Die meeste volgelinge van Jesus dink dat bekering net behels dat ons vra dat God ons sal vergewe. Bekering beteken natuurlik baie meer as net dit.

As Koning Jesus Sy openbare bediening begin en sê waarom Hy as die Seun van God hier op aarde is, is Sy eerste woorde daar in Mat. 4:17: “Bekeer julle, want die koninkryk van die hemel het naby gekom.”

Hierdie “bekeer” beteken dieselfde as wat daar in Rom. 12:2 gesê word. Naamlik dat ons God sal toelaat om deur Sy Gees en Sy genade ons hele manier om oor dinge te dink en daarna te kyk, te verander.

Sien, om Jesus as Verlosser te ontmoet, is net die eerste tree in jou volg van Jesus. Daardie eerste bekering sit jou by die ingang van ʼn totaal nuwe manier van lewe neer waarin jy leer om Jesus te volg as die Nuwe Koning en Here wat die Koninkryk van die hemel en God se wil ook hier op aarde wil kom realiseer.

Ja, en Hy wil jou gebruik as Sy instrument en as Sy tuinslang. Hy wil jou gebruik as ambassadeur en as getuie van hoe hierdie nuwe werklikheid lyk en as iemand wat vir mense moet wys en vertel waar dit oral begin gebeur het.

Om dit te kan doen, moet jy “bekeer” en toelaat dat daar ook ʼn bekering in jou denke en verstand gebeur.

Dit vra dat God deur die werking van Sy Woord en Gees jou manier van kyk, dink en praat oor dinge, 180 grade sal omdraai en sal verander. Jy moet Hom toelaat om jou om te draai en oor te haal sodat jy in staat kan wees om vanuit hoe Hy oor alles dink en daarna kyk, na die realiteite hier op aarde kan kyk, dink en praat.

Jy moet, soos Hy, nie tevrede te wees voordat dinge hier rondom jou gebeur en lyk soos wat dit in die hemel lyk en gebeur nie.

Hiervoor het ons ʼn totaal nuwe perspektief nodig, ʼn transformasie en vernuwing wat ons gedagtes, emosies, waardes en wilskeuses, ja, eintlik elke deel van ons lewe gaan raak en 180 grade gaan verander.

Sonder hierdie diepgaande bekering, gaan ons heeltyd vassteek en vashaak in ons tipies menslike manier van dink, voel en besluit.

Dit gaan nie noodwendig “sondig” of totaal verkeerd wees nie. Dit gaan net nie deurbreek na daardie nuwe, hoër dimensie, of kom ons noem dit op sy naam, na daardie hemelse dimensie, waar dit wat God oorspronklik bedoel het en wat in Sy hart is, kan gebeur en verwag word om te gebeur nie. Ja, waar ons nie tevrede sal wees voordat die nuwe wêreld en ʼn stukkie hemel op aarde hier rondom ons begin deurbreek nie.

As jy werklik glo dat Jesus en die Gees van die Vader en die Seun werklik in jou is, dan moet jy besef dat hierdie selfde Jesus en die Gees van die Vader en die Seun wat in jou woon, ʼn hele, splinternuwe realiteit met hulle saamgebring het. Om ook in jou, in jou hele lewe, en deur jou, in alles waarmee jy besig is en in almal se lewens rondom jou, moet deurbreek.

Dit is waarom en waarvoor Jesus as die Doper met die Gees, jou met die krag en gawes van die Gees kom salf en toerus het. Sodat jy dieselfde dinge en selfs groter dinge kan doen as wat Koning Jesus hier op aarde gedoen het om die Koninkryk van die hemel ook stukkie vir stukkie hier te laat deurbreek.

Verstaan jy nou waarom ek en jy daaglikse bekering nodig het deur die werking van God se Gees?

Sodat ons heeltyd met hierdie verwagting kan rondloop, so kan dink oor dinge en ook kan besigheid doen daar waar ons in die markplein neergesit is deur God as getuies hiervan.