo egter maar net nog ʼn prooi van vlees en lus! Ja, en uiteindelik, in plaas van getrou wees aan net een vrou, het hy 700 vroue en jy ken die treurige uiteinde hiervan in sy gesin en lewe; om nie eers van sy kinders en nageslag se treurige verhale te praat nie!

Kom ons probeer prakties te wees en om vir mekaar te probeer wys hoe lyk ʼn “skaap nasie” dan en hoe doen hulle besigheid in die markplek.

Hiervoor hoef ons maar net te kyk na die Laaste Vraestel en die vrae wat gevra gaan word daardie laaste Eksamen met die Finale Oordeelsdag.

Luister ʼn bietjie na die vrae, soos wat Mat. 25:31 e.v. dit vir ons beskryf.

Ek wonder wie van julle raakgesien het dat die “bok nasies” nie hulle eksamen dop omdat hulle in die eerste plek hulle skuldig gemaak het aan ʼn klomp misdade van allerlei aard nie! Nee, hulle is geoordeel omdat hulle NIKS gedoen het nie!

Presies dieselfde gebeur in die gelykenis oor die talente of Minas ook: die persoon wat geoordeel word, is die een wat NIKS gedoen het nie!

Daarom is dit vir my so erg as almal rondom my kla en sleg praat oor die regering en oor skelm sakemanne en vroue in die besigheidswêreld, maar nie een van hulle begin om iets te doen om dinge te verander of anders te doen nie!

Daarom het ek my begin skaar by die groep wat begin opstaan en wat sê genoeg is genoeg, maar wat dan ook sê, kom ons begin om dinge te verander en anders te doen! Kom ons begin dinge doen en kom ons begin om dinge reg te maak!

 

 

'N TWEEDE VIDEO AAN DIE DAGBESTUUR VAN DIE FGG

Verlede keer het ek julle vertel van my video-uitnodiging aan die Dagbestuur van die Familie van Gereformeerde Gemeentes wat gekies het om hulle los te maak van die besluite van die Algemene Sinode van die NG Kerk.

Intussen het hulle gereageer en ek het beleef die Here wil hê dat ek 'n tweede video-gesprek met hulle moet aanknoop.

Hier is die skakel op YOUTUBE daarna toe.

https://youtu.be/DE31aspBYoE

As jy belangstel in 'n volledige transskripsie van die video, epos my asb.

Bid asb vir hierdie gesprek.

Baie van julle, soos ek, het ook in hierdie deel van die Liggaam van Jesus opgegroei en groot geword. En baie van ons geliefdes is nogsteeds deel daarvan. Daarom raak dit wat hier moet gebeur, ons direk!

 

Wil jy nie asseblief weer my artikel op die Net getiteld, gaan lees nie?
Hier is die skakel daarheen:

https://nuwewyn.co.za/index.php/component/k2/item/194-die-week-wat-die-geskiedenis-verander-het-die-nuutste-weergawe

Nou kan jy verder lees.

Gal 2:19b-20
“… ek is saam met Christus gekruisig, en nou is dit nie meer ek wat lewe nie, maar Christus wat in my lewe. Die lewe wat ek nou nog hier lewe, leef ek in die geloof in die Seun van God wat sy liefde vir my bewys het deur sy lewe vir my af te lê.”

Hierdie teksgedeelte vertel wat in ons lewe plaasgevind het op daardie dag wat ons die eerste keer tot bekering gekom en Jesus as Verlosser en Here in ons lewe aangeneem het.

My bekeringsdatum was 10 Oktober 1969. Wat is joune?

As jy nie werklik ʼn dag en datum het nie, wil ek voorstel dat jy vir jou een kies! Kies vir jou daardie dag en datum wat jy vir die eerste keer kan onthou hoe jy die boodskap van die Evangelie gesnap en dit begin glo het, naamlik dat Jesus aan die kruis vir jou en jou sondes gesterf het.

Maak daardie dag en datum jou pen in die grond. Soos in die verhaal wat vertel word van daardie ou man in een van hierdie afgeleë gebiede vir ʼn week by ʼn reeks Evangelisasiedienste was. Elke aand wat daar ʼn geleentheid was om Jesus aan te neem as Verlosser en Here, het hy na vore gekom en dit weer gedoen.

Toe hy die vierde aand weer na vore kom, roep die Evangelis hom na die tyd en vra vir hom waarom hy, nou vir die vierde keer, weer Jesus in die openbaar kom aanneem het. Die ou man verduidelik toe hoe hy elke keer, die volgende dag, maar weer begin twyfel het aan sy kindskap.

Dit is toe dat die Evangelis ʼn tentpen en ʼn hamer vir hom gee en vir hom aansê om dit buite die tent in die grond te gaan kap sodat net ʼn stukkie van die pen bly uitsteek. En as hy ooit weer begin twyfel aan sy kindskap en redding, kan hy na daardie pen in die grond kom kyk en daar vir homself sê: So seker as wat ek hierdie pen in die grond sien staan, so seker kan ek wees, sê die God wat nie kan lieg nie, vir my in die Woord, daar in Johannes 1:12:

“Maar aan almal wat Hom aangeneem het, dié wat in Hom glo, het Hy die reg gegee om kinders van God te word.”

Nou kom die Here en sê vir my en jou wat Jesus aangeneem het as Verlosser en Here: Al het jy dit nie mooi al daardie eerste dag met jou bekering verstaan nie, toe reeds het God reeds gesien hoe jy, die ou jy, saam met Christus gekruisig is. Ja, kom ons sê maar jy het daar aan die agterkant van die kruis, in God se oë, gehang en daar is jy saam met Christus gekruisig.

Ek weet nie of jy weet nie, maar daar is net een rede waarom ʼn mens gekruisig is word is dit is om jou dood te maak!

Wat hier in Gal. 2:19b en 20 in werklikheid staan, is dat jy, jou ou jy, in geloof moet aanvaar dat dit vir jou en almal rondom jou, beter is dat die ou jy maar net weer kies om te glo wat God oor jou sê as Sy volgeling: Jy moet in geloof weer kies dat die ou jy dood is, en weer ʼn keer die beheer in jou lewe oorgee aan Christus deur Sy Gees.

Daarom moes die ou jy daardie dag wat jy tot bekering gekom het, ook begrawe word, anders het jy die hele tyd gestink, soos ʼn lyk immers doen!

Dit is waarom nuwe bekeerlinge, daardie eerste dag wat hulle tot bekering gekom het, deur die vroeg-Christelike gemeentes gedoop is in water om so hulle begrafnis te simboliseer. (Gaan lees maar net weer Hand. 2:36-39 en Rom. 6 in die verband).

Goddank, die dag toe hulle jou so gedoop het in water, het hulle jou nie onder die water gelos nie, want God self sê immers dat die nuwe jy, na jou bekering, ook saam met Christus opgestaan het uit die dood! Sodat jy, as ʼn nuwe mens, nou saam met Christus, in Christus, met Christus in jou, kan lewe in diens van Christus en Sy Koninkryk wat moet kom!

Kou ʼn bietjie hieraan! Kou ʼn bietjie daaraan dat God sê dat dit beter is vir jou, jou eggenoot in die huwelik, jou kinders, al jou geliefdes, en vir al jou vriende en almal wat jou ken, dat jy, die ou jy, met al jou dinge, met al jou slim planne en idees, al jou voorkeure en afkeure, ja, dat jy daardie ou jy, so gou moontlik, in geloof, as dood reken!

Eers dan, en alleenlik dan, kan die Opgestane Christus Jesus, wat self in jou as bekeerde en gelowige volgeling van Jesus woon deur Sy Gees, deur die Heilige Gees, die beheer oorneem (soos Gal. 5:16 e.v. dit beskryf), en eers dan kan dit wat hier in Gal. 2:20 staan, ook in praktyk, waar word in jou lewe.

Eers dan is dit nie meer die ou jy wat lewe nie, maar Christus wat in jou lewe.

Die lewe wat jy nou nog hier op aarde lewe, leef jy nou in die geloof in die Seun van God wat sy liefde vir jou bewys het deur sy lewe vir jou af te lê.

 

 

WIENS BROOD MENS EET, DIENS WOORD MENS SPREEK!

Dit was die rede waarom die Here my in 1993 opdrag gegee het om te bedank as leraar van die NG Kerk, en dit is die uitdaging waarvoor elke leraar en belydende lidmaat van die FAMILIE VAN GEREFORMEERDE GEMEENTES (FGG, of voorheen die KAIROS NETWERK) staan wat moet besluit of hulle finaal gaan uitstap uit die NG Kerk.

Ek lees juis vanoggend Josua 24 waar Josua se laaste woorde aan die volk van Israel was: Ek en my huis het gekies om net God te gehoorsaam! Maar wat van julle? Wie gaan julle dien? Wie gaan julle gehoorsaam?

Ek het beleef dat die leierskap van die FGG tans huiwer om 'n besluit in die verband te neem, en nog oortuig is hulle kan die NG Kerk "van binne-af" reformeer!

Daarom het ek 'n uitnodiging aan die leierskap gerig om my en ander toe te laat om hulle te help om landswyd elke gelowige geleentheid te gee om net met die Bybel op hulle skoot, by God self te hoor wat Hy sê wat werklik die waarheid is en wat leuens is!

Hier is die skakel na die video-opname wat ek vir hulle gestuur het in die verband.

https://youtu.be/X2vXzFy4wjA