Onthou jy dat ek by ʼn vorige geleentheid vir jou gesê het dat die Hebreeuse letter, Hei, die syfer 5 in Hebreeus verteenwoordig. Daardie Hebreeuse letter simboliseer dus vir my “God se genade”, maar kan ook God self en Sy Heilige Naam verbeeld.
Dit in gedagte, kom ek seën jou uit jou skoene uit met ʼn profetiese openbaring uit die Woord van God in die verband.
Blaai saam met my na Gen. 17:5 waar ons die volgende lees:
“Jy sal nie meer Abram genoem word nie. Jou naam sal Abraham wees, want vader van 'n menigte nasies maak Ek jou.”
Wat jy nie in die Afrikaanse vertaling kan sien nie, is presies wat in Hebreeus staan, naamlik dat toe God “Abram” se naam verander het na “Abraham”, het Hy in die Hebreeus, net een letter by sy naam bygevoeg.
Kan jy raai watter letter was dit?
Ja, jy is reg. Dit was die Hebreeuse letter waaroor ons tans praat, en wat die Joodse jaartal 5785 se syfer 5 ons heeltyd aan herinner, naamlik die letter “Hei”.
Met ander woorde, kyk net wat sê God gaan gebeur omdat die Hebreeuse letter “Hei” by Abram se naam bygevoeg word?
Ons lees dit in Gen. 17 vers 6 tot 8:
“Ek sal jou besonder vrugbaar maak en jou tot nasies maak. Konings sal uit jou voortkom. Ek sal my verbond tussen My en jou en jou nageslag ná jou handhaaf, deur hulle geslagte heen, as 'n ewige verbond, om vir jou 'n God te wees en vir jou nageslag ná jou. Ek gee aan jou en jou nageslag ná jou die land van jou vreemdelingskap, die hele land Kanaän, as eiendom vir altyd, en Ek sal vir hulle 'n God wees.”
Sjoe, laat dit nie ook jou na jou asem snak nie!
Dit is egter nie al wat God vir Abraham hiermee wou sê nie. Luister wat sê God verder vir hom en vir sy 99-jarige vrou hiermee:
Gen. 17:15 en 16: “God het vir Abraham gesê: ‘Sarai, jou vrou, moet jy nie meer Sarai noem nie; want haar naam moet Sara wees. Ek sal haar seën, en boonop sal Ek uit haar vir jou 'n seun gee. Ek sal haar seën, en sy sal tot nasies word; konings van volke sal uit haar voortkom.’”
Hoor jy wat doen die Here? Selfs by Sarai se naam, sit God in sy genade nog een letter by haar naam, en weer is dit die Hebreeuse letter, “Hei”.
Dit maak letterlik die hemele op en in haar lewe oop!
So gebeur presies dieselfde in ons lewens die oomblik wat ons toelaat dat God se genade ons lewe binnekom.
Dit kom ons lewe binne die oomblik wat ons die genade wat God na ons uitsteek in Christus Jesus, vasgryp in geloof. Maar ook wanneer ons in geloof kies om “God se Koninkryk en Sy wil”, soos Mat. 6:33 dit beskryf, vasgryp en begin soek in ons lewe.
Dit gebeur wanneer ons in geloof God se beloftes en opdragte aan ons vasgryp en begin gehoorsaam en daardie een tree uit die boot van sekuriteit gee omdat ons oortuig is dit is wat God vir ons gesê het om te doen.
Op daardie oomblik begin God se genade vermenigvuldig in ons lewe. Begin dit op vlakke en dimensies en maniere in ons lewe werk wat ons eers jare daarna mooi en duidelik kan raaksien en herken.
Soms gebeur dit ook in ons lewe soos wat in ʼn 99-jarige Joodse man en sy vrou se lewens gebeur het toe hulle skielik en onverwags ouers geword het van ʼn seuntjie!
Soms is daardie seën van God wat “losgekom het” in ons lewe toe God se genade daar vaardig geword het, “toegerol” in ongemak, ongerief, moeite, selfs verleentheid, moedeloosheid, verslaenheid, omdat ons nie altyd alles onmiddellik verstaan wat in en rondom ons aan die gebeur is nie.
Jou identiteit, die hele verloop van jou lewe, kan verander daardie dag wat jy plek maak vir God se genade in jou lewe.
Wees ook gewaarsku, God se genade gaan in die meeste gevalle met ʼn prys kom!
Daarom het ons God se profetiese openbaring, woord en beloftes nodig om ons te help verstaan wat aan die gebeur is waar ons nog nie kan sien nie!