Nuusbrief (240)
My geskenk aan jou vir hierdie rustyd
Ek het beleef die Here wil hê dat ek elkeen van julle wat so getrou week na week hierdie SLUKKIES NUWE WYN saam met my proe-proe drink, moet seën met iets besonders!
En hier is dit:
Vyf Potgooie
My BOTTEL NUWE WYN aan jou en jou geliefdes, waaraan jy vir die volgende paar weke slukkie-slukkie kan proe, is
5 POTGOOIE - Wat jou toerus en jy kan ontdek hoe God elkeen van Sy kinders wil gebruik in die gawes van die Gees.
Hier is die skakel daarheen: https://anchor.fm/dr-christo-nel
Jy sal ontdek in hierdie Potgooie dat ek verwys na 'n dokument met die betrokke teksgedeeltes waarna ek deurentyd verwys. As jy belangstel in hierdie dokument, epos my asb by This email address is being protected from spambots. You need JavaScript enabled to view it. en vra dit vir my.
En daarmee groet ek jou vir 'n paar weke tot vroeg in Januarie 2023.
So die Here wil, hoor jy weer op 12 Januarie 2023 weer van my af.
En ja, dan gaan ek ook aan jou die PROFETIESE WOORD VIR 2023 deel wat ek die afgelope tyd by die Here gehoor het.
Geniet intussen die paar weke oor die feestyd saam met jou geliefdes!
Mag julle die Here se teenwoordigheid, liefde en vrede elke dag ervaar gedurende hierdie tyd!
Wees 'n tuinslang wat God se genade herlei
Wees 'n getuie elke dag waar jy kom as ambassadeur van die Koninkryk van God en wees God se hande en mond daar waar jy beweeg en leef!
En deel met blydskap van veral die finansiële seën waarmee die Here jou en jullie besigheid of boerdery geseën het. Wees jy maar net sensitief vir die Here se stem in die verband.
Liefde
Christo en Hetta Nel
Gebruik God se model vir die ekonomie vir vandag
Die afgelope tyd het ons vir mekaar uit die Woord gewys hoe Jesus baie strategies maar ook baie prakties die realiteit van die Koninkryk van die hemel wat ook nou hier op aarde is, in die markplek en in die ekonomie begin bedien het in die tyd wat Hy mens was hier op aarde. Nou is die vraag natuurlik: Hoe kan ons hierdie model van God vir die ekonomie vandag rondom ons gebruik in die markplek en wat ons daar moet doen as ambassadeurs van hierdie nuwe Koninkryk? Hoe kan ons midde al die gierigheid, selfsug, korrupsie, misdaad, bedrog, uitbuiting en menslike lyding prakties die goeie nuus van die Koninkryk en die lewe en oorvloed wat dit tot gevolg kan hê, bedien? Hoe skep ʼn mens ʼn alternatiewe kultuur in die markplek wat nie gedryf en gemotiveer word deur gierigheid en selfgesentreerdheid nie, maar wat eerder omgee, ware liefde en mededeelsaamheid kommunikeer? As ons werklik die beloftes en woord van Koning Jesus glo, oor lewe en dit in oorvloed wat volg as ons Hom en Sy metodes volg, gaan ʼn ekonomie waar die kultuur en dryfkrag van werklike omgee en bereidheid om met ander te deel, ʼn plek word waar almal wat besigheid doen, voordeel trek en seën en groei beleef, in plaas daarvan dat net sommige voordeel trek en die res die een of ander tyd bankrot word en in armoede verval. Midde ʼn baie siek ekonomiese en sosiale sisteem wat gedryf is deur gierigheid en selfgesentreerdheid, het Jesus vir ons in Matteus 24 en 25 ekonomiese beginsels kom neerlê van hoe lyk ʼn nuwe nasie en generasie wat voor die Regterstoel van God eendag onder “die skape” geklas gaan word en God se ewige beloning gaan ontvang. Dit gaan sakemanne en -vroue wees wat daar in die markplek, as ek honger is, bereid is om my te voed; as ek dors is, vir my iets gaan gee om te drink; as ek naak en sonder klere is, vir my iets gaan gee om aan te trek; as ek dakloos is, vir my ʼn dak oor die kop gaan gee; as ek in die tronk is, my kom besoek. So, sê die nuwe Koning wat besig is om die Koninkryk van die hemel hier op aarde ʼn werklikheid te maak, so lyk dit in die markplek waar die koninkryk begin deurbreek! Maar, sê dieselfde Jesus, aan diegene wat daar in die markplek maar net soos die res van die wêreld om hulle gierig en selfgesentreerd besigheid doen, julle wat niks aan die nood om julle doen nie, julle is gedoem en julle uiteinde is die hel! Het jy gesien wat die verskil volgens Matteus 24 en 25 was tussen diegene wat eendag voor die Troon van God as skape geklassifiseer gaan word en diegene wat eendag as bokke geklassifiseer gaan word? Die enigste verskil tussen hulle gaan wees dat diegene onder die bok-nasies, nie daar is omdat hulle groter sondaars was as die res nie! Nee, hulle is deel van die bok-nasies net omdat hulle niks gedoen het om ʼn verskil te maak aan die nood en lyding wat hulle elke dag rondom hulle in die markplek gesien het nie! Vriende, daar is dus nie vir my en jou, as volgelinge van Jesus, enige ander opsie in die markplek as om Jesus en Sy model vir die ekonomie te volg nie! Daar is eenvoudig nie vir ons ʼn opsie om niks te doen of net aan te gaan soos voorheen nie! Ons kan nie net staan en toekyk, terwyl al hierdie seer en lyding en onreg rondom ons in die markplek gebeur nie. Daarom sal ons moet leer hoe om as ambassadeurs van die Koninkryk Koning Jesus en Sy model te volg in besigheid. |
Laat My Mense gaan!
Ons is besig om die afgelope tyd te kyk hoe Jesus as die nuwe Koning, in die drie jaar tot Sy beskikking hier op aarde, die koninkryk en beheer van die magte van die hel baie strategies en bepland kom af te breek het. So het Hy Sy woorde daar reg aan die begin hiervan, bevestig, naamlik: Bekeer julle, draai om, begin anders dink, kyk anders na dinge, doen dinge anders, want ʼn nuwe seisoen het hier aangebreek! Hierdie wêreld het ʼn nuwe Koning gekry. Ons het reeds gesien hoe Hy stelselmagtig die hele korrupte Joodse tempel- en bankstelsel een stroompie na die ander, gaan toesteek het. Natuurlik het Jesus ook direk gegaan vir die slagaar van ʼn demoniese korrupte ondier wat elke mens in die omstreke van Judea, Palestina en Galilea se lewe hel gemaak het. Omdat Hy die nuwe Koning was, sou daar vir elkeen van Sy volgelinge ʼn radikale lewenskeuse voorlê, naamlik wie het uiteindelik die finale sê in jou lewe! Ja, God stel elke owerheid aan en gee aan hulle outoriteit om in daardie gebiede waar hulle beheer het, te sorg dat alles ordelik, reg en regverdig sal gebeur vir elke mens onder hulle beheer. Dit het dus natuurlik ook vir die Romeine en Rome se bewind in daardie gebied gegeld. Maar daar waar hierdie regerings en hulle beleid in stryd kom met die beleid van die nuwe Koning, moet ons kies! Met Sy dood aan die kruis, het Jesus gesê: Ek het nou met My bloed en lewe, die mag van sonde, die hel en al sy magte en gesante wat hy gebruik, se slagaar finaal kom afsny en die houvas en mag van hierdie sondige korrupte stelsel in hierdie wêreld op julle lewe te kom breek. Dé, hier is ʼn sleutel, met die meegaande outoriteit, waarmee julle nou na elke mens op aarde kan gaan met die Goeie Nuus dat verlossing en bevryding moontlik is. Ja, het Jesus gesê: Ek het gekom sodat daar vir elkeen lewe en dit in oorvloed in elke opsig en vir elke deel van jou lewe moontlik is. Ek het immers nou ʼn nuwe koninkryk hier op aarde kom vestig wat hierdie lewe en hierdie oorvloed belowe aan elkeen wat werklik kies om te glo dat Ek dit ook vir hulle gedoen het en wat gewillig is om My en My beleid, as die nuwe Koning, onvoorwaardelik gehoorsaam te volg! So, op hierdie manier, met hierdie baie strategies gefokusde bediening, het Jesus ons begin leer hoe om korrupsie, bedrog, misdaad, alle gierigheid en selfgerigtheid, wat immers die wortels is van al die menslike ellende en lyding wat ons rondom ons vandag sien, aan te spreek. Hier dink ons aan dinge soos mense in haglike armoede, dakloos, slagoffers van mensehandel, hongersnood, rassisme, en elke ander -isme uit die hel waaraan jy kan dink. Dit is wat Jesus fisies hier op aarde kom aanspreek het en wat Hy ons nou stuur om as ambassadeurs van hierdie nuwe Koninkryk fisies te gaan aanspreek, daar waar die tekkie die teer tref, in die moderne markplek vandag. |
Nog inkomste-strome na die tempel toe, word toegestop
Ons is besig om ons te sit en verwonder aan die doelbewuste strategie waarmee Jesus in daardie drie jaar van Sy openbare bediening, oral duidelike bewyse gelewer het dat hier Iemand nuut aan bewind was hier op aarde.
Mense kon dit duidelik sien en hoor oral waar Hy was en oral waar Hy beweeg en bedien het.
Verlede keer het ons mekaar begin vertel hoe Hy doelbewus die een inkomste-stroom na die ander na die tempel en die korrupte godsdienstige leiers daar begin toestop het!
Ek wil jou ʼn bietjie meer van hierdie doelbewuste strategie van Jesus wys.
Een van die belangrikste dinge wat Jesus begin doen het, was om mense se sondes te vergewe!
Onthou jy, daardie verlamde man wat deur sy vriende deur die dak voor Jesus neergelaat is toe daar net te veel mense rondom Hom was om hulle vriend by die deur in te kry?
Onthou jy wat Jesus vir hom gesê het net voordat Hy hom genees en laat opstaan het? Ja, Jesus het vir hom gesê: Jou sondes is vergewe!
En dit sonder dat die man eers vir Jesus daarvoor betaal het!
Ja, want dit is wat die mense moes doen as hulle na die godsdienstige leiers by die tempel toe gegaan het met die versoek om tog God te bid en te vra dat Hy tog hulle sondes moet vergewe! Daarvoor moes die reeds-verarmde Joodse gemeenskap sakke vol geld betaal het!
Jesus het ook baie verder gegaan as net dit! Hy het duisende en duisende mense verniet kos gegee en gevoed!
So, baie doelbewus en strategies, het Jesus die een na die ander van die inkomste-strome na die tempel en sy korrupte leiers toe afgesny en toegestop!
Kom ons dink net ʼn bietjie verder hieroor. Dink ook oor die manier hoe Jesus hierdie derduisende mense kos gegee het! Hoe Hy vir hulle, in die proses, gewys het dat as jy bereid was om jou klein porsie (soos jou padkos van ʼn paar broodjies of ʼn vissie of twee) vir die Koning van die nuwe Koninkryk te gee wanneer Hy dit vra, Hy dit bonatuurlik kan vermeerder en jou, saam met derduisende ander, kan voed. Maar op so ʼn merkwaardige wyse dat daar, selfs agterna, bonatuurlik, baie meer gaan oorbly as wat jy in die begin gegee het!
Kom stap saam met my verder, hierdie keer na die tempel toe, om te kom kyk hoe Jesus daar op die tempelterrein die hoof-inkomstestroom van die tempel, toemaak.
Dit is wat Hy in daardie laaste week voor Sy kruisiging gedoen het toe Hy die geldtafels omgegooi het. Hy het letterlik hulle tempel-bank laat bankkrot speel daardie dag!
Die godsdienstige leiers was immers besig was om naïewe tempelgangers te beroof van hulle geld deur die tempel-banksisteem wat hulle in plek gesit het.
In hulle naïwiteit het gewone mense geglo wat die leiers vir hulle gesê het, naamlik dat hulle gewone geld nie goed genoeg vir God was nie, en dat die diere en offers wat hulle saamgebring het van hulle plase af, ook nie goed genoeg was nie. Nee, dit moes alles geruil word vir dit wat beter is, naamlik dit wat hier by die tempel aan hulle in ruil daarvoor verkoop is.
Soos Lukas ons in sy vertelling van die gebeure vertel, het Jesus letterlik die tempel-“bank” daar toegemaak en bankrot gemaak toe Hy almal daar uit die tempelterrein uitgejaag het met ʼn sweep!
Dan, wat die finale spyker in die tempel se doodskis sou wees, drie-uur daardie Woensdagmiddag, 9 April 32 n.C., toe Jesus Sy laaste asem uitblaas en so Sy lewe as die finale offer vir sonde gegee het, is die dik gordyn wat tussen die Heilige en Heiligste in die tempel was van bo na onder stukkend geskeur deur God self.
Daardie Heilige skeiding waardeur die Hoëpriester net eenkeer ʼn jaar gewaag het om in te gaan na die Aller-heiligste toe, is letterlik uit die hemel uit, stukkend geskeur.
Nou was daar geen rede meer waar janalleman ooit weer in die toekoms na ʼn gewone tempelgebou toe met sy godsdienstige leiers toe hoef te kom, om so toegang te hê tot die enigste ware en lewende God nie! Elke mens kon nou self na hierdie God toe kom en self in Sy teenwoordigheid verskyn, sonder om in hierdie proses te sterf. Want Jesus het die weg hiervoor voorberei as ons elkeen se Finale Versoeningsoffer en Middelaar!
So is die heel laaste stukkie en laaste inkomste-stroom na die tempel en godsdienstige leiers toe finaal afgesny.
So is ʼn Nuwe Weg na die Vader voorberei en geskep, wat die hele bloedoffer-sisteem systap en totaal irrelevant en onnodig gemaak het.
So word die totaal korrupte tempelstelsel en offerstelsel van die Judaïsme, uit die pad van gewone mense gevee deur die Lewende God self, want nou was daar ʼn ander manier, ʼn nuwe Deur, waardeur enigeen kon ingaan met vrymoedigheid na ʼn Hemelse Vader toe wat nie wil hê dat enigiemand verlore sal gaan nie.
So het Jesus se strategie gelyk!
Ons is besig om te kyk hoe Jesus se strategie en plan gelyk het om oral rondom Hom sigbare resultate agter te laat wat getuienis kan wees dat die Koninkryk van die hemel werklik hier op aarde deurgebreek het! Almal wat wil, moet dit kan sien dat hier nou iemand anders in beheer is. Daarom lyk dit nou hier anders as elders en daarom word dinge hier anders gedoen as elders. Omdat die verrotting en korrupsie in Jesus se tyd veral bo, in die topstrukture van die geestelike Joodse leiers gelê het, was Jesus se strategie om die inkomste-strome na hulle toe en na die tempel toe af te sny. Daarom het Hy begin om die belastinggaarders te bedien en te red, want hulle was kop en een mus met die korrupte godsdienstige leiers en was van die belangrikste toevoer-kanale wat geld laat stroom het na die tempel se bankrekening toe. Dit is waarom Jesus Levi, een van die topleiers onder die belastinggaarders, geroep het om Hom te begin volg, maar onmiddellik daarna sy Latynse Romeinse naam verander het na Matteus. Dieselfde Levi het saam met hom byna ʼn honderd ander belastinggaarders na sy huis genooi die dag toe Jesus kom kuier het. En hulle het weer later ander gebring. En almal van hulle is gered en het ambassadeurs en tuinslange geword van ʼn ander koninkryk as die een wat hulle voorheen gedien het. Toe red Jesus Saggeus, en dieselfde gebeur ook rondom hom. Onthou die groter prentjie en die strategie van Jesus! Die volgende deel van Jesus se strategiese plan was om die mense gesond te begin maak, maar sonder om vir hulle geld daarvoor te vra. Ek weet nie of jy onthou nie, maar destyds, in Jesus se tyd, was dit godsdienstige leiers ook die dokters van hulle tyd. Mense het na hulle toe gekom in die hoop dat hulle gesond sal word. Soos daardie vrou wat aan bloedvloeiing vir jare en jare gely het. En oor die jare sakke en sakke vol geld betaal het vir die “dokters” maar nooit gesond geword het nie! En hier kom Jesus, die nuwe Koning van ʼn nuwe koninkryk, en maak almal wat siek is, gesond, verniet! En nadat Hy hulle gesond gemaak het, stuur Hy hulle na die tempel toe en na die priesters toe om vir hulle te gaan “be-wys” dat hulle nou gesond is sonder dat hulle eers daarvoor betaal het. So word nog ʼn inkomste-stroom na die tempel toe, toegestop! |
Die wêreld in Jesus se tyd
Kom ons kyk ʼn bietjie krities na die ekonomie in Israel in die jare 28/29 tot 32 n.C., toe Koning Jesus hier in die openbaar begin leer en optree het. Wat ʼn mens ontdek as jy die Evangelies en navorsingsmateriaal oor daardie tyd deeglik bestudeer, skud jou tot in jou fondamente. Dan sien ons hoe die leiers in die gemeenskap, of hulle nou godsdienstige leiers was of leiers in die regering, janalleman in Israel geplunder en besteel het totdat sowat 80 tot 90 persent van hulle brandarm en uitgehongerde slawe was. Selfs mense wat geroem het daarop dat hulle deel was van God se godsdienstige volk, Israel, moes uiteindelik alles wat hulle gehad het verkoop en dit sluit eiendom, plase en selfs hulle kinders in, om hulle skuld aan, kan jy glo, die godsdienstige leiers van daardie tyd, te probeer terugbetaal. Die tempelpriesters, die fariseërs, die Sadduseërs, met ander woorde, die godsdienstige leiers en leraars van die volk, was tot in hulle siel toe verrot en korrup en het hulle eie mense uiteindelik brandarm geplunder en besteel. In hierdie gemeenskap en tyd is Jesus, die nuwe Koning op aarde, gebore, as lid van ʼn gesin wat, soos die res van die gemeenskap, brandarm was as gevolg van die plundering en misdaad van hierdie selfde mense. Dit is waarom Jesus gedoen het wat Hy gedoen het, en gesê het wat Hy gesê het. Daarom was Sy eerste woorde aan hulle: Bekeer julle, want die koninkryk van die hemel het naby gekom, is hier! Maar Jesus was ook nie naïef nie. Hy het onmiddellik gesien en geweet dat hulle nie gaan verander nie. Hulle het te veel gehad om te verloor. Hulle was beslis nie bereid en gereed om die gans wat die goeie eiers lê, sommer net weg te gee nie. Daarom het Koning Jesus begin om baie strategies en met ʼn baie besliste plan op te tree. Ek glo dit is die eerste ding wat enige sakeman of vrou, wat volgelinge is van die Koning van alle konings, moet weet: Ons het nodig om so gou moontlik ʼn baie besliste strategie vir die markplein te ontwikkel as ons enigsins iets van die Koninkryk van die hemel hier wil sien deurbreek. Dit is van lewensbelang vir die Koninkryk dat ons sigbare bewyse sal oplewer wat ons kan gebruik as getuienis dat die Koninkryk van die hemel besig is om hier op aarde deur te breek. Dit is van kardinale belang as deel van ons getuienis na binne en veral na buite dat hierdie strategie sal insluit dat dit sigbare bewyse en resultate sal oplewer sodat die res van die ekonomiese gemeenskap rondom ons deeglik daarvan kennis sal neem terwille van die toekoms van hulle eie besighede. Vriende, as ons werklik glo wat die Koning sê, moet ons ook kennis daarvan neem dat Hy ook vir die markplek gesê het: Ek het gekom dat julle die Lewe kan ken en dit in oorvloed! En dat hierdie Lewe en oorvloed beslis nie net vir Sy volgelinge betekenis en waarde het nie, maar ook vir elke besigheidsman of vrou, of ekonomiese instelling, of selfs vir elke regering van die dag, betekenis en waarde het. Dit is vir elke mens op aarde van lewensbelang! Daarom, en daarmee wil ek hierdie gedeelte afsluit, kan ons nie langer bekostig om oor die koms van die Koninkryk van die hemel hier op aarde te gesels en te preek asof dit ʼn fantasieverhaal is en asof dit eers eendag, wanneer Jesus kom, werklik gaan gebeur en waarde gaan hê nie! Kom ons wees net logies! Watter betekenis het die koms van die Koninkryk eers eendag, nadat Jesus Christus weer gekom het? Dit is mos malligheid om so daaroor te praat en so daaroor te dink! Die koms en werklikheid van die koninkryk van die hemel, as ʼn sigbare, ervaarbare realiteit, al is dit voorlopig, gebrekkig, onvolledig, onvolmaak selfs, het net betekenis en kan net mense se lewens, die ekonomie, besighede, ens., verander, as dit nou, hier midde al die stukkendheid van ons wêreld en hier in die nou op die markplein, begin deurbreek en sigbaar ʼn werklikheid word! |
Bly doelbewus aan die Koning se voete
Almal praat so van “mindfulness” deesdae. Bedoelende om te kies om doelbewus in die oomblik, in die nou te bly en nie toe te laat dat ʼn besig-wees met gister en die verlede se dinge, of jou bekommernis en vrese oor môre, die lekker en die voorreg van wat jy nou beleef en waar jy nou op hierdie oomblik is, in die proses verdring en leeg verbygaan nie. So glo ek, om werklik ʼn daadwerklike impak as ambassadeur van die hemel hier op die aarde en spesifiek in die markplein te maak, moet ek en jy doelbewus kies om aan die voete van ons Koning te bly sit, met ore wat sensitief is vir die stem en leiding van Sy Gees wat in ons woon. Sodat ons presies elke oomblik kan weet wat die hart en wil van ons Vader en ons Koning in elke situasie is. My verhouding met die Vader, Koning Jesus en die Heilige Gees is immers hierdie intieme, oomblik-vir-oomblik, liefdesverhouding en bewus-wees van Sy heerlike teenwoordigheid en besig-wees in my en almal om my se lewens. Daarom begin my dag, elke dag, eerstens, met ʼn stil gaan sit in Sy teenwoordigheid, waar ek Hom in die oë kyk en ek my dankbaar kan verlustig in Sy liefdevolle, versorgende, beskermende arms om my. Ja, soos ek baie keer vir angstige en gespanne mense leer, gaan lê ek baie keer op die mat, haal ʼn paar keer doelbewus met my diafragma vir vier tellings diep asem, hou dit vier tellings in en blaas dit vir ses tellings stadig uit. So trek ek God se lewegewende suurstof en lewe in, hou dit vir ʼn oomblik in en begin dan al die spanning, angstigheid, bekommernis en dood in my uitblaas. So begin ontspan ek net daar op die mat, asof ek as’t ware op die Here se handpalm veilig lê, versorg en beskerm. En so vergeet ek dan van my asemhaling, terwyl ek elke stukkie van my liggaam, van my tone af stukkie vir stukkie oorgee en laat rus in Sy handpalm. Tot by my kop en gesig. So rus ek dan daar in Sy teenwoordigheid doelbewus vir so 20 minute. Om dan op te staan en met Sy Woord, die Bybel, in my hande, te gaan sit en luister na wat Hy vandag vir my wil sê uit die gedeeltes wat ek lees uit Sy Woord. Gewoonlik lees ek so drie gedeeltes: ʼn hoofstuk of twee uit die Ou Testament, ʼn gedeelte uit die Psalms en digterlike gedeeltes uit die Ou Testament, en dan ook ʼn hoofstuk of twee uit die Nuwe Testament. Meestal volgens ʼn bepaalde leesprogram, sodat ek die hele Bybel in ʼn jaar se tyd kan deurlees. Terwyl ek lees wat daar presies staan, luister ek doelbewus om te hoor wat God self vir my vandag wil sê. As ek klaar gehoor het wat Hy wil sê, mediteer ek daaroor en kies ek een of twee maniere hoe ek vandag daarop moet reageer of tot aksie moet oorgaan. Heeltyd gesels ek met Hom en gesels Hy met my terug. Hierdie gesprek gaan dwarsdeur die dag aan. Natuurlik ook met lang tye van skynbare stilte, soos hoort in ʼn ware liefdesverhouding, waar ons nie nodig het om heeltyd te praat om mekaar se harte te hoor nie. So bly ek sensitief vir Vader, Koning Jesus en die Gees se stem. Om my gedurige bewus te hou dat ek ʼn Pappa in die hemel het, wat die Koning is. En dat ek Sy kind is. Maar ook dat ek ʼn toegeruste, aangestelde ambassadeur van die hemel is wat vandag hier op aarde is, op bepaalde verhoë en in uit-die-hemel-gereelde ontmoetings met mense, om daar my God en Koning te verteenwoordig en Sy hart daar te laat gebeur of te laat hoor. Ook daar in die markplein, doelbewus, vandag! |
Pas ook op vir die invloed van die suurdeeg van Herodes
Markus 8:15Ek wil met jou verder gesels oor wat Jesus daar in Markus 8:15 gesê het: “Pas op, wees op julle hoede vir die suurdeeg van die Fariseërs en die suurdeeg van Herodes.” Hierdie keer wil ek met jou gesels oor die invloed van die suurdeeg van Herodes op ons manier van dink en doen. Hier gaan dit oor niks anders nie as die ateïstiese invloed en lering wat ons elke dag mee gevoer word in die wêreld daarbuite, sy dit deur die media, die politiek van die dag, die tipiese ekonomiese magsisteme, of dit wat ons as studente in besigheidskole en op universiteitsbanke geleer word. Dit gaan dus hier daaroor dat ons geleer word om op ʼn bepaalde manier te dink of besigheid te doen, of te beplan asof God, of die bonatuurlike, of wonderwerke, nie werklik gebeur of bestaan nie. Weet jy hoe sê hulle dit vir jou? Praktiese ateïsmeHulle sê vir jou dinge soos: “God help net diegene wat hulleself help!” Of: “Jy is die antwoord op jou eie vrae!” Of: “Gebed gaan nie hier werk nie. Staan op en doen wat jy moet doen!” Of: “Goeie besigheidsmanne en -vroue is self-gemaakte mense!” Moenie dink dat hierdie suurdeeg net in die wêreld daarbuite ʼn gevaar is nie! Dit is ook een van die groot uitdagings in die kerk vandag dat ons sit met ʼn manier van dink en optree wat ek niks anders kan noem as praktiese ateïsme nie. Soveel mense wat hulleself as Christen-gelowiges beskou is prakties ateïste. Hulle tree op, praat en dink soos mense wat nie glo of weet dat daar ʼn aktiewe, lewende God in hulle eie lewe en rondom hulle besig is nie. Natuurlik sal hulle dit nooit so sê nie. Nie een van hulle, of een van hierdie gemeentes of kerke sal openlik en eerlik bely dat daar nie werklik ʼn God is nie. Tog tree, praat en dink hulle op so ʼn wyse wat glad nie met die bestaan of werklikheid van ʼn lewende God rekening hou nie. Hulle tree daarom presies soos die ongelowige wêreld rondom hulle op as hulle voor uitdagings te staan kom of as hulle gevra word om standpunt in te neem oor ʼn bepaalde saak. Dit kom nie eers by hulle op om te probeer seker maak oor wat God oor hierdie saak te sê het in Sy Woord, die Bybel, nie. Die Bybel het immers lankal by hulle maar net een van baie gewone boeke geword, en is boonop ʼn baie ou boek vol ou, uitgediende sieninge en menings! Soveel mense dink dat Suid-Afrika ʼn Christelike godsdienstige land is. Oor die sewentig persent van sy inwoners sê immers dat hulle lede van die een of ander Christelike kerk sou wees. Maar kyk maar net rondom jou na wat in hierdie land onder hierdie sogenaamde godsdienstige mense aangaan! Dan besef jy mos sommer gou dat ons dalk hier ʼn godsdienstige dop het, maar in die hart of kern, sit ons met ʼn siek, totaal ateïstiese gees of suurdeeg wat alles om ons siek, korrup en totaal liefdeloos maak. Rom. 12:1,2Daarom is die oproep van Romeine 12, vers 1 en 2, in my eie woorde, so relevant: Die feit dat julle lyk, en optree, en dink soos die res van die wêreld rondom julle, wys tog dat iets geweldig fout en vrot is! Laat toe dat God in Sy genade kom en dat Hy julle gedagtes sal vernuwe! Mag Hy julle verras en onverwags, wonderlik, skielik, self voor en by en in julle lewens verskyn, dat julle sal neerval voor Sy voete en Hom sal smeek om tog julle hart en gees en gedagtes te kom nuut maak en totaal sal verander en sal deursuur met die Goeie Nuus van die Koninkryk van die hemel wat hier op aarde wil deurbreek en gesien wil word. |
Pasop vir die soort suurdeeg
In Mat. 13:33 lees ons: “Hy het hulle nog ʼn gelykenis vertel: "Die koninkryk van die hemel is soos suurdeeg wat ʼn vrou gevat en in ʼn groot skottel meel ingewerk het totdat dit heeltemal deursuur was.” In Markus 8:13-21 praat Jesus weer oor suurdeeg, maar hierdie keer oor twee ander soorte suurdeeg, en die keer in ʼn negatiewe sin daarvan. Ons lees: “Die dissipels het vergeet om brood saam te vat; hulle het net een by hulle in die skuit gehad. Jesus het hulle toe gewaarsku: Pas op, wees op julle hoede vir die suurdeeg van die Fariseërs en die suurdeeg van Herodes.” Gaan lees verder die stukkie in jou eie Bybel en dan sal jy sien dat Jesus hulle herinner aan die gebeure waarvan ons laas gepraat het in Markus 6 waar Hy die brood en die vissies vermeerder het en hulle gebruik het om bykans 15 000 mense kos te gee. Wat bedoel Jesus as Hy hulle waarsku teen “die suurdeeg van die Fariseërs” en “die suurdeeg van Herodes”? Soos wat die realiteit van die Koninkryk van die hemel ons verstand en gedagtes, en ons manier van lewe ook op die markplein moet deursuur en ingrypend verander, so is daar ook twee ander soorte suurdeeg wat ons manier van dink en ons lewe ingrypend negatief kan beïnvloed. Kom ons gesels hierdie keer net oor “die suurdeeg van die Fariseërs”. (Volgende keer gesels ons oor die suurdeeg van Herodes.) Jesus verduidelik wat Hy hiermee bedoel daar in Markus 12:24 as Hy vir die Fariseërs sê: “Is die rede waarom julle dwaal, nie juis dat julle nie die Skrif ken nie en ook nie die krag van God nie?” Dit gaan dus hier oor tipiese godsdiens of godsdienstige mense wat skynbaar ʼn verhouding met God het, en selfs groot gedeeltes kan aanhaal uit die Bybel vir ander, maar omdat hulle geen persoonlike liefdesverhouding met die God van die Bybel en met Jesus as Koning en Verlosser het nie, ken hulle nie werklik die Bybel nie en ken hulle beslis nie die werklikheid van ʼn lewende God wat besig is om iets van die hemel hier rondom ons op aarde in Sy krag en genade te laat deurbreek nie! Ons kan in dieselfde asem ook hier praat oor Evangeliese Christene wat passievol is oor die Woord en oor die Here, maar tog steeds glo dat die buitengewone gawes van die Gees en die wonderwerkende God nie meer vandag werk nie maar opgehou het met die totstandkoming van die Kanon, of Bybel in die vorm wat ons dit vandag het. (En asseblief, moet nie dink dat daar nie meer mense is wat so dink nie! Vir die van julle wat in Suid-Afrika woon en uit ʼn tipies Afrikaanse gereformeerde agtergrond uitkom: Dit is die amptelike standpunt van tipiese gereformeerde kerke in Suid-Afrika!) Dit is ook die manier van dink wat veroorsaak dat baie ernstige en opregte volgelinge van Jesus magteloos staan by die siekbed van mense! Veral as ons soos die dissipels daar in Joh. 9:2, vir Jesus wil vra: “Is hierdie persoon siek as gevolg van sy eie sondes of is hy siek as gevolg van dit wat sy ouers of voorouers gesondig het?” O, mag God deur Sy Gees verlos van hierdie manier van dink en ons bekragtig met die waarheid van die Evangelie van die Koninkryk! |
In die skool van die bonatuurlike in die markplein
Ek weet nie of jy ook soms so sukkel om te glo as die “popo die fan” tref daar op die markplein nie! Ja, daardie dae as die syfers net nie wil klop nie, of as ʼn lewensbelangrike transaksie net nie wil deurbreek nie, of as daardie onontbeerlike stuk masjinerie op die mees ongerieflike tyd skielik breek! Blaai saam met my na Markus 6 toe om te sien hoe die dissipels van Jesus ʼn paar lesse in die verband, in die skool van die bonatuurlike op die markplein moes leer. Lees jy self die verhaal in jou Bybel daar van Markus 6:31 af. In vers 44 lees ons dat die dissipels in die Naam en diens van Jesus, daardie dag met vyf broodjies en twee vissies, 5000 mans (met ander woorde, heelwaarskynlik tussen tien en vyftien-duisend mans, vrouens en kinders) genoeg kos gegee het, sodat daar agterna, nog 12 mandjies brokstukke oorgebly het. Dan lees ons hoe Jesus daardie selfde dissipels aansê om solank in die boot te klim en oor te vaar na Betsaida toe. Jy ken die verhaal. Op die see breek ʼn storm uit en daardie dissipels moet roei en veg vir hulle lewe teen die stormwind tot vroeg dagbreek die volgende dag. Dan lees ons in Markus 6:48 die volgende aangrypende vertelling hieroor: “Hy het gesien hulle roei swaar, want die wind was teen hulle. Teen dagbreek die volgende môre het Hy op die see na hulle toe aangeloop gekom, en Hy wou langs hulle verbygaan. Toe hulle Hom op die see sien loop, het hulle gedink dit is ʼn spook. Hulle het hard geskreeu, want hulle het Hom almal gesien en groot geskrik. Maar Hy het dadelik met hulle gepraat en vir hulle gesê: Wees gerus, dit is Ek. Moenie bang wees nie. Hy het toe by hulle in die skuit geklim, en die wind het gaan lê. Hulle was heeltemal uit die veld geslaan, want hulle het nie werklik verstaan wat die vermeerdering van die brood beteken nie; hulle kon dit nog nie begryp nie.” Wat ʼn vreemde vers waarmee hierdie gedeelte eindig! Wat op dees aarde beteken dit? Die Ou Afrikaanse Vertaling help ons hiermee, want daar word wat in die Grieks staan, so vertaal: “Want hulle het by die wonder van die brode nie verstandig geword nie, omdat hulle hart verhard was.” Sien, ʼn mens kan alles in die Woord lees wat Koning Jesus vir ons leer oor hoe ons moet ruimte maak vir die bonatuurlike en vir die feit dat Hy vir ons as Sy volgelinge bonatuurlik toerus en bonatuurlike outoriteit en krag gee om in diens van die Hemel hier op aarde op te tree! Ja, selfs al het jy gister bonatuurlike wonderwerke met jou eie oë gesien en self beleef het! Maar as die “popo die fan tref”, wanneer jy in sekondes moet optree of ʼn beslissing moet vel, is dit asof jy terug is in Graad 1 van die Skool van die Bonatuurlike! Soos die dissipels daar in Markus 6 op die see, na ʼn nag van veg teen die golwe, met die gewone toerusting soos seile en roeispanne soos vanouds, vergeet jy daardie tye die lesse wat jy gister geleer het oor die bonatuurlike wat moontlik is “in die Naam en diens van die Koning”! Daarom kom jy met ʼn harde slag grond toe, want jou gedagtes is nog nie werklik vernuwe en getransformeer met die boodskap en les van die wonderwerke nie! Daarom moet ons maar weer later verder leer dat… in diens van die Koning ... kan ons op water stap ... kan ons storms aanspreek en winde en golwe gaan bedaar en luister! Met ander woorde, wat die dissipels nog nie verstaan het nie, was hulle eie rol in die kom en gebeur van die realiteite van die Koninkryk van die hemel hier rondom ons op aarde! Volgende keer gesels ek met jou verder hieroor. |
More...
Wanneer die Koninkryk die markplek instap, moet daar ruimte gemaak word vir die bonatuurlike
Om Sy volgelinge se koppe reg te kry sodat hulle weet wat gaan “uit die hemel stroom” wanneer hulle die sluise moet ooptrek sodat iets van die hemel se realiteite hier rondom hulle – ook in die markplein – kan instroom hier op aarde, sê Jesus die volgende vir hulle: Joh. 14:12-14“Dít verseker Ek julle: Wie in My glo, sal ook die dinge doen wat Ek doen; en hy sal nog groter dinge as dit doen, omdat Ek na die Vader toe gaan. Wat julle ook al in my Naam vra, sal Ek doen, sodat die Vader deur die Seun verheerlik kan word. As julle My iets in my Naam vra, sal Ek dit doen.” Mat.10:1“Jesus het sy twaalf dissipels nader geroep en hulle mag gegee om onrein geeste uit te dryf en om elke soort siekte en kwaal gesond te maak.” Mat.10:7,8“Gaan verkondig: Die koninkryk van die hemel het naby gekom. Maak siekes gesond, wek dooies op, reinig melaatses en dryf bose geeste uit. Julle het dit verniet ontvang, gee dit ook verniet.” Hand. 1:8“Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en in Samaria en tot in die uithoeke van die wêreld.” In gedeeltes soos Rom. 12 en1 Kor. 12, kom God se Gees en leer ons dat ons as ambassadeurs van die Koninkryk, daarom, toegerus moet word met “bonatuurlike gawes”, vanuit die hemel. Soos die gawe van bonatuurlike wysheid en bonatuurlike kennis; ja, selfs bonatuurlike geloof om God in situasies te vertrou vir bonatuurlike wonderwerke om plaas te vind en vir bonatuurlike genesing om plaas te vind; die gawe van profesie, sodat God bonatuurlik aan die woord kan kom en met iemand kan praat of in die situasie kan inspreek, ens. Verstaan jy wat dit prakties vir die markplek beteken as ons daar instap en begin optree as ambassadeurs van die Koninkryk van die hemel? Dit sal beteken dat ons altyd in al ons besigheidstransaksies, beplanning- en begrotingsessies, of watter dienste ons ook al lewer, moet rekening hou, beplan of ten minste ruimte moet maak vir God en Sy Gees om bonatuurlike, wonderlike, onbeplande dinge te laat gebeur daar op die markplein. Dit maak dat ʼn klompie broodjies en ʼn paar vissies, in die Naam van die Koning, en in die hande van Sy volgelinge, bonatuurlik kan vermeerder om vir 10 000 en 15 000 honger mense genoeg kos te gee, sodat daar 7 mandjies by een geleentheid en 12 mandjies vol brokstukke kan oorbly agterna. Kan ek jou as sakeman of sakevrou daarom vra: Maak jy elke dag ruimte vir hierdie bonatuurlike element daar waar jy op die markplek besig is as ambassadeur van die Koning? |
Maak ons as U Ekklesia die deur waardeur U koninkryk kan invloei
Ons is besig om met mekaar te gesels oor hoe dit prakties lyk waar ons God se Koninkryk en wil in die markplek soek. Dit sal baie help as jy net weer verlede keer se Slukkie Nuwe Wyn vinnig deurlees, want ek wil baie graag ʼn bietjie verder daaroor met jou gesels. Het jy dit gedoen? Kom dan, en dan neem ek jou na dit wat Jesus daar in die volgende gedeeltes gesê het. Mat. 16:18-19“En Ek sê vir jou: Jy is Petrus, en op hierdie rots sal Ek my kerk bou, en die magte van die doderyk sal dit nie oorweldig nie. Ek sal aan jou die sleutels van die koninkryk van die hemel gee, en wat jy op die aarde toesluit, sal in die hemel toegesluit bly; en wat jy op die aarde oopsluit, sal in die hemel oopgesluit bly.” Mat. 16:21-23“Van toe af het Jesus dit vir sy dissipels duidelik begin stel dat Hy Jerusalem toe moet gaan en baie moet ly onder die familiehoofde, die priesterhoofde en die skrifgeleerdes, en dat Hy doodgemaak moet word, en die derde dag uit die dood opgewek moet word. Petrus het Hom toe opsy geneem en Hom begin berispe: "Mag God dit verhoed, Here! Dit sal beslis nie met U gebeur nie." Maar Jesus het na Petrus toe gedraai en vir hom gesê: "Moenie in my pad staan nie, Satan! Jy is vir My ʼn struikelblok, want jy dink nie aan wat God wil hê nie, maar aan wat die mense wil hê." Verstaan jy waarom Jesus, juis hier, kort nadat Hy in verse 18 en 19 gesê het wat Hy gesê het, toe vir Petrus met hierdie woorde stilgemaak het? Wat Jesus dus hier sê vir ons as Sy volgelinge, veral in die markplein, is dat ek en jy letterlik die deure vir die hel, sy leuens, vir siekte, vir dood en vir ander demoniese realiteite ooptrek en oopmaak elke keer as ons saamstem met die vyand! Sjoe, miskien moet jy net weer hierdie paragraaf ʼn keer stadig deur lees en oordink! Om te dink: ek bekragtig en bemagtig elke keer die vyand en sy demoniese magte elke keer as ek vanuit 'n menslike perspektief of vanuit menslike wysheid dink of praat. Dan word ek 'n deur, of maak ek die deure oop vir die vyand om in te kom om te kom steel, of om dood te maak of om te vernietig! 2 Kor. 10:4,5G‘n wonder nie God se Gees kom in 2 Kor. 10:4 en 5 en, as deel van God se vernuwing van ons denke, en sê die volgende: “Die wapens van ons stryd is nie die wapens van die mens nie, maar die kragtige wapens van God wat vestings kan vernietig. Daarmee vernietig ons die redenasies en elke hooghartige aanval wat teen die kennis van God gerig word. Ons neem elke gedagte gevange om dit aan Christus gehoorsaam te maak.” Mat. 16:19Sien jy nou, dit is presies waarom Jesus daar in Mat. 16:19, vir ons die volgende sê: Ek sal aan jou die sleutels van die koninkryk van die hemel gee, en wat jy op die aarde toesluit, sal in die hemel toegesluit bly; en wat jy op die aarde oopsluit, sal in die hemel oopgesluit bly." Dit was die fokus van Jesus se bediening en nou is dit ons opdrag en die outoriteit wat aan ons toegeken is as die Ekklesia. Verstaan jy werklik wat dit beteken? Dit wat ek en jy hier op aarde, in ons eie lewe, of in ons besigheid, bind en die deure voor toesluit, gebeur! Ons taak is dus om seker te maak van presies hoe sake in die verband in die hemel staan, en om dan dit rondom ons te laat korreleer daarmee. Wat ook al die realiteit in die hemel is en wat vry is om daar te werk, daarvoor moet die sluise ook hier op aarde oopgetrek word. So moet ons bv. die gees van ongeregtigheid, van desepsie, van valse aanklagte, ens. bind, maar die sluise ooptrek sodat geregtigheid en waarheid kan deurbreek! Ek wil hierdie deel afsluit met ʼn paar slotopmerkinge: Hoe meer en meer God se Koningheerskappy hier op aarde deurbreek, hoe meer sal ons ook van God se heerlikheid hier sien en ervaar. En sal ons as Sy Ekklesia hieroor openbaring ontvang sodat ons as Sy ambassadeurs hieroor kan getuig en dit ook profeties kan proklameer waar nodig. So sal ongekende wonderwerke en kragte ontketen word wat in lyn is met wat ons in die hemel gesien en gehoor het! |
Word 'n deur of ʼn sluis wat God kan gebruik om hemel te laat gebeur in mense se lewens en in situasies
Gen. 28:10-13,16-17,19“Jakob is van Berseba af weg na Haran toe. Teen sononder het hy by ʼn plek gekom waar hy kon oornag. Hy het daar ʼn klip vir ʼn kopkussing gebruik en gaan lê en slaap. Hy het gedroom: ʼn leer staan op die aarde en die punt van die leer raak aan die hemel, en engele van God klim op en af met die leer. Toe kom staan die Here by Jakob en sê: "Ek is die Here die God van jou voorvader Abraham, die God van Isak. Ek sal die grond waarop jy lê, vir jou en jou nageslag gee. ... Jakob het wakker geskrik en gesê: "Die Here is op hierdie plek, en ek het dit nie besef nie." Jakob het bang geword en gesê: "Hoe skrikwekkend is hierdie plek! Dit is niks anders nie as die huis van God; dit is die poort van die hemel." Hy het die plek Bet-El genoem. Die stad was voorheen bekend as Lus.” Soms beleef ons soos Jakob: God is hier en ek het dit nie geweet nie of ek was te blind om dit raak te sien! Veral daar in ons besig-wees op die markplein, maar natuurlik ook elders in ons eie lewe en in ander se lewens. Rom. 12:2Dit is juis om hierdie rede wat die Here ons deur Sy Gees uitnooi in die woorde van Rom. 12:2: “Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.” Deel van hierdie verandering is dan ook om te bid: Here, maak my oë oop hiervoor in my eie lewe, in ander se lewens, in situasies! Sodat ek U engele kan sien beweeg en werk, soos wat Heb. 1:14 vir ons leer! As ʼn mens weer na die lewe en bediening van Jesus hier op aarde kyk, is dit immers presies wat Hy hier kom doen het. Kom ek haal vir jou ʼn paar gedeeltes hieroor aan daar uit die Evangelie van Johannes. Joh. 1:1-4“In die begin was die Woord daar, en die Woord was by God, en die Woord was self God. Hy was reeds in die begin by God. Alles het deur Hom tot stand gekom: ja, nie ʼn enkele ding wat bestaan, het sonder Hom tot stand gekom nie. In Hom was daar lewe, en dié lewe was die lig vir die mense.” Joh. 1:14“Die Woord het mens geword en onder ons kom woon. Ons het sy heerlikheid gesien, die heerlikheid wat Hy as die enigste Seun van die Vader het, vol genade en waarheid.” Joh. 1:49-51“Toe roep Natanael uit: "Rabbi, U is die Seun van God; U is die Koning van Israel!" Daarop sê Jesus vir hom: "Glo jy omdat Ek vir jou gesê het dat Ek jou onder die vyeboom gesien het? Jy sal nog groter dinge as dit sien." Verder sê Jesus vir hom: "Dit verseker Ek julle: Julle sal die hemel oop sien en julle sal die engele van God sien op-en afklim na die Seun van die mens toe." Sien jy, Jesus was letterlik hierdie deur of sluis wat die Vader kon ooptrek sodat die heerlike realiteite van die hemel, hier tussen ons op aarde begin gebeur! Nou ja, net so wil die Vader ons ook gebruik. Dit is waarom Jesus die volgende gesê het: Joh. 14:16,17“Ek sal die Vader vra, en Hy sal vir julle ʼn ander Voorspraak stuur om vir ewig by julle te wees, naamlik die Gees van die waarheid. Die wêreld kan Hom nie ontvang nie, omdat hulle Hom nie sien en Hom nie ken nie. Maar julle ken Hom, omdat Hy by julle bly en in julle sal wees.” 1 Kor. 3:16“Weet julle nie dat julle die tempel van God is en dat die Gees van God in julle woon nie?” Ek en jy, ons besighede, waar ons is, moet die adres word waar mense hulle kan vasloop teen ons God en Sy genade. Daar moet hulle iets beleef van hemel wat hier op aarde deurbreek! Ef. 2:19-22“Julle is dus nie meer ver van God af nie, nie bywoners nie, maar medeburgers van die gelowiges en lede van die huisgesin van God. Julle is ʼn gebou wat opgerig is op die fondament van die apostels en die profete, ʼn gebou waarvan Christus Jesus self die hoeksteen is. In Hom sluit die hele gebou saam en verrys dit tot ʼn heilige tempel vir die Here, in wie julle ook saam opgebou word as ʼn geestelike huis waarin God woon.” 1 Pet. 2:4-5Dan sê God se Gees: “Kom na Hom toe, die lewende steen, wat deur die mense afgekeur is, maar deur God vir die ereplek uitverkies is. Laat julle as lewende stene opbou tot ʼn geestelike huis, om ʼn heilige priesterdom te wees en geestelike offers te bring wat deur Jesus Christus vir God welgevallig is.” Kom ons bid saam: Dankie, Here, vir U Gees wat in ons lywe woon om ons U adres, die hemel se adres en die deur na hemelse realiteite toe, te maak! |
Die groot prentjie moet altyd die belangrikste prentjie bly
In ons tipiese Westerse samelewing draai soveel dinge net om die individu, sy behoeftes en sy begeertes. Ongelukkig is dit ook baie keer waar in die wyse hoe die Evangelie verkondig word in die Westerse wêreld. Nie dat dit totaal verkeerd is nie; dit is net ʼn uiters onvolledige Evangelie, en selfs ʼn baie gevaarlike Evangelie wat so klink! Lees ʼn mens God se Woord, luister jy mooi na wat Jesus gesê het en kyk jy mooi na wat Jesus gedoen het, ontdek jy baie gou dat daar waar ek en jy soek na God se wil vir ons eie lewe, het God se wil vir jou lewe altyd iets te doen met die mense om jou en hoe jy inpas in ʼn baie groter prentjie of legkaart. Daarom is dit belangrik om te hoor dat wanneer Sy dissipels Hom vra dat Hy hulle moet leer om reg te bid, dan begin daardie gebed nie met “My Vader wat in die hemel is” nie. Nee, ons Koning leer ons om altyd te bid: “Ons Vader wat in die hemel is”! God se Woord leer ons dat die Ekklesia ʼn “tempel” is, of ʼn volk, of ʼn familie. Ja, Jesus kom om ʼn Bruid te kom haal, en nie ʼn individu nie! Ons opdrag is om dissipels te gaan maak van “al die nasies”! Ja, natuurlik begin dit daar waar ons die Evangelie aan een of twee verkondig, maar God se oog en plan is dat families, en later dorpe en stede, en uiteindelik nasies Hom sal volg en dien as die Koning van alle konings. Ja, alhoewel God ons uitdaag om Hom toe te laat om by ons te begin en om by ons as individu se verstand en manier van dink te begin om dinge te verander (soos in Romeine 12:2 staan), sodat Hy ons as individue kan begin verander, is Sy plan altyd groter as dat net ek en jy sal verander. Ja, Hy weet dinge begin by daardie een of twee wat gehoorsaam gaan toelaat dat Hy hulle kan verander deur Sy Woord en Gees. Ja, dat Hy hulle kan leer wat Sy wil vir hulle lewe is. Maar dan wil Hy hulle gebruik om dit ook vir ander om hulle te leer wat Hy hulle geleer het. ʼn Verstand en denke wat verander word, verander ʼn individu, maar ʼn individu kan weer ʼn familie verander, en so kan ʼn gemeenskap begin verander sodat ʼn dorp of ʼn stad en later ʼn hele nasie kan verander. Dit is die hart van God. Daarom is dit vir my so verskriklik om te hoor hoe negatief God se kinders is oor wat rondom hulle in hulle dorp of stad, of gemeenskap, of selfs in hulle land aan die gang is! Want dan laat klink ons dit asof die Evangelie van Jesus Christus nie hier rondom ons ʼn verskil kan maak nie. Om op te gee of moedeloos hulpeloos terug te staan in die lig van al die korrupsie of geweld of misdaad rondom ons, en nie ʼn verwagting te hê dat dinge kan verander nie, is ʼn uiterse belediging en ʼn miskenning teenoor dit wat Jesus aan die kruis gedoen het! Dit misken en ontken die krag van die kruis! Mag dit nooit in ons dag gebeur nie! Jesus het immers nie alles wat Hy deurgegaan het, net deurgegaan sodat ek en jy “kerk kan hou en kerk kan wees” totdat Hy terugkom nie! As Hy iemand wat siek was of selfs dood was, kan gesond maak of lewendig laat word, kan Hy ook nasies gesond of lewendig maak! Voel jy nie ook dat dit hoog tyd is dat dit gebeur nie! |